ប្រជាពលរដ្ឋនៅខេត្តកំពង់ធំ សុំកិច្ចអន្តរាគមន៍ពីក្រុមប្រឹក្សាឃុំទីពោ ជួយរកដំណោះស្រាយរឿងដីធ្លីជូនប្រជាពលរដ្ឋបានបង្កបង្កើនផលឡើងវិញ បន្ទាប់ពីទាហានទៅបោះទីតាំងដី និងបណ្តេញពលរដ្ឋចេញពីតំបន់នោះ។
លោក អ៊ុក ហាន ដែលអះអាងថា ជាប្រជាពលរដ្ឋមានជម្លោះដីធ្លីនៅភូមិផ្លុង ឃុំទីពោ ស្រុកសន្ទុក ខេត្តកំពង់ធំ បាននាំគ្នាមកសាលាឃុំ កាលពីថ្ងៃទី១៩ ខែមីនានេះ ដើម្បីសុំកិច្ចអន្តរាគមន៍ពីក្រុមប្រឹក្សាឃុំ ជួយរកដំណោះស្រាយដីធ្លីជូនប្រជាពលរដ្ឋជាង១០គ្រួសារ បានបង្កបង្កើនផលវិញ ដោយសារបច្ចុប្បន្ននេះ ទាហានបានបោះទីតាំងលើដីនោះ និងបណ្តេញពលរដ្ឋចេញមិនឲ្យបង្កបង្កើនផលជាដើម។
លោកប្រសាសន៌ថា៖ «គាត់បានកាន់កាប់ដីចំនួន៧០ហិកតា តាំងពីឆ្នាំ១៩៧៩កន្លងមក អត់ទាន់មានបងប្អូនណាមកកាន់កាប់ដីនោះទេនៅតំបន់ គ្រើលរលើង ក្រោយមកក្នុងឆ្នាំ ២០០៦ ស្រាប់តែឃើញទាហានបោះទីតាំងនៅតំបន់នោះ ហើយបានដេញខ្ញុំ ក្រោយលោកសែប ខ្ញុំមិនស្គាល់ឈ្មោះ ក៏បានចែកព្រំក្បាលដីជាមួយខ្ញុំ។»
មេឃុំទីពោ លោក ឆាយ យូ បានឆ្លើយតបនិងប្រជាពលរដ្ឋទាំងនោះថា លោកនឹងជួបជាមួយភាគីពាក់ព័ន្ធ ដើម្បីរកដំណោះស្រាយជូនប្រជាពលរដ្ឋទាំងនោះ៕