ភាគីវៀតណាមអះអាងថា ស្ថាប័នមួយចំនួនរបស់វៀតណាមកំពុងសម្រួលដល់ការវិលត្រឡប់របស់និស្សិតកម្ពុជាឲ្យទៅបន្តការសិក្សានៅប្រទេសវៀតណាមនាពេលឆាប់ៗខាងមុខនេះ។
ទំព័រហ្វេសប៊ុករបស់អគ្គរដ្ឋទូតវៀតណាមប្រចាំកម្ពុជា បានដកស្រង់សម្តីរបស់អគ្គរដ្ឋទូត វ៉ូ ក្វាង មិញ កាលពីម្សិលមិញថា ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសង្គមនិយមវៀតណាមប្រចាំនៅព្រះរាជាណាចក្រកម្ពុជា វ៉ូ ក្វាង មិញ បានជួបពិភាក្សាការងារជាមួយនឹងលោកជំទាវ អ៊ាត សោភា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា។
នៅក្នុងជំនួបនោះ ភាគីវៀតណាមបានអះអាងថា គ្រប់ស្ថាប័នដែលមានការពាក់ព័ន្ធរបស់វៀតណាម ជាពិសេសគឺខេត្តតៃនិញ ក្នុងការសម្រួលជូនដល់ការវិលត្រឡប់មកវៀតណាមដើម្បីបន្តការសិក្សារបស់និស្សិតកម្ពុជានាពេលឆាប់ៗខាងមុខនេះ។
ខ្លឹមសារលើហ្វេសប៊ុកឲ្យដឹងថា៖ «គ្រប់ស្ថាប័នដែលមានការពាក់ព័ន្ធរបស់វៀតណាមកំពុងខិតខំអស់ពីកម្លាំងកាយចិត្តដើម្បីសម្រួលដល់ការវិលត្រឡប់មកវៀតណាមវិញរបស់និស្សិតកម្ពុជាអោយបានឆាប់បំផុតតាមដែលអាចធ្វើបាន»។
ប៉ុន្តែ រហូតមកដល់ពេលបច្ចុប្បន្ននេះ ភាគីវៀតណាមមិនទាន់ចេញសេចក្តីជូនដំណឹងជាផ្លូវការអំពីពេលវេលាជាក់ស្តែងនៃការទទួលនិស្សិតកម្ពុជាវិលត្រឡប់ទៅរៀនមហាវិទ្យាល័យនៅវៀតណាមវិញនាពេលខ្លីខាងមុខនោះទេ។
បន្ថែមពីនេះ ភាគីទាំងពីរបានពិភាក្សាជាមួយគ្នា ដើម្បីស្វែងរកវិធានការនានាសំរាប់ជំរុញចំណងទំនាក់ទំនងកិច្ចសហប្រតិបត្តិការទ្វេភាគីកម្ពុជា-វៀតណាមក្នុងបរិបទប្រទេសទាំងពីរកំពុងមានលទ្ធផលល្អក្នុងការគ្រប់គ្រងស្ថានភាពជំងឺកូវីដ១៩ និងរៀបចំឡើងវិញនូវកិច្ចប្រជុំគណៈកម្មការចម្រុះកម្ពុជា-វៀតណាមលើកទី១៨ និងកិច្ចប្រជុំបណ្តាខេត្តជាប់ព្រំដែនកម្ពុជា-វៀតណាមលើកទី១១ ដែលកំពុងមានការខកខានដោយសារការរាតត្បាតនៃជំងឺកូវីដ១៩ ផងដែរ៕
