ក្រសួងសុខាភិបាលប្រកាសថា បានរកឃើញអ្នកផ្ទុកមេរោគកូវីដ១៩ចំនួន ២នាក់ទៀត ដែលត្រឡប់មកពីប្រទេសឥណ្ឌូណេស៊ី ធ្វើឱ្យចំនួនអ្នកមានកូវីដ១៩នៅកម្ពុជាកើនឡើងដល់ចំនួន ១២៨នាក់។
ក្នុងសេចក្តីប្រកាសព័ត៌មាននៅថ្ងៃទី១៤ ខែមិថុនានេះ ក្រសួងសុខាភិបាលបញ្ជាក់ថា អ្នកដែលទើបរកឃើញមានផ្ទុកមេរោគកូវីដ១៩នេះ ជាបុរសជនជាតិខ្មែរអាយុ ២៩ឆ្នាំ និងបុរសជនជាតិខ្មែរអាយុ ២២ឆ្នាំ មានអាស័យដ្ឋាននៅខេត្តកំពង់ចាមទាំងពីរនាក់ ហើយជាអ្នកធ្វើដំណើរមកពីប្រទេសឥណ្ឌូនេស៊ីតាមជើងហោះហើរត្រង់មកកម្ពុជា កាលពីថ្ងៃទី១២ ខែមិថុនា ឆ្នាំ២០២០ ទទួលបានលទ្ធផលតេស្តវិជ្ជមានកូវីដ១៩។
ក្រសួងបញ្ជាក់ថា បច្ចុប្បន្ននេះ អ្នកសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត មានចំនួន ៣នាក់ ដែលក្នុងនោះមានបុរសជនជាតិខ្មែរ១នាក់ ដែលវិលត្រឡប់មកពីប្រទេសហ្វីលីពីន និងបុរសជនជាតិខ្មែរ ២នាក់ទៀត ត្រឡប់មកពីប្រទេសឥណ្ឌូនេស៊ី។
អ្នកមានកូវីដ១៩គិតមកត្រឹមថ្ងៃទី១៤ ខែមិថុនា ឆ្នាំ២០២០នេះ មានចំនួន ១២៨នាក់ក្នុងនោះ ស្រ្តី៣៩នាក់។ ក្នុងចំណោមអ្នកដែលមានកូវីដ១៩ទាំងនេះ ក្រសួងព្យាបាលជាចំនួន ១២៥នាក់ និងនៅសល់បុរសជនជាតិខ្មែរចំនួន ៣នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត៕
