វៀតណាម និងសហភាពអឺរ៉ុបបានចុះកិច្ចព្រមព្រៀងចំនួនពីរ កាលពីថ្ងៃអាទិត្យ ទី៣០ ខែមិថុនាឆ្នាំ២០១៩ គឺកិច្ចព្រមព្រៀងតំបន់ធ្វើពាណិជ្ជកម្មមិនជាប់ពន្ធ អឺរ៉ុប-វៀតណាម (EVFTA) និងកិច្ចព្រមព្រៀងការពារអ្នកវិនិយោគ អឺរ៉ុប-វៀតណាម (EVIPA)។
ផលប្រយោជន៍
របាយការណ៍សិក្សាព្យាករណ៍ទុកមុន ដែលសិក្សាដោយក្រសួងផែនការ និងវិនិយោគរបស់វៀតណាមរំពឹងថា កិច្ចព្រមព្រៀងតំបន់ធ្វើពាណិជ្ជកម្មមិនជាប់ពន្ធនេះ អាចជួយឱ្យការនាំចេញរបស់វៀតណាមកើនឡើង ២០ភាគរយ នៅឆ្នាំ២០២០ កើនឡើង ៤២,៧ភាគរយ នៅឆ្នាំ២០២៥ និង៤៤,៤ភាគរយ នៅឆ្នាំ២០៣០។
ទន្ទឹមនឹងការទទួលបានផលប្រយោជន៍ជាក់ស្តែងផ្នែកសេដ្ឋកិច្ចនេះ វៀតណាមក៏ទទួលបានកេរ្តិ៍ឈ្មោះនៅលើឆាកអន្តរជាតិ ជាប្រទេសដែលមានស្តង់ដារទាំងច្បាប់ ទាំងគុណភាពទំនិញ និង លក្ខខណ្ឌផ្សេងៗទៀត ទើបឈានដល់ការចាប់ដៃគូជាមួយសហភាពអឺរ៉ុបដែលមានបណ្តុំប្រទេសរីកចម្រើនចំនួន២៨ជាសមាជិកនេះ។
ករណីនេះ ធ្វើឱ្យវៀតណាមមានឱកាសក្នុងការពង្រឹង និងពង្រីកសហគ្រាសធន់តូច និងមធ្យម។ វៀតណាមក៏ក្លាយជាគោលដៅដែលអ្នកវិនិយោគបរទេសទៅវិនិយោគដែរ។
តើអឺរ៉ុបអាចជ្រៀតជ្រែកកិច្ចការផ្ទៃក្នុងវៀតណាមបានទេ?
បើពិនិត្យលើកិច្ចព្រមព្រៀងដែលភាគីទាំងពីរចំណាយពេលតាំងពីឆ្នាំ២០១២ ដើម្បីជជែកគ្នា ហើយឈានដល់ដល់ការចុះហត្ថលេខាកាលពីថ្ងៃទី៣០ ខែមិថុនា ឆ្នាំ២០៩នេះ មិនមានកំណត់ពីលក្ខខណ្ឌប៉ះពាល់ដល់កិច្ចការផ្ទៃក្នុងនោះទេ។
លក្ខខណ្ឌគោលមួយចំនួនដែលសហភាពអឺរ៉ុបកំណត់ជាគោលនោះរួមមាន ត្រូវធានានូវការគោរពកម្មសិទ្ធិបញ្ញាលើផលិតផល លក្ខខណ្ឌសិទ្ធិមនុស្ស បរិស្ថាន និងលក្ខខណ្ឌគ្រប់គ្រងអនាម័យតាមបែបបច្ចេកទេស ជាដើម។
ដូច្នេះ នៅក្នុងលក្ខខណ្ឌនៃការព្រមព្រៀងមិនបានផ្តល់សិទ្ធិពិសេសណាមួយដល់សហភាពអឺរ៉ុបជ្រៀតជ្រែកចូលកិច្ចការផ្ទៃក្នុងវៀតណាមនោះទេ។ ចំណែកអឺរ៉ុបក៏ត្រូវរក្សាតម្លៃរបស់ខ្លួនក្នុងការគោរពទៅតាមកិច្ចព្រមព្រៀងដែរ។
ម្យ៉ាងទៀត ធម្មនុញ្ញនៃអង្គការសហប្រជាជាតិ ច្បាប់អន្តរជាតិ និងស្ថាប័នអន្តរជាតិផ្សេងៗទៀតក៏មិនបណ្តោយឱ្យសហភាពអឺរ៉ុបអាចជ្រៀតជ្រែកចូលកិច្ចការផ្ទៃក្នុងប្រទេសណាមួយដោយសេរីនោះទេ។
កត្តាសំខាន់បំផុតនោះគឺ វៀតណាមខ្លួនឯងមិនបណ្តោយឱ្យមានការជ្រៀតជ្រែកចូលកិច្ចការផ្ទៃក្នុងណាមួយនោះទេ។ បច្ចុប្បន្ន វៀតណាមដឹកនាំដោយគណបក្សតែមួយ រឹតបន្តឹងខ្លាំងលើក្រុមដែលមាននិន្នាការប្រឆាំងនយោបាយរបស់បក្សកុម្មុយនីស្តវៀតណាម ដែលបារម្ភបំផុតការបែកបាក់ផ្ទៃក្នុង។
បើនិយាយពីសង្គ្រាមប្រឆាំងមហាអំណាចវិញ គឺវៀតណាមធ្លាប់លេចមុខលើឆាកអន្តរជាតិដែរ គឺវៀតណាមធ្វើសង្គ្រាមបណ្តេញបារាំងចេញពីប្រទេស ដើម្បីទាមទារឯករាជ្យពីឆ្នាំ១៩៤៦ ដល់១៩៥៤។ វៀតណាមធ្វើសង្គ្រាមបណ្តេញអាមេរិកចេញពីប្រទេស ដើម្បីបង្រួបបង្រួមជាតិចន្លោះពីឆ្នាំ១៩៥៥ ដល់ឆ្នាំ១៩៧៥។
សង្គ្រាមទាំងពីរលើក ទាំងជាមួយបារាំង ទាំងជាមួយសហរដ្ឋអាមេរិក បើទោះជាវៀតណាមត្រូវបាត់បង់មនុស្សរាប់លាននាក់ និងធនធានច្រើន ប៉ុន្តែ វៀតណាមសុទ្ធតែទទួលជ័យជម្នះរហូត។
ដូច្នេះ បើពិនិត្យលើលក្ខខណ្ឌនៃកិច្ចព្រមព្រៀង និងគោលជំហរផ្ទាល់ខ្លួនរបស់វៀតណាម រួមទាំងភាពបត់បែននយោបាយការទូតលើឆាកអន្តរជាតិផងនោះ សហភាពអឺរ៉ុបមិនមានបំណង និងមិនអាចជ្រៀតជ្រែកកិច្ចការផ្ទៃក្នុងរបស់វៀតណាមបាននោះទេ។