សកម្មភាពវៀតណាមមិនរាថយទេក្នុងការរៀបចំទីតាំងកងកម្លាំងប្រដាប់អាវុធរបស់ខ្លួននៅតាមតំបន់ព្រំដែនកន្លែងដែលមិនទាន់ឯកភាពគ្នា បើទោះជាមានការជំទាស់ពីកម្ពុជាជាបន្តបន្ទាប់ក៏ដោយ។ សកម្មភាពនេះនាំឱ្យមានទស្សនៈខ្វែងគ្នាក្នុងសង្គមខ្មែរលើបញ្ហាព្រំដែនដែលធ្លាប់មានពីមុនមកហាក់កើនឡើងមួយកម្រិតទៀត។
កងទ័ពវៀតណាមបានបោះតង់ចំនួន២៥៦កន្លែងនៅក្បែរៗតំបន់ព្រំដែន ទាំងកន្លែងឯកភាពគ្នានិងកន្លែងដែលមិនទាន់ឯកភាពគ្នា។ ភាគីវៀតណាមអះអាងថា ការបង្កើតទីតាំងយោធានេះគឺដើម្បីទប់ស្កាត់ការឆ្លងរាលដាលមេរោគកូវីដ១៩។
ប៉ុន្តែហេតុផលរបស់វៀតណាម កម្ពុជាមិនទទួលយកទេ ហើយទាមទារឱ្យរុះរើតង់ទាំងនោះចេញវិញ។ រហូតដល់ថ្ងៃទី១ ខែមិថុនា កម្ពុជាបានកោះហៅឯកអគ្គរដ្ឋទូតវៀតណាមប្រចាំកម្ពុជា សាកសួររឿងនេះ ហើយនៅតែទាមទារឱ្យវៀតណាមរុះតង់ទាំងនោះចេញវិញឱ្យបានឆាប់ ដើម្បីរៀបចំព្រំដែនឱ្យទៅជាកន្លែងសន្តិភាព កិច្ចសហប្រតិបត្តិការ និងអភិវឌ្ឍន៍។
ជាលទ្ធផល វៀតណាមមិនត្រឹមតែមិនរុះរើតាមការទាមទាររបស់កម្ពុជានោះទេ គឺនៅថ្ងៃទី២៥ ខែសីហា វៀតណាមចាប់ផ្តើមដូរពីការបោះតង់ទៅជាសំណង់រឹងមាំថែមទៀត ស្ថិតនៅភូមិភូវី ឃុំកូឡូក ស្រុកទិនចូវ ខេត្តអាងយ៉ាង ទល់នឹងភូមិ-ឃុំក្អមសំណ ស្រុកលើកដែក ខេត្តកណ្ដាល។
ការរៀបចំទីតាំងរបស់យោធាវៀតណាមនៅតាមព្រំដែននេះ ធ្វើឱ្យគំនិតខ្វែងគ្នានៅក្នុងសង្គមខ្មែរលើស្ថានភាពព្រំដែនហាក់កើនឡើងថែមមួយកម្រិតទៀត។
គំនិតពលរដ្ឋខ្មែរមួយក្រុមទាំងនៅក្នុងនិងក្រៅប្រទេស ចោទសកម្មភាពវៀតណាមនេះថា ជាចេតនាឈ្លានពាននិងត្រៀមលក្ខណៈឈ្លានពានបន្ត។ ក្រុមនេះទាមទារឱ្យមានការប្តឹងទៅតុលាការអន្តរជាតិឬស្វែងរកយន្តការដោះស្រាយជាលក្ខណៈអន្តរជាតិ។
ប្រធានចលនានិស្សិតដើម្បីលទ្ធិប្រជាធិបតេយ្យ លោក ទូច វិបុល ចាត់ទុកថា វៀតណាមកំពុងឈ្លានពានកម្ពុជា ហើយមានផែនការយកប្រទេសកម្ពុជាទាំងមូល។
លោកជំរុញឱ្យលោកនាយករដ្ឋមន្ត្រី ហ៊ុន សែន ទទួលខុសត្រូវនិងដាក់បញ្ហានេះទៅសហគមន៍អន្តរជាតិឱ្យជួយដោះស្រាយ។
លោក ទូច វិបុល៖ «ជាលក្ខណៈផ្លូវការ យើងចង់ឃើញរដ្ឋាភិបាលដាក់ពាក្យជាផ្លូវការទៅសមាគមអាស៊ាន ក៏ដូចជាធ្វើកំណត់ហេតុទៅអង្គការសហប្រជាជាតិផងដែរ។ រឿងទាំងអស់នេះមានសារៈសំខាន់ដែលរដ្ឋាភិបាលត្រូវធ្វើនៅជំហានបន្ត»។
ពាក់ព័ន្ធជាមួយករណីព្រំដែន គឺរដ្ឋាភិបាលបានចាប់ខ្លួនលោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា និងលោក សួង សុភ័ណ្ឌ ប្រធានគណបក្សខ្មែរឈ្នះ ទាក់ទងការអត្ថាធិប្បាយលើករណីព្រំដែនកម្ពុជាវៀតណាម ត្រង់ចំណុចខេត្តត្បូងឃ្មុំ។ ក្រោយមកក៏មានការចាប់ខ្លួនយុវជនជាបន្តបន្ទាប់ទៀតដែលតវ៉ាទាមទារឱ្យដោះលែងលោក រ៉ុង ឈុន។
ក្រុមយុវជនដែលតវ៉ាទាមទារឱ្យដោះលែងលោក រ៉ុង ឈុន ក៏ធ្លាប់បានរិះគន់រដ្ឋាភិបាលថា អសមត្ថភាពក្នុងការការពារបូរណភាពទឹកដី ដោយមិនមានវិធានការច្បាស់លាស់ករណីវៀតណាមបោះតង់នៅតំបន់មិនទាន់ឯកភាពគ្នាជាដើម។
ក្រុមយុវជនដែលគាំទ្រអតីតបក្សសង្គ្រោះជាតិ កំពុងជម្លៀសខ្លួនទៅប្រទេសថៃ ក៏បានថ្លែងសារថ្កោលទោសជាបន្តបន្ទាប់លើការចាប់ខ្លួនអ្នករិះគន់លើបញ្ហាព្រំដែន និងករណីវៀតណាមបោះតង់នៅតំបន់មិនទាន់ឯកភាពគ្នា។ យុវជនទាំងនោះក៏ប្រកាសពីផែនការវិលចូលកម្ពុជាវិញដឹកនាំបាតុកម្មប្រឆាំងរដ្ឋាភិបាល ទាក់ទងការចាប់ខ្លួនអ្នករិះគន់លើបញ្ហាព្រំដែន។
នៅលើបណ្តាញសង្គមហ្វេសប៊ុក ក៏មានការកាត់តរូបភាពសកម្មភាពដែលកងទ័ពកម្ពុជាកាន់អាវុធដើរបង្ហាញតាមផ្លូវសាធារណៈជាក្បួនមុនថ្លៃលោក សម រង្ស៊ី ប្រកាសចូលប្រទេសវិញកាលពីថ្ងៃទី៩ ខែវិច្ឆិកា ឆ្នាំ២០១៩ និងករណីកងកម្លាំងកម្ពុជាទៅចរចាជាមួយកងទ័ពវៀតណាមដោយដៃទទេ ដើម្បីស្នើសុំឱ្យរុះរើតង់។ ដោយអ្នកប្រើប្រាស់ហ្វេសប៊ុកទាំងនោះចោទថា កងកម្លាំងទាំងនេះខ្លាំងបានតែជាមួយខ្មែរគ្នាឯងឬអ្នកតវ៉ាដោយសន្តិវិធី។
សម្រាប់លោកនាយករដ្ឋមន្ត្រី ហ៊ុន សែន លើកឡើងថា បញ្ហាព្រំដែនមិនអាចចេះតែរិះគន់ឬអត្ថាធិប្បាយដោយគ្មានមូលដ្ឋានច្បាស់លាស់នោះទេ ព្រោះវាអាចបង្កទៅជាសង្គ្រាមជាមួយប្រទេសជិតខាង។ កាលពីថ្ងៃទី១៦ ខែសីហា លោកព្រមានចាប់ខ្លួនទាំងអស់ចំពោះអ្នកដែលបន្តរិះគន់លើបញ្ហាព្រំដែន។
លោក ហ៊ុន សែន៖ «សូមផ្ញើសារ ចេញប៉ុន្មាន ចាប់ប៉ុណ្ណឹង! គឺចាប់ប៉ុណ្ណឹង រឿងទល់ដែនគឺអត់មានឱ្យរញ៉េរញ៉ៃទេ។ កុំថារដ្ឋាភិបាល ហ៊ុន សែន ផ្តាច់ការ នេះមិនមែនជាការតស៊ូមតិទេ។ អ្នកខ្លះថា នេះជាការតស៊ូមតិ អត់តស៊ូមតិទេ! នេះជារឿងផ្លូវច្បាប់សុទ្ធសាធ»។
លោកនាយករដ្ឋមន្ត្រីបញ្ជាក់ទៀតថា រដ្ឋាភិបាលកម្ពុជាបានធ្វើកិច្ចការព្រំដែនដោយមានអ្នកជំនាញច្បាស់លាស់ មិនបណ្តោយឱ្យភាគីកម្ពុជាខាតបង់នោះទេ។
ទោះជាលោកនាយករដ្ឋមន្ត្រីព្រមានចាប់ខ្លួនឬមានការបកស្រាយយ៉ាងណាក៏ដោយ ក៏សកម្មភាពនៃការរិះគន់លើបញ្ហាព្រំដែនលើបណ្តាញសង្គម ទាំងអ្នករស់នៅក្នុងប្រទេសនិង រស់នៅក្រៅប្រទេស នៅតែបន្តមាន។
ចំពោះការអះអាងរបស់ភាគីវៀតណាម បញ្ជាក់ថា ដើម្បីការពារករណីឆ្លងរាលដាលមេរោគកូវីដ១៩នោះ នៅមិនទាន់មានភាពច្បាស់លាស់នៅឡើយ ដោយចាប់តាំងពីការបោះតង់ចំនួន២៥៦តង់រាប់ខែមកហើយនោះ វៀតណាមមិនបានបង្ហាញរបាយការណ៍ករណីដែលទប់ស្កាត់ការឆ្លងរាលដាលកូវីដ១៩បានប៉ុន្មានករណីនោះទេ។
ចំពោះការរុះរើវិញ ពេលណាច្បាស់លាស់ក៏ខាងវៀតណាមមិនបានកំណត់ដែរ ដោយថា រង់ចាំជំងឺកូវីដ១៩ឈប់ឆ្លងរាលដាល។ ចុះបើការឆ្លងរាលដាលនៅបន្តរាប់ឆ្នាំទៀត វៀតណាមនៅតែបន្តរក្សាទីតាំងយោធានេះដដែលឬប្រែក្លាយទៅជាសំណង់អ្វីផ្សេងទៀត? ចំពោះដំណើរការស្វែងរកដំណោះស្រាយគឺរយៈពេល២ទៅ៣ខែចុងក្រោយនេះ ភាគីកម្ពុជាបានធ្វើកំណត់ទូត ក៏ដូចជាកោះហៅឯកអគ្គរដ្ឋទូតវៀតណាមសាកសួរផ្ទាល់ តែមិនទាន់មានដំណោះស្រាយនៅឡើយ។
បើករណីបញ្ហាព្រំដែននៅតែអូសបន្លាយយូរទៅមុខទៀត អាចនឹងនៅតែមានឥទ្ធិពលលើជម្លោះខ្វែងគំនិតគ្នានៅក្នុងសង្គមខ្មែរ កើនឡើងខ្លាំងដល់កម្រិតណាឬថយចុះវិញនោះ មិនទាន់មានអ្នកអាចសន្និដ្ឋានបាននៅឡើយ៕
