សំរាមជាប្រធានបទចាស់ដែលត្រូវបានសាធារណជនលើកយកមកជជែកសារជាថ្មីវិញយ៉ាងផុសផុល ក្រោយពេលដែលកម្មករសម្អាតរាជធានីតវ៉ាដោយផ្អាកការងារ ហើយស្របពេលដែលជំនន់ទឹកភ្លៀងកើតឡើង នាំឱ្យតំបន់ខ្លះក្នុងរាជធានីអណ្តែតសំរាមពាសពេញផ្លូវ។
នៅក្នុងរាជធានីភ្នំពេញប៉ុន្មានសប្តាហ៍ចុងក្រោយនេះ មានសំរាមនៅតាមដងផ្លូវនានា ទាំងផ្លូវតូចនិងផ្លូវធំ។ នៅក្នុងរាជធានី ទោះជាកម្មករប្រមូលសំរាមរាល់ថ្ងៃផង វានៅតែចោទជាបញ្ហា ដល់ពេលផ្អាកការប្រមូលរាប់សប្តាហ៍នេះ វាកាន់តែចោទជាបញ្ហាខ្លាំងឡើងមួយកម្រិតទៀត ដែលស្ទើរតែមិនអាចនឹកស្មានដល់។
មួយរយៈនេះ ពលរដ្ឋរស់នៅភ្នំពេញមួយចំនួនដែលបានថតសំរាមនៅតំបន់ដែលពួកគេរស់នៅមកផ្សព្វផ្សាយលើបណ្តាញសង្គម ហើយភ្ជាប់ជាមួយសារហួសចិត្តនិងបារម្ភពីមេរោគដែលបង្កឡើងដោយសំរាមទាំងនេះ។
ពីមុន សំរាមក្នុងរាជធានីស្អុយតែនៅជិតកន្លែងគរសំរាមឬស្អុយតែនៅពេលរថយន្តដឹកសំរាមបានទៅដល់ ដោយសារការវេចខ្ចប់មិនបានត្រឹមត្រូវ ប៉ុន្តែក្រោយពេលភ្លៀងលិច ហើយសំរាមអណ្តែតលើផ្លូវនោះ ក្លិនស្អុយងំកើតមានស្ទើរគ្រប់ផ្លូវ បើទោះជាទឹកស្រកវិញ ហើយសំរាមប្រមូលអស់ក៏ដោយ ព្រោះទឹកហូរចេញពីសំរាមនៅតែដក់ជាប់នៅលើផ្លូវ។
បើនិយាយពីបញ្ហាសំរាមនៅកម្ពុជា មិនមែនមាននៅតែរាជធានីភ្នំពេញ និងទើបតែកើតមានប៉ុន្មានសប្តាហ៍ពេលដែលកម្មករតវ៉ាទាមទារផលប្រយោជន៍តាមកិច្ចសន្យានោះទេ គឺកើតឡើងរាប់ឆ្នាំមកហើយ។
បដារបស់អាជ្ញាធរដែនដី ក៏ដូចជារបស់ក្រុមហ៊ុនឯកជន មានជាហូរហែដែលបញ្ជាក់ថា ហាមចាក់សំរាម ឬចាក់សំរាមត្រូវផាកពិន័យជាប្រាក់ពី២០ ០០០ទៅ១០០ ០០០រៀល ឬកន្លែងខ្លះដាក់សារតិះដៀលអ្នកយកសំរាមទៅចោលដោយមិនមានរបៀបរៀបរយ ជាដើម។
ប៉ុន្តែជាក់ស្តែង ការចោលសំរាមគ្មានរបៀបនៅតែមានច្រើន រហូតមានយុវជនមួយក្រុមដាក់ឈ្មោះខ្លួនឯងថាជា«យុវជនសំរាម» ដើម្បីផ្សព្វផ្សាយពីផលប៉ះពាល់នៃសំរាម និងបានធ្វើសកម្មភាពប្រមូលសំរាមដូចជានៅប្រឡាយបឹងត្របែកក្នុងរាជធានីភ្នំពេញជាដើម។
ចំណែកនៅតាមបណ្តាខេត្តឬក្រុងនានា ទោះមានក្រុមហ៊ុនប្រមូលសំរាមឬមិនមានក្រុមហ៊ុន ប្រមូលសំរាម ក៏ឃើញមានការចោលសំរាមគ្មានសណ្តាប់ជាហូរហែដែរ ដូចជា ការចាក់សំរាមចូលបឹង ស្ទឹង ព្រែក ទន្លេ ឬសមុទ្រជាដើម។
រមណីយដ្ឋានបែបធម្មជាតិនានា ក៏មានការចោលសំរាមរាយប៉ាយក្លាយជារឿងធម្មតា ក្រោយពេលមានមនុស្សនាំគ្នាទៅលេងទីនោះមានចំនួនច្រើន។
ឥទ្ធិពលលើវិស័យទេសចរណ៍
ជាតិជាមនុស្ស ទោះជាជនបរទេសឬជនជាតិខ្មែរក៏ដោយ គ្មានអ្នកណាម្នាក់ចង់ដើរកម្សាន្តទៅកន្លែងដែលមានការចោលសំរាមច្រើននោះទេ។ បើអ្នកទេសចរទៅដល់កន្លែងគោលដៅរបស់ពួកគេ ហើយឃើញមានសំរាមច្រើន អ្នកខ្លះសម្រេចលែងទៅកន្លែងនោះលើកក្រោយ ហើយអ្នកខ្លះទៀតថតរូបយកទៅផ្សព្វផ្សាយតាមបណ្តាញសង្គមទៀតផង។
ក្នុងសម័យបច្ចេកវិទ្យាទំនើប សំរាមដែលអណ្តែតលើផ្លូវក្នុងរាជធានីភ្នំពេញជាបេះដូងប្រទេសពេលភ្លៀងលិចនេះ មិនមែនមើលឃើញតែនៅក្នុងប្រទេសកម្ពុជានោះទេ កឺត្រូវបានផ្សព្វផ្សាយនិងមើលឃើញនៅទូទាំងពិភពលោក តាមរយៈបណ្តាញទំនាក់ទំនងសង្គមហ្វេសប៊ុក ធ្វីតធ័រ ឬ យូធូប ជាដើម។
នៅក្នុងពិធីមួយនៅស្រុកកៀនស្វាយ ខេត្តកណ្តាល កាលពីថ្ងៃទី០៧ ខែតុលា លោកនាយករដ្ឋមន្ត្រីបានលើកឡើងពីផលប្រយោជន៍នៃវិស័យទេសចរណ៍ជួយមួយផ្នែកធំដល់សេដ្ឋកិច្ច ហើយទាំងរដ្ឋាភិបាលកម្ពុជានិងប្រទេសផ្សេងៗទៀតកំពុងតែយកចិត្តទុកដាក់។
លោក ហ៊ុន សែន៖ «បានជាពិភពលោកគេប្រឹងឃោសនាខ្លាំងណាស់ គេប្រឹងបង្កើនឡើងផលិតផលទេសចរណ៍ ដើម្បីទាក់ទាញទេសចរពីក្រៅប្រទេសឱ្យចូលក្នុងប្រទេសរបស់គេ។ កម្ពុជាក៏ដូចគ្នាដែរ យើងមានអង្គរវត្តមួយមិនគ្រប់គ្រាន់ទេ យើងត្រូវផលិតឡើងនូវផលិតផលទេសចរណ៍ថែមទៀត»។
សុខភាព
ស្ថានភាពសំរាមនៅពេលដែលទុកដាក់មិនមានរបៀប ហើយមិនមានការប្រមូលទៀតនោះ ពេលមានជំនន់កើតឡើង សំរាមឬទឹកដែលហូរចេញពីសំរាម ហូរចូលផ្ទះប្រជាពលរដ្ឋ ហូរចូលបឹង ស្ទឹងទន្លេជាប្រភពទឹកដែលប្រជាពលរដ្ឋប្រើប្រាស់ ទាំងប្រើសម្រាប់បរិភោគនិងប្រើក្នុងតម្រូវការចាំបាច់ផ្សេងៗទៀត។
ក្រៅពីការបំពុលមនុស្ស សំរាមក៏បានក្លាយជាការបំពុលសត្វទាំងក្នុងទឹក លើគោក បំពុលបរិយាកាស និងធ្វើឱ្យខូចគុណភាពដីជាដើម។
សំរាមអាចបង្កជាជំងឺដូចជា អាសន្នរោគស្លាប់ភ្លាម ជំងឺសួត ផ្លូវដង្ហើម ឬជំងឺសើស្បែកជាដើម។ ផលប៉ះពាល់ទាំងនេះ ទាំងអ្នកចោលសំរាមនិងអ្នកគ្រប់គ្រងសំរាមសុទ្ធតែបានដឹង។
កិត្តិយស
ក្នុងការរស់នៅជាក់ស្តែង សំរាមក្រៅពីប៉ះពាល់ដល់សុខភាព វិស័យទេសចរណ៍ វាក៏បានប៉ះពាល់សំខាន់ដែរដល់កិត្តិយស។ តំបន់ដែលចោលសំរាមរាយប៉ាយ បង្ហាញថា ពលរដ្ឋនៅទីនោះមិនថ្លៃថ្នូរជាងសំរាមទេ ព្រោះទុកដាក់សំរាមមិនបានត្រឹមត្រូវ ហើយក៏បង្ហាញពីសមត្ថភាពអ្នកគ្រប់គ្រងនៅទីនោះដែរ ដែលមិនអាចរៀបចំការទុកដាក់សំរាមឱ្យបានត្រឹមត្រូវ។
ការចោលសំរាមក៏បង្ហាញពីភាពអាត្មានិយមនៅក្នុងសង្គមដែរ គឺដឹងថា សំរាមមានផលប៉ះពាល់មិនគិតរកមធ្យោបាយទុកដាក់ឱ្យបានត្រឹមត្រូវ បែរជាយកទៅចោលលើដីអ្នកដទៃឬចោលនៅទីតាំងសាធារណៈទៅវិញ។
ស្ត្រីដែលធ្វើការងារជាមួយក្រុមហ៊ុន ស៊ីនទ្រី ប្រមូលសំរាមសម្អាតរាជធានី ហើយចូលរួមតវ៉ានោះ លើកឡើងថា អ្វីដែលពួកគាត់កំពុងទាមទារនេះ គ្រាន់តែទាមទារផលប្រយោជន៍ដែលមានកំណត់ក្នុងច្បាប់និងកិច្ចសន្យា មិនបានលោភលន់នោះទេ។
ស្ត្រីជាកម្មការិនី៖ «ខ្ញុំចង់ឱ្យតែពួកគាត់ទូរទាត់លុយដំណាច់ឆ្នាំឱ្យពួកខ្ញុំ លុយថ្លៃបាយ លុយធ្វើដំណើរ អត់មានចង់បានទៅលោភលន់អីទេ តែប៉ុណ្ណឹងទៅ! ក្រុម[បុគ្គលិក]ស៊ីនទ្រីហ្នឹង ម្នាក់ៗមិនមែនចង់បាតុកម្មឬចង់បះបោរទេ ចង់ឱ្យចៅហ្វាយក្រុងហ្នឹងជួយដោះស្រាយកូនចៅឱ្យបានសម្រេចឱ្យពួកខ្ញុំទៅ គ្មានចង់បានអីទេ។»
ដើម្បីដោះស្រាយបញ្ហាសំរាមឱ្យបានប្រសើរឡើង ត្រូវបង្កើនការអប់រំឱ្យសាធារណជនចូលរួមទុកដាក់សំរាមឱ្យបានត្រឹមត្រូវ និង អាជ្ញាធរឬក្រុមហ៊ុនពាក់ព័ន្ធត្រូវបង្កើនប្រសិទ្ធភាពក្នុងការគ្រប់គ្រងនិងកែច្នៃសំរាម។ ចំពោះកម្មករប្រមូលសំរាម ក៏ត្រូវយកចិត្តទុកដាក់ផ្តល់អត្ថប្រយោជន៍ការងារដល់ពួកគាត់ ដូចការងារក្នុងវិស័យផ្សេងៗដែរ៕
