មន្ត្រីអង្គការសុខភាពពិភពលោក (WHO) បានឱ្យដឹងនៅថ្ងៃអង្គារម្សិលមិញថា ប្រទេសនានាគួរតែពិចារណាក្នុងការណែនាំឱ្យអ្នកដំណើរទាំងឡាយពាក់ម៉ាស់ សម្រាប់ជើងហោះហើររយៈចម្ងាយឆ្ងាយ ខណៈវីរុសកូវីដ-១៩ បំប្លែងខ្លួនថ្មីចុងក្រោយ មានការរីករាលដាលយ៉ាងឆាប់រហ័សនៅសហរដ្ឋអាមេរិក។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងក្នុងសន្និសីទសារព័ត៌មានមួយ មន្ត្រីអង្គការសុខភាពពិភពលោក និងអឺរ៉ុប បានបន្ថែមថា វីរុសកូវីដ-១៩ បំប្លែងថ្មីប្រភេទ XBB.1.5 នេះក៏ត្រូវបានរកឃើញថាមានការកើនឡើងនៅតំបន់អឺរ៉ុបផងដែរ បើទោះបីជាស្ថិតក្នុងចំនួនតិចតួចក៏ដោយ។
ទាក់ទិននឹងករណីនេះ មន្ត្រីសង្គ្រោះបន្ទាន់ជាន់ខ្ពស់របស់អង្គការសុខភាពពិភពលោក ប្រចាំនៅទ្វីបអឺរ៉ុប លោកស្រី Catherine Smallwood បន្តថា អ្នកដំណើរគួរតែត្រូវបានណែនាំឱ្យពាក់ម៉ាស់នៅក្នុងទីតាំងដែលមានហានិភ័យខ្ពស់ ដូចជាការហោះហើរក្នុងរយៈចម្ងាយឆ្ងាយ។
លោកស្រីបន្ថែមថា៖ «សកម្មភាពនេះក៏គួរតែត្រូវបានដាក់ជាការណែនាំមួយសម្រាប់អ្នកដំណើរដែលមកពីគ្រប់ទីតាំងដែលមានការឆ្លងរីករាលដាលខ្ពស់នៃវីរុសកូវីដ-១៩ ផងដែរ»។
យោងតាមអ្នកជំនាញផ្នែកសុខាភិបាល វីរុសកូវីដ-១៩ បំប្លែងខ្លួនថ្មីប្រភេទ XBB.1.5 ដែលអាចចម្លងក្នុងរយៈពេលយ៉ាងឆាប់រហ័សមានចំនួន ២៧,៦% នៃករណីកូវីដ-១៩ សរុបនៅសហរដ្ឋអាមេរិក គិតត្រឹមថ្ងៃទី៧ ខែមករា។
ទោះជាយ៉ាងណា មិនទាន់មានការបញ្ជាក់ច្បាស់លាស់ណាមួយ ថាតើវីរុសកូវីដ-១៩បំប្លែងខ្លួនថ្មីនេះនឹងបង្កឱ្យមានរលកនៃការឆ្លងជាសកល ឬយ៉ាងណានោះទេ ខណៈអ្នកជំនាញបន្តអះអាងថា វ៉ាក់សាំងនាពេលបច្ចុប្បនេះនៅតែដើរតួនាទីសំខាន់ក្នុងការការពារប្រឆាំងនឹងរោគសញ្ញាធ្ងន់ធ្ងរ ការចូលសម្រាកព្យាបាលនៅមន្ទីរពេទ្យ និងការស្លាប់។
គួរបញ្ជាក់ថា ករណីឆ្លងជំងឺកូវីដ-១៩ នៅទូទាំងពិភពលោក គិតរហូតមកដល់ពេលបច្ចុប្បន្ននេះ មានចំនួនប្រមាណជា ៦៦៥លានករណី ខណៈអ្នកស្លាប់ដោយសារជំងឺនេះមានចំនួនជាង៦លាននាក់៕
