ក្រសួងយុត្តិធម៌បាន ឱ្យដឹងថា រយៈពេល ២២២ថ្ងៃ សាលាដំបូងរាជធានី-ខេត្ត និងអយ្យអមសាលាដំបូងទូទាំងប្រទេស បានដោះស្រាយការកកស្ទះសំណុំរឿងព្រហ្មទណ្ឌចាស់បានប្រមាណ ៩៥% នៃសំណុំរឿងសរុបក្នុងដំណាក់កាលជំនុំជម្រះ និងសំណុំរឿងព្រហ្មទណ្ឌថ្មីបានប្រមាណ ៧៣%។
សេចក្តីប្រកាសព័ត៌មានរបស់ក្រសួងយុត្តិធម៌ នៅថ្ងៃទី៣១ ខែធ្នូ ឆ្នាំ២០២០ ឱ្យដឹងថា តាមការគ្រោងទុក យុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត នឹងត្រូវប្រើពេល ១ឆ្នាំ ដោយចាប់ផ្តើមគិតចាប់ពីថ្ងៃទី ១៨ ខែឧសភា ឆ្នាំ២០២០ ដល់ថ្ងៃទី១៧ ខែឧសភា ឆ្នាំ២០២១។
ក្រសួងបន្តថា បើទោះជាយុទ្ធនាការនេះមិនទាន់បញ្ចប់ ប៉ុន្តែជាលទ្ធផលក្នុងរយៈពេល ២២២ថ្ងៃនៃយុទ្ធនាការនេះ សាលាដំបូង និងអយ្យការអមសាលាដំបូងរាជធានី-ខេត្តទូទាំងប្រទេស បានដោះស្រាយសំណុំរឿងព្រហ្មទណ្ឌដែលកកស្ទះទាំងដំណាក់កាលអយ្យការ ការស៊ើបសួរ និងជំនុំជម្រះ មានចំនួនសរុបជា ៣៥ ១០០សំណុំរឿង ស្មើនឹង ៨៩% នៃសំណុំរឿងដែលកកស្ទះ។
ក្រសួងបន្តថា ចំពោះសំណុំរឿងដែលត្រូវបានជំនុំជម្រះរួចមានចំនួនជាង ១២ ២០០សំណុំរឿង ស្មើនឹង ៩៥% នៃសំណុំរឿងទាំងអស់ក្នុងដំណាក់កាលជំនុំជម្រះ ខណៈការដោះស្រាយសំណុំរឿងព្រហ្មទណ្ឌដែលចូលថ្មី មានចំនួនជាង ៣៦ ៥០០សំណុំរឿង ស្មើនឹង៧៣%នៃសំណុំរឿងចូលថ្មីសរុប។
ក្រសួងយុត្តិធម៌ បន្តទៀតថា៖ «គិតមកដល់បច្ចុប្បន្ន សាលាដំបូង និងអយ្យការអមសាលាដំបូងខេត្តសរុបចំនួន ១៥ ហើយ ក្នុងចំណោមសាលាដំបូង និងអយ្យការអមសាលាដំបូងរាជធានីខេត្តចំនួន ២៤ បានប្រកាសបញ្ចប់ដោយជោគជ័យ នៃការអនុវត្តយុទ្ធនាការនៅក្នុងស្ថាប័នរបស់ខ្លួន ដោយសម្រេចដោះស្រាយសំណុំរឿងព្រហ្មទណ្ឌដែលកកស្ទះបានយ៉ាងតិច ៩៥% និងសំណុំរឿងដែលចូលថ្មីយ៉ាងតិច ៧០%»។
ជាមួយគ្នានេះដែរ ក្រសួងយុត្តិធម៌ ក៏រំពឹងថា សាលាដំបូង និងអយ្យការអមសាលាដំបូងរាជធានី-ខេត្តទាំងអស់ នឹងបន្តអនុវត្តយុទ្ធនាការនេះឱ្យសម្រេចបានលទ្ធផលជោគជ័យ ដើម្បីឈានទៅរកការប្រកាសបិទបញ្ចប់នៃការអនុវត្តយុទ្ធនាការនេះតាមផែនការដែលបានគ្រោងទុក ប្រកបដោយគុណភាព និងប្រសិទ្ធិភាព ព្រមទាំងធានានូវការអនុវត្តយ៉ាងត្រឹមត្រូវនូវអភិក្រមការងារក្នុងយុទ្ធនាការ គឺ លឿន ត្រឹមត្រូវ យុត្តិធម៌ និងមិនពុករលួយ៕
សំណុំរឿងព្រហ្មទណ្ឌចាស់(មុនបើកយុទ្ធនាការ) ប្រមាណ៩៥% និងសំណុំរឿងព្រហ្មទណ្ឌថ្មី(ក្រោយបើកយុទ្ធនាការ) ប្រមាណ៧៣% ត្រូវបានដោះស្រាយបញ្ចប់នៅសាលាដំបូងរាជធានីខេត្ត!នៃការអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត
