រដ្ឋាភិបាលកម្ពុជាសម្រេចកាត់ផ្ទៃបឹងតាមោកប្រមាណ ២០ ហិកតាបន្ថែមទៀត ប្រគល់ឱ្យលោកស្រី សាម ចេង ធ្វើជាកម្មសិទ្ធិផ្ទាល់ ដែលធ្វើឱ្យផ្ទៃបឹងប្រហែល ១ ០០០ ហិកតាហើយ ត្រូវបានរដ្ឋាភិបាលកាត់និងដោះដូរទៅឱ្យស្ថាប័នរដ្ឋនិងក្រុមហ៊ុនឯកជន សម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ។
ក្នុងអនុក្រឹត្យដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន ចុះថ្ងៃទី២៧ ខែមេសា ឆ្នាំ២០២១ ឱ្យដឹងថា ផ្ទៃបឹងតាមោកចំនួន ១៩៩.៣៧៥ ម៉ែត្រក្រឡា ឬស្មើនឹង ២០ ហិកតា ស្ថិតនៅសង្កាត់គោករកា ខណ្ឌព្រែព្នៅ រាជធានីភ្នំពេញ ប្រគល់ទៅលោកស្រី សាម ចេង ធ្វើជាកម្មសិទ្ធិ ដោយពន្ធ និងអាករផ្សេងៗជាបន្ទុករបស់រដ្ឋ។
បឹងតាមោកផ្ទៃដីសរុប ៣ ២៣៩ហិកតា សម្រាប់ស្តុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងនេះ ត្រូវបានរដ្ឋាភិបាលកម្ពុជាចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិនេះ ជាសម្បតិ្តរបស់រដ្ឋ។
ប៉ុន្តែយោងតាមលិខិតរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ឆ្នាំ២០២១ ផ្ទៃបឹងតាមោកប្រហែល១ ០០០ ហិកតាហើយត្រូវបានរដ្ឋាភិបាលកាត់និងដោះដូរទៅឱ្យស្ថាប័នរដ្ឋនិងក្រុមហ៊ុនឯកជនសម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ។
ការកាត់ផ្ទៃបឹងសម្រាប់ស្តុកទឹកជាបន្តបន្ទាប់នេះ ត្រូវបានរដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ កាលពីខែឧសភា ឆ្នាំ២០២០ បានចេញលិខិតមួយដោយព្រមានអំពីគ្រោះមហន្តរាយដោយសារទឹកជំនន់ ក្រោយពីក្រសួងមើលឃើញថា មានការចាក់ដីលុបនិងការសាងសង់បិទផ្លូវទឹកនានាជាបន្តបន្ទាប់។
របាយការណ៍អង្គការសមាគមធាងត្នោតដែលបានចេញផ្សាយកាលពីថ្ងៃទី២៦ ខែធ្នូ ឆ្នាំ២០១៩ ថា បឹងចំនួន២៦ក្នុងរាជធានីភ្នំពេញត្រូវបានលុបទាំងស្រុងចំនួន១៦ ដោយស្មើនឹង ៦០% នៃផ្ទៃបឹងសរុប និងបឹងចំនួន ១០ ផ្សេងទៀតត្រូវបានលុបផ្នែកមួយចំនួននៃបឹង។
របាយការណ៍ដដែលបានបញ្ជាក់ថា មូលហេតុនៃការលុបបឹងទាំងនោះ គឺបណ្តាលមកពីការសាងសង់បុរី តំបន់លំនៅដ្ឋាន និងទីក្រុងរណប។ របាយការណ៍នេះបង្ហាញថា ការលុបបឹងទាំងនោះ គឺជាការបាត់បង់អាងស្តុកទឹកដ៏សំខាន់សម្រាប់ទីក្រុងភ្នំពេញ៕