ស្ត្រីជាកម្មការិនីសំណង់ម្នាក់បានធ្លាក់ពីលើប្លង់សេជាន់ទីមួយ បណ្តាលឲ្យស្លាប់នៅការដ្ឋានសំណង់ផ្ទះល្វែង នៅភូមិក្រពើទ្រោម សង្កាត់រលួស ខណ្ឌដង្កោ រាជធានីភ្នំពេញកាលពីព្រឹកថ្ងៃទី២៩ ខែមីនា។
បើតាមសម្តីប្អូនថ្លៃជនរងគ្រោះ លោក យ៉ន់ យឿន ដែលជាកម្មសំណង់ដូចគ្នា។
ប្អូនថ្លៃជនរងគ្រោះដែលជាកម្មដូចគ្នា លោក យ៉ន់ យឿនឲ្យដឹងថា៖ «គាត់បានមកធ្វើការទាំងពីរនាក់ប្តីប្រពន្ធបាន១២ថ្ងៃហើយ ដោយគាត់មានជំពាក់បំណុលគេនៅស្រុក។ គាត់មកធ្វើការដើម្បីរកប្រាក់សងបំណុលគេជាង៦០ម៉ឺនរៀល។ ជាធម្មតាគាត់ធ្វើការនៅខាងក្រោម តែថ្ងៃនេះ មិនដឹងម៉េចគាត់ គាត់ឡើងម៉ោ(មក)លើប្លង់សេគេទើបចាក់ហើយ ប្រហែលឲ្យស្រឡះមុខគាត់ហ្នឹងយ៉ាង។ ក្រោយមកក៏ធ្លាក់ដាំដូងក្បាលមកមុន ប្រហែលជាគាត់ងងឹតមុខ ធ្លាក់ក្បាលប៉ះនឹងដុំថ្ម ក៏ស្ងាត់មាត់ឈឹង។»
ប្រភពដដែលឲ្យដឹងថា ស្ត្រីរងគ្រោះឈ្នោះ មឹល ក្រពុំ អាយុ50ឆ្នំា រស់នៅភូមិស្រម៉ ឃុំត្រពាំងស្រែ ស្រុកមេសាង ខេត្តព្រៃវែង។
ម្ចាស់សំណង់ លោក ឡេង ទ្រី បានឲ្យដឹងថា ក្រោយពីធ្លាក់ ស្រ្តីរូបនោះមិនទាន់ស្លាប់ទេ ហើយលោកបានយកជនរងគ្រោះទៅមន្ទីពេទ្យឯកជនមួយភ្លាមៗ។
លោកបន្ថែមថា៖ «ពេលខ្ញុំយកទៅដល់ពេទ្យឯកជន ឈ្មោះឃឿន ពេទ្យថាមិនសង្ឃឹមទេ ឲ្យយកមកវិញទៅ។»
លោកថា លោកតែងតែប្រាប់ក្រុមជាងរបស់លោកឲ្យមានការប្រុងប្រយ័ត្នជានិច្ច។
គួររំលឹកថា កម្មករដែលធ្វើការនៅផ្ទះល្វែងនេះមានចំនួន10នាក់ ក្នុងនោះមានស្រ្តី៣នាក់ដែលរាប់ទាំងជនរងគ្រោះ។
សពជនរងគ្រោះត្រូវគ្រួសារដឹកបញ្ជូនទៅស្រុកកំណើតដោយមានការជួយឧបត្ថម្ភពីមេជាង និងម្ចាស់ផ្ទះ៕