ក្រសួងព័ត៌មាន ស្នើឱ្យអាជ្ញាធរមានសត្ថកិច្ច ចាត់វិធានការច្បាប់ចំពោះអ្នកសារព័ត៌មានដែលប្រើតួនាទីទៅជំរិតទារប្រាក់ក្រោមរូបភាពជាថ្នូរមិនចុះផ្សាយនូវអ្វីដែលក្រសួងថា ដើម្បីទប់ស្កាត់ផលប៉ះពាល់មុខរបរពលរដ្ឋ និងសណ្តាប់ធ្លាប់សង្គម។
ក្រសួងនិយាយតាមលិខិតជូនដំណឹងចេញនៅថ្ងៃនេះថា អំឡុងពេលដែលរដ្ឋាភិបាលកំពុងអនុវត្តវិធាននានា ដើម្បីប្រយុទ្ធប្រឆាំងនឹងជំងីកូវីដ១៩ មានអ្នកសារព័ត៌មានមួយចំនួនតូច មិនបានបំពេញតួនាទីស្របតាមវិជ្ជាជីវៈទេ។
ក្រសួងថា អ្នកទាំងនោះឆ្លៀតឱកាសប្រើវិជ្ជាជីវៈ ផ្សព្វផ្សាយព័ត៌មានមិនពិត នាំឱ្យសាធារណជនយល់ខុស បង្ករឱ្យមានការភ័យខ្លាច ច្របូកច្របល់ រំខានដល់ការអនុវត្តតួនាទីរបស់អាជ្ញាធរមានសមត្ថកិច្ច ប៉ះពាល់សណ្តាប់ធ្លាប់សាធារណៈ និងការប្រកបអាជីវកម្មរបស់ប្រជាពលរដ្ឋ។
ក្រសួងបញ្ជាក់ថា ដូចជាការទទួលសំណូក ឬជម្រិតទារប្រាក់ជាថ្នូរនឹងការមិនផ្សព្វផ្សាយ ឬលុបព័ត៌មានដែលថា ជាប្រការមួយរំលោភយ៉ាងធ្ងន់ធ្ងរខាងផ្នែកវិជ្ជាជីវៈរបស់អ្នកសារព័ត៌មាន។
ក្រសួងសាមីមួយនេះ និយាយទៀតថា ដើម្បីលុបបំបាត់ភាពអសកម្មនេះ ខ្លួនគាំទ្រឱ្យអាជ្ញាធរប្រើប្រាស់សិទ្ធិរបស់ខ្លួនស្របតាមច្បាប់ និង«ស្នើអាជ្ញាធរមានសមត្ថកិច្ចចាត់វិធានការច្បាប់ដោយមិនចាំបាច់ជូនដំណឹងមកក្រសួងព័ត៌មានជាមុនឡើយ»។
ទោះជាយ៉ាងណា ក្រសួងព័ត៌មានមិនបានបញ្ជាក់ថា មានអ្នកសារព័ត៌មានប៉ុន្មាននាក់ នៅស្ថាប័នណាខ្លះពាក់ព័ន្ធនឹងការប្រើវិជ្ជាជីវៈនេះដើម្បីជំរិតទារប្រាក់ទៅលើក្រុមហ៊ុន ឬអ្នកធ្វើអាជីវកម្មណាមួយនោះទេ។
តែយ៉ាងណា ក្រសួងព័ត៌មានតាមរយៈអគ្គនាយកដ្ឋានព័ត៌មាន និងសោតទស្សន៍ បានកត់សម្គាល់ថា ស្ថាប័នសារព័ត៌មាន និងអ្នកសារព័ត៌មានភាគច្រើនលើសលប់ បានខិតខំបំពេញការងាររបស់ខ្លួនប្រកបដោយក្រមសីលធម៌វិជ្ជាជីវៈ និងផ្សព្វផ្សាយព័ត៌មានពិតជូនសារធារណជន និងបានរួមចំណែកជាមួយរដ្ឋាភិបាល ក្នុងាករចាត់វិធានការការទប់ស្កាត់ការរីករាលដាលនៃជំងឺរាតត្បាត ដើម្បីសេចក្តីសុខសាន្តរបស់ប្រជាពលរដ្ឋនិងការអភិវឌ្ឍរបស់ប្រទេស៕
