ពលរដ្ឋខ្មែរ និងអ្នកនយោបាយប្រឆាំងនៅអាមេរិកធ្វើបាតុកម្មទាមទារឱ្យរដ្ឋាភិបាលកម្ពុជាដោះលែងអ្នកទោសនយោបាយដែលកំពុងជាប់ពន្ធនាគារ ខណៈមន្រ្ដីរដ្ឋាភិបាលថា ការទាមទារនេះជារូបភាពបំភ័ន្ដភ្នែក។
អនុប្រធានគណបក្សសង្គ្រោះជាតិដែលត្រូវតុលាការកំពូលរំលាយលោកស្រី មូរ សុខហួ ប្រាប់ វីអូឌី នៅថ្ងៃចន្ទនេះថា ពលរដ្ឋខ្មែរនៅក្រៅប្រទេស ចាប់ផ្ដើមធ្វើយុទ្ធការឱ្យដោះលែងអ្នកទោសមនសិការដែលកំពុងជាប់ពន្ធនាគារនៅកម្ពុជា។
លោកស្រី មូរ សុខហួ បន្ដថា យុទ្ធនាការនេះចាប់ផ្ដើមបានពីរទីក្រុងរួចមកហើយ គឺទីក្រុងឡុងប៉ិច រដ្ឋ California និងទីក្រុង Lowell រដ្ឋMassachusetts ជារដ្ឋដែលមានពលរដ្ឋខ្មែររស់នៅច្រើនជាងគេនៅសហរដ្ឋអាមេរិក។ លោកស្រីថា សកម្មភាពនេះនឹងនៅតែបន្ដរហូតដល់មានការដោះលែងអ្នកទោសនយោបាយនៅកម្ពុជា។
លោកស្រី មូរ សុខហួ ថ្លែងថា៖ «យើងនឹងបន្ដ… បន្ដនូវយុទ្ធនាការនេះរហូតដល់ការដោះលែង សេង ធារី និងអ្នកទោសមនសិការដទៃទៀត»។
អនុប្រធានគណបក្សសង្គ្រោះជាតិដែលត្រូវតុលាការរំលាយរូបនេះ បន្ថែមថា ការធ្វើយុទ្ធនាការនេះ ក៏មានការជួបជុំគ្នាតាមប្រព័ន្ធអនឡានផងដែរ ដើម្បីឱ្យរដ្ឋពលខ្មែរទូទាំងសកលលោកអាចចូលរួមក្នុងយុទ្ធនាការនេះបាន។ បន្ថែមពីនេះ លោកស្រីថា ការធ្វើយុទ្ធនាការនេះដើម្បីបង្ហាញពីការសាមគ្គីភាពរវាងខ្មែរតែមួយ និងបង្ហាញពីការមិនពេញចិត្តចំពោះការដាក់ទោសអ្នកនយោបាយ និងសកម្មជនផ្សេងទៀត។
លោកស្រី មូរ សុខហួរ បន្ដថា ការធ្វើយុទ្ធនាការនេះធ្វើឡើងដើម្បីឱ្យពលរដ្ឋខ្មែរមានសិទ្ធិសេរីភាពក្នុងការបញ្ចេញមតិនិងដើម្បីទាមទារឱ្យមានការដោះលែងអ្នកទោសមនសិការដែលកំពុងជាប់ឃុំនៅកម្ពុជាឱ្យមានសេរីភាពឡើងវិញដោយឥតលក្ខខណ្ឌ។
លោកស្រី មូរ សុខហូរ បញ្ជាក់ថា៖ «យើងទាមទារឱ្យមានការដោះលែងជាបន្ទាន់ ដោយអត់លក្ខខណ្ឌនូវអ្នកទោសនយោបាយទាំងអស់ ហើយអ្នកទោសនយោបាយ យើងមិនសំដៅទៅតែសកម្មជន ឬសមាជិកគណបក្សសង្គ្រោះជាតិទេ អ្នកទោសនយោបាយគឺ អ្នកទោសដែលជាប់ពន្ធនាគារដោយអយុត្តិធម៌ ដោយសាររបបលោក ហ៊ុន សែន គឺបញ្ចប់សំឡេងបំបាត់សំឡេង អ្នកដែលហ៊ានតស៊ូ ការពារសិទ្ធិសេរីភាព ហ៊ាននិយាយការពិតទៅលើសភាពការណ៍ទាំងឡាយដែលប៉ះពាល់ផលប្រយោជន៍ពលរដ្ឋ ដល់សិទ្ធិពលរដ្ឋ ប៉ះពាល់ដល់ធនធានធម្មជាតិ»។
បន្ថែមពីនេះ លោកស្រី ឱ្យដឹងទៀតថា ការធ្វើយុទ្ធនាការនេះ ដើម្បីឱ្យពលរដ្ឋខ្មែរនៅក្រៅប្រទេសដឹងពីស្ថានភាពពិតនៅប្រទេសកម្ពុជានិង ដើម្បីយកញត្តិដាក់ទៅអភិបាលក្រុងនីមួយៗដែលពលរដ្ឋខ្មែររស់នៅ។
អ្នកនាំពាក្យគណបក្សប្រជាជន លោក សុខ ឥសាន បានប្រាប់ វីអូឌី នៅថ្ងៃចន្ទនេះថា ការធ្វើបាតុកម្មទាមទារឱ្យមានការដោះលែងមន្ត្រីគណបក្សប្រឆាំងនេះ ជារូបភាពបំភ័ន្តតែប៉ុណ្ណោះ។ ក្នុងន័យនេះ លោកថា ការចាប់ខ្លួនអ្នកទោសទាំងនោះ តុលាការមានហេតុផលនិងសំណុំរឿងច្បាស់លាស់ មិនមែនចេះតែកាត់សេចក្ដីនោះទេ។
លោក សុខ ឥសាន ថ្លែងថា៖ «អាហ្នឹង វាគ្រាន់តែរូបភាពនយោបាយ ធ្វើឱ្យវាគគ្រឹកគគ្រេងតែប៉ុណ្ណោះទេ រឿងវាកើតឡើងនៅស្រុកខ្មែរទេ ហើយវាមានពិរុទ្ធភាពហើយ បានជាត្រូវជាប់គុក អាហ្នឹងវាអ៊ីចឹង! តុលាការគេមានហេតុផល គេមានសំណុំរឿងច្បាស់លាស់ មានភស្តុតាងអីបានគេកាត់សេចក្ដី ហើយកាត់សេចក្ដីវាចូលជាស្ថាពរហើយ សាលក្រមហ្នឹង! ហើយរហូតទៅដល់ទោសពន្ធនាគារហើយ។អ៊ីចឹងចូលតាមណា វាត្រូវចេញតាមហ្នឹង! ឥឡូវចូលគុក ដោយសារតុលាការកាត់ក្ដី ហើយចង់ចេញពីគុក លុះត្រាតែតុលាការហ្នឹង កាត់សេចក្ដីយ៉ាងណាទៀត បានជាចេញបាន មិនមែនចូលគុក ដោយសារការធ្វើបាតុកម្មបានចូលគុក ហើយបន្ទាប់មកចេញពីគុកធ្វើបាតុកម្មនោះទេ»។
ទាក់ទិននឹងករណីនេះលោក សុខ ឥសាន បន្ថែមថា ទោះបីជាមានការធ្វើបាតុកម្មទាមទារយ៉ាងណា ក៏មិនអាចមានការលើកលែងទោសបានដែរ។ លោកបញ្ជាក់ថា កាលណាប្រព្រឹត្តល្មើសច្បាប់ តុលាការនឹងកាត់ក្ដីសម្រេចតាមនោះហើយ។
លោក សុខ ឥសាន មានប្រសាសន៍ថា ៖ «វាអត់មានទេ! កុំជឿតាមអ្នកនយោបាយអគតិមួយចំនួនកាលណាធ្វើ ប្រព្រឹត្តល្មើសច្បាប់ហើយ មានពិរុទ្ធភាពហើយ តុលាការគេកាត់អស់ហើយ ទោះបីបាតុកម្មយ៉ាងណាក៏ដោយ ក៏វាអត់រួចដែរ ហើយកុំចង់យកបញ្ហាដែលអត់រួចនោះ ធ្វើជាសភាពការនយោបាយអាប់អួរឆ្ពោះទៅរកការបោះឆ្នោតអី អត់ទេ»។
នាយកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ដំណោះស្រាយដ៏ល្អសម្រាប់រឿងនេះគឺ ការចរចា ឬប្រកាន់យកនូវវប្បធម៌នៃការសន្ទនាដូចដែលអ្នកនយោបាយជើងចាស់បានធ្វើកន្លងមក នៅពេលមានការជាប់គាំងវិបត្តិនយោបាយ។ ក្នុងន័យនេះ លោកថា ការចរចានឹងធ្វើឱ្យកាន់តែមានភាពប្រសើរឡើងរវាងភាគីពាក់ព័ន្ធទាំងអស់ផងដែរ។
លោក អំ សំអាត ថ្លែងថា៖ «អ៊ីចឹងចំណុចទាំងអស់ហ្នឹង យើងយល់ហើយថា ដែលអង្គការសង្គមស៊ីវិលយើងមើលឃើញហ្នឹង! វាមានតែដំណោះស្រាយផ្នែកនយោបាយ បានន័យថា ការចរចា ឬក៏បន្តនូវវប្បធម៌នៃការសន្ទនា ដូចបទពិសោធន៍ដូចអ្នកនយោបាយជើងចាស់ ធ្លាប់ធ្វើកន្លងៗមក នៅពេលដែលមានការគាំងវិបត្តិនយោបាយអីជាដើមនោះ ហើយមានការដោះស្រាយអីគ្នាទៅ។ យើងឃើញថា សកម្មជនឬក៏សមាជិកនៃគណបក្សនយោបាយអីមិនត្រូវបានដោះលែងអីអីចឹងទៅ ដែលវាមានតែងាកទៅរកថា ធ្វើយ៉ាងម៉េច អ្នកនយោបាយទាំងអស់អាចបន្តនូវការចរចា និងការសន្ទនាហ្នឹងបាន ហ្នឹងវាជារឿងល្អមួយសម្រាប់អ្នកនយោបាយ ហើយក៏វាជារឿងល្អសម្រាប់សកម្មជនដែលជាប់ពន្ធនាគារនោះដែរ»។