តុលាការវៀតណាមសម្រេចកាលពីថ្ងៃចន្ទម្សិលមិញដាក់ពន្ធនាគារបុរសជនជាតិអាមេរិកម្នាក់១២ឆ្នាំ ដោយចោទថា បានប៉ុនប៉ងផ្តួលរំលំរដ្ឋាភិបាល។
បុរសជនជាតិអាមេរិកមានដើមកំណើតវៀតណាមរូបនេះ ឈ្មោះ Michael Phuong Minh Nguyen អាយុ៥៥ឆ្នាំ រងការចោទថា ធ្វើសកម្មភាពតវ៉ាផ្តួលរំលំរដ្ឋាភិបាល និងមានការដាក់ពង្រាយគ្រាប់នៅការិយាល័យរដ្ឋាភិបាលក្នុងជីងក្រុងហូជីមិញ និងទីក្រុងហាណូយ។ នេះ បើតាមសារព័ត៌មាន BBC។
ជនជាតិវៀតណាម៣រូបផ្សេងទៀត ក៏ត្រូវបានចាប់ខ្លួនក្នុងករណីជាមួយគ្នានេះដែរ។ ប៉ុន្តែពួកគេច្រានចោលការចោទប្រកាន់ទាំងនេះ។
បើទោះជាវៀតណាមមានការធ្វើកំណែទម្រង់សេដ្ឋកិច្ច និង មានសកម្មភាពស្និទ្ធទៅជាមួយប្រទេសលោកសេរីមួយរយៈកាលចុងក្រោយនេះ ក៏ដោយប៉ុន្តែរដ្ឋាភិបាលនៃប្រទេសនេះ នៅតែដឹកនាំដោយគណបក្សតែមួយ ដែលមានរឹតត្បិតខ្លាំង លើក្រុមដែលតវ៉ាប្រឆាំងឬរិះគន់រដ្ឋាភិបាល។
លោក Nguyen Van Tam មេធាវីការពារក្តី ថ្លែងថា សេចក្តីសម្រេចរបស់តុលាការចោទប្រកាន់នេះ មានលក្ខណៈធ្ងន់ធ្ងរពេក។ លោកថា តុលាការមិនមានភស្តុតាងបញ្ជាក់ថា កូនក្តីរបស់លោកដាក់ពង្រាយគ្រាប់បែកនោះទេ។ ទោះយ៉ាងណាមេធាវីរូបនេះ មិនទាន់ដឹងច្បាស់ថា ត្រូវប្តឹងទៅឧទ្ធរណ៍ឬ យ៉ាងណានោះទេ។
លោកMichael Phuong Minh Nguyen កើតនៅវៀតណាម ហើយទៅរស់នៅសហរដ្ឋអាមេរិកតាំងពីក្មេង។ លោក មានកូន៤នាក់ ហើយក្នុងអំឡុងធ្វើដំណើរទៅវៀតណាមក្នុងលក្ខណៈឯកជនកាលពីឆ្នាំ២០១៨ ត្រូវបានសមត្ថកិច្ចចាប់ខ្លួននៅពេលនោះ។