ក្រសួងសុខាភិបាល បានប្រកាសថា អ្នកជំងឺឆ្លងវីរុសកូរ៉ូណាម្នាក់ទៀត ត្រូវបានព្យាបាលជាសះស្បើយ ដែលធ្វើឱ្យចំនួនអ្នកជាសះស្បើយពីជំងឺនេះកើនដល់ ១២៤នាក់ ខណៈអ្នកជំងឺ ២នាក់ទៀតកំពុងស្ថិតនៅក្រោមការព្យាបាលនៅឡើយ។
ក្នុងសេចក្តីជូនព័ត៌មានរបស់ខ្លួននៅថ្ងៃនេះ ក្រសួងសុខាភិបាលឱ្យដឹងថា បុរសជនជាតិខ្មែរអាយុ ២៦ឆ្នាំ រស់នៅភូមិរកាពរ៥ ស្រុកត្បូងឃ្មុំ ខេត្តត្បូងឃ្មុំ ជាសិស្សដែលបានវិលត្រឡប់មកពីប្រទេសថៃ ឆ្លងកាត់ច្រកព្រំដែនអូរបីជាន់ចូលមកក្នុងខេត្តបន្ទាយមានជ័យ ត្រូវបានក្រុមគ្រូពេទ្យព្យាបាលជាសះស្បើយ បន្ទាប់ពីធ្វើតេស្តអវិជ្ជមានវិរុសកូវីដ-១៩ ចំនួន ០២ដង។
បច្ចុប្បន្ន បុរសរូបនោះ ត្រូវបានអនុញ្ញាតឱ្យចេញពីមន្ទីរពេទ្យមិត្តភាពកម្ពុជា-ជប៉ុនមង្គលបុរី នៃខេត្តបន្ទាយមានជ័យ។
គិតត្រឹមថ្ងៃទី០៨ ខែមិថុនានេះ អ្នកកំពុងសម្រាកព្យាបាលនៅក្នុងមន្ទីរពេទ្យមិត្តភាពខ្មែរ-សូវៀត មានចំនួន ២នាក់ រួមមាន បុរសជនជាតិខ្មែរម្នាក់ ដែលបានវិលត្រឡប់មកពីប្រទេសហ្វីលីពីន និងបុរសជនជាតិខ្មែរ-បារាំងម្នាក់ទៀត ដែលបានវិលត្រឡប់មកពីប្រទេសបារាំង៕