មន្រ្តីក្រសួងការបរទេសអូស្រ្តាលី លោកស្រី ជូលី ហិចឆ័រ បានថ្លែងថាការដាក់ទណ្ឌកម្មណាមួយប្រឆាំងមន្រ្តីកម្ពុជារួមទាំងថាតើអូស្រ្តាលីទទួលស្គាល់លទ្ធផលបោះឆ្នោតនាខែកក្កដាកំពុងស្ថិតនៅក្នុងដំណាក់កាលពិចារណានៅឡើយ។
លោកស្រី ជូលី ហិចឆ័រ បានថ្លែងបែបនេះនៅចំពោះមុខគណៈកម្មាធិការកិច្ចការបរទេសការពារជាតិ និងពាណិជ្ជកម្មនៃព្រឹទ្ធសភាអូស្រ្តាលី ទៅនឹងសំណួររបស់សមាជិកព្រឹទ្ធសភាមកពីរដ្ឋវិកតូវៀ លោករីឆាដ ឌីណាតាលីថាតើអូស្រ្តាលីនឹងដាក់ទណ្ឌកម្មដល់មន្រ្តីកម្ពុជាដូចអាមេរិកហើយទទួលស្គាល់លទ្ធផលនៃការបោះឆ្នោតនៅកម្ពុជានាខែកក្កដាដែរឬទេ។
លោកស្រី ជូលី ហិចឆ័រ ថាអូស្រ្តាលីបានបង្ហាញក្តីព្រួយបារម្ភយ៉ាងខ្លាំងរួចទៅហើយជាមួយបណ្ដាប្រទេសផ្សេងៗទៀតពីដំណើរការលទ្ធិប្រជាធិបតេយ្យនៅកម្ពុជាដោយសារតែការចាប់ខ្លួនមេដឹកអតីតគណបក្សសង្រ្គោះជាតិនិងការរំលាយបក្សប្រឆាំងដ៏ធំមួយនេះ ក៏ដូចការរារាំងមន្រ្តីបក្សប្រឆាំងមិនអោយចូលរួមបោះឆ្នោតជាដើម។ បើតាមលោកស្រី ជូលី ហិចឆ័រកក្តាទាំងនេះហើយដែលធ្វើឲ្យអូស្រ្តាលីពិចារណាពីភាពជឿជាក់បាននៃលទ្ធផលការបោះឆ្នោតនៅកម្ពុជានាខែកក្កដាខាងមុខ។
អ្នករាយការពិសេសរបស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្សប្រឆាំកម្ពុជា លោកស្រី រ៉ូណាស្មីត (Rhona Smith) ធ្លាប់បានវាតម្លៃពីស្ថានការណ៍នយោបាយនៅកម្ពុជា តាមរយៈសេចក្តីថ្លែងការណ៍ចុះថ្ងៃទី៣០មេសាថា៖
លោកស្រី រ៉ូណាស្មីត អ្នករាយការពិសេសរបស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្សប្រឆាំកម្ពុជា
អ្នកនាំពាក្យគណបក្សប្រជាជនកម្ពុជាដែលកំពុងគ្រប់គ្រងអំណាច លោក សុខ ឥសាន បានលើកឡើងថា មន្ត្រីដែលបានអះអាងក្នុងព្រឹទ្ធសភានោះ ជាមន្ត្រីតូចតាច។ លោកថាការអះអាងបែបនេះ មិនមែនតំណាងឲ្យរដ្ឋាភិបាលអូស្រ្តាលីទាំងមូលទេ ហើយរហូតមកដល់ពេលនេះកម្ពុជាមិនទាន់ទទួលបានលិខិតផ្លូវការពីរដ្ឋាភិបាលអូស្ត្រាលីនៅឡើយដែរ។
អ្នកនាំពាក្យរូបនេះ បញ្ជាក់ថា ការសម្រេចចិត្ត របស់ប្រទេសអូស្ត្រាលី គ្មានឥទ្ធិពលមកលើរដ្ឋាភិបាលកម្ពុជាទេ ដោយលោកថា ចំណាត់ការកន្លងទៅ ជាការអនុវត្តច្បាប់ ដើម្បីពង្រឹងនីតិរដ្ឋនៅកម្ពុជា។
លោក សុខ ឥសាន អ្នកនាំពាក្យគណបក្សប្រជាជនកម្ពុជាដែលកំពុងគ្រប់គ្រងអំណាច
សមាជិកនៃក្រុមប្រឹក្សាសិទ្ធិមនុស្ស របស់អង្គការសហប្រជាជាតិ ចំនួនប្រទេស៤៥ប្រទេស ក្នុងចំណោម៤៧ មានបារាំង កាណាដា សហរដ្ឋអាមេរិក ចក្រភពអង់គ្លេស និងអូស្ត្រាលី ជាដើម កាលពីថ្ងៃទី២១ខែមីនាឆ្នាំ២០១៨ បានចេញសេចក្តីថ្លែងការណ៍រួម ទាមទារឲ្យរដ្ឋាភិបាលកម្ពុជា ផ្តល់នីតិសម្បទា ដល់គណបក្សសង្គ្រោះជាតិ រួមទាំងសមាជិកសភា និងសមាជិកក្រុមប្រឹក្សាឃុំ-សង្កាត់នៅទូទាំងប្រទេស ជាង៥ពាន់ឡើងវិញ។
សេចក្តីថ្លែងការណ៍រួមក៏បានរំឭកថា រយៈពេល ២៥ឆ្នាំកន្លងមកនេះ សហគមន៍អន្តរជាតិ មានសុទិដ្ឋិនិយមយ៉ាងខ្លាំង ទៅលើស្មារតីកិច្ចព្រមព្រៀងសន្តិភាពទីក្រុងប៉ារីស ដែលបានជួយជ្រោមជ្រែងប្រទេសកម្ពុជាឲ្យកសាងលទ្ធិប្រជាធិបតេយ្យ។
ប៉ុន្តែប្រទេសទាំងនោះ បានបង្ហាញការខកចិត្តថា ខណៈការបោះឆ្នោតកាន់តែខិតជិតមកដល់ បែរជាបាត់បង់ក្តីសង្ឃឹម ដោយថា រដ្ឋាភិបាលបានជំនួសមកវិញ នូវការធ្វើទុក្ខបុកម្នេញទៅលើសិទ្ធិពលរដ្ឋ និងសិទ្ធិនយោបាយ ចាប់ប្រធានគណបក្សសង្គ្រោះជាតិលោក កឹម សុខា និងសកម្មជនបក្សប្រឆាំងជាច្រើនរូបទៀត ដាក់ពន្ធនាគារ ការរម្លាយគណបក្សសង្គ្រោះជាតិ បណ្តេញអង្គការសង្គមស៊ីវិល និងបង្រ្កាបប្រព័ន្ធផ្សព្វផ្សាយឯករាជ្យជាដើម។
