រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ នឹងជួបប្រជុំជាមួយតំណាងក្រុមហ៊ុនសាងសង់នៅក្នុងសប្តាហ៍នេះ ដើម្បីសិក្សាពីគម្រោងប្លង់ និងការសាងសង់អគារ។
ក្នុងលិខិតរបស់ក្រសួងរៀបចំដែនដីចុះថ្ងៃទី៣០ ខែមិថុនា កិច្ចប្រជុំនេះ នឹងធ្វើឡើងនៅថ្ងៃទី៤ ខែកក្កដា ឆ្នាំ២០១៩ ក្រោមអធិបតីភាពលោក ជា សុផារ៉ា។ លិខិតដដែលបញ្ជាក់ថា កិច្ចប្រជុំនឹងផ្តោតជាសំខាន់លើការសិក្សាគម្រោងប្លង់ និងការសាងសង់សំណង់អគារ។
ការប្រកាសជួបប្រជុំជាមួយតំណាងក្រុមហ៊ុនសាងសង់នេះ ធ្វើឡើងក្រោយពីឧបទ្ទវហេតុបាក់សំណង់អគារមួយកម្ពស់៧ជាន់នៅខេត្តព្រះសីហនុកាលពីថ្ងៃទី២២ ខែមិថុនា ដែលបណ្ដាលឲ្យកម្មករខ្មែរ ២៨នាក់ស្លាប់ និង២៦នាក់ទៀតរងរបួស។ ភ្លាមៗ បន្ទាប់ពីការបាក់សំណង់អាគារ រាជរដ្ឋាភិបាល បានបង្កើតគណៈកម្មការមួយ ដើម្បីចុះត្រួតពិនិត្យគុណភាពសំណង់នៅខេត្តជាប់មាត់សមុទ្រមួយ។
កាលពីថ្ងៃទី២៧ ខែមិថុនា ឆ្នាំ២០១៩ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់លោក ជា សុផារ៉ា បានសុំគោលការណ៍ពីលោកនាយករដ្ឋមន្រ្តី ហ៊ុន សែន ដើម្បីចាត់វិធានការទប់ស្កាត់ការដ្ឋានសំណង់ខុសច្បាប់ ដោយថា ដើម្បីធានាសុវត្ថិភាព និងគុណភាពសំណង់ទូទាំងប្រទេស៕