ក្រសួងមហាផ្ទៃ ព្រមានជាថ្មីទៀតថានឹងមិនចុះបញ្ជីគណក្សនយោបាយឱ្យ «គណបក្សបេះដូងជាតិ» ដែលជាគណបក្សមួយបង្កើតឡើងដោយសមាជិកនៃអតីតគណបក្សសង្រ្គោះជាតិ ប្រសិនបើគណបក្សនេះមិនអនុលោមឱ្យស្របតាមច្បាប់ស្តីពីគណបក្សនយោបាយ។
យោងតាមលិខិតរបស់ក្រសួងមហាផ្ទៃ ចុះថ្ងៃទី១៥ ខែកញ្ញា បានព្រមានជាលើកទី២ ដល់ស្ថាបនិកគណបក្សបេះដូងជាតិ ឱ្យកែសម្រួលលក្ខន្តិកៈរបស់ខ្លួនឱ្យស្របតាមច្បាប់ស្តីពីគណបក្សនយោបាយ រួចផ្ញើជូនក្រសួងមហាផ្ទៃវិញ ក្នុងរយៈពេល១៥ថ្ងៃ ចាប់ពីថ្ងៃទី១៥ ដល់ថ្ងៃទី៣១ ខែកញ្ញា ឆ្នាំ២០២១ បើពុំដូច្នេះទេ ក្រសួងនឹងមិនចុះបញ្ជីជូនគណបក្សនេះទេ។
ខ្លឹមសារក្នុងលិខិតសរសេរថា៖ «ក្រសួងមហាផ្ទៃ ស្នើឱ្យគណបក្សបេះដូងជាតិ ធ្វើការកែសម្រួលខ្លឹមសារក្នុងលក្ខន្តិកៈគណបក្សឱ្យត្រឹមត្រូវស្របតាមបញ្ញត្តិមាត្រា១០ ត្រង់ចំណុច៤ នៃច្បាប់ស្តីពីគណបក្សនយោបាយ រួចផ្ញើមកក្រសួងវិញយ៉ាងយូរ១៥ថ្ងៃ ចាប់ពីថ្ងៃជូនដំណឹង។ ក្នុងករណីមិនអនុវត្តស្មារតីនៃលិខិតជូនដំណឹងទេ ក្រសួងមិនចុះបញ្ជីគណបក្សបេះដូងជាតិ ក្នុងបញ្ជីគណបក្សនយោបាយនៅក្រសួងនោះឡើយ»។
វីអូឌី មិនអាចសុំការឆ្លើយតបបន្ថែមពីអ្នកនាំពាក្យក្រសួងមហាផ្ទៃ លោក ផាត សុផានិត និងតំណាងស្ថាបនិកគណបក្សបេះដូងជាតិ លោក សៀម ភ្លុក បានទេ នៅថ្ងៃទី១៦ ខែកញ្ញានេះ។
កន្លងមក តំណាងស្ថាបនិកគណបក្សបេះដូងជាតិ លោក សៀម ភ្លុក បានដាក់សំណើស្នើសុំបង្កើតគណបក្សនយោបាយថ្មីនេះទៅកាន់ក្រសួងមហាផ្ទៃ កាលពីថ្ងៃទី៣ ខែមិថុនា។ ប៉ុន្តែផ្អែកតាមបញ្ញត្តិមាត្រា១០ នៃច្បាប់ស្តីពីគណបក្សនយោបាយ ក្រសួងបានស្នើឱ្យតំណាងស្ថាបនិកគណបក្សនេះ ត្រូវធ្វើការកែសម្រួលខ្លឹមសារក្នុងលក្ខន្តិកៈគណបក្សឱ្យត្រឹមត្រូវស្របតាមបញ្ញត្តិមាត្រា១០ ត្រង់ចំណុច៤ នៃច្បាប់ស្តីពីគណបក្សនយោបាយ រួចផ្ញើមកក្រសួងវិញ យ៉ាងយូរ១៥ថ្ងៃជាកំណត់។
យ៉ាងនេះក្តី កាលពីថ្ងៃ១៥ ខែកញ្ញា ម្សិលមិញ ក្រសួងមហាផ្ទៃបានសម្រេចចុះបញ្ជីជូន «គណបក្សកែទម្រង់កម្ពុជា» ដោយមានលោក ប៉ុល ហំម អតីតអនុប្រធាន CNRP ជាប្រធាន និងលោក អ៊ូ ច័ន្ទរ័ត្ន អតីតតំណាងរាស្រ្តគណបក្សសង្រ្គោះជាតិជាសមាជិកបក្សផងដែរ។
សមាជិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន មានប្រសាសន៍ថា ថ្នាក់ដឹកនាំគណបក្សរបស់លោកគ្រោងចុះជួបអ្នកគាំទ្រ សកម្មជន និងប្រជាពលរដ្ឋមួយចំនួននៅតាមបណ្តាខេត្ត ដើម្បីស្ទង់មើលកម្លាំងគាំទ្រ និងបើកផ្លូវឱ្យបក្សផ្សេងៗទៀតដែលចង់រួបរួមគ្នាជាមួយបក្សកែទម្រង់កម្ពុជា សម្រាប់ជាកម្លាំងស្នូលរឹងមាំប្រកួតប្រជែងជាមួយបក្សកាន់អំណាចក្នុងការបោះឆ្នោតឃុំ-សង្កាត់នាពេលឆាប់ៗខាងមុខនេះ។
លោកមានប្រសាសន៍ថា៖ «យើងនឹងធ្វើទៅតាមផែនការសកម្មភាពរបស់យើង ក្នុងរយៈពេល២ទៅ៣ខែ នៅតាមមូលដ្ឋាន មានការរៀបចំលើកផ្លាកនៅតាមខេត្ត ហើយចុះជួបមន្ត្រីនៅតាមមូលដ្ឋាន។ យើងចង់ដឹងមើលនៃការគាំទ្រ ហើយយើងចង់រៀបចំរចនាសម្ព័ន្ធបន្ថែម រួមទាំងអ្នកចូលរួមជាបេក្ខភាពឃុំ-សង្កាត់ផង។ ក្នុងរយៈពេល២ទៅ៣ខែ យើងអាចវាយតម្លៃថា គួររៀបចំយុទ្ធសាស្ត្របែបម៉េចក្នុងការប្រកួតប្រជែងក្នុងការបោះឆ្នោតឃុំ-សង្កាត់»។
លោកមានប្រសាសន៍បន្ថែមថា៖ «ទិសដៅទី២ក្នុងការជជែកគ្នាក្នុងការបង្រួបបង្រួមនិន្នាការគណបក្សប្រឆាំងឡើងវិញនេះក៏ដូចគ្នាដែរ យើងកំពុងតែចាប់ផ្តើម។ តាមពិត ខ្ញុំបានប្រកាសជម្រាបជូនមតិសាធារណជនជាច្រើនដងហើយ ជាឆន្ទៈក្នុងការបង្រួបបង្រួមនេះ យើងនៅតែបន្ត ហើយយើងនឹងសាកល្បងមើលក្នុងពេលឆាប់ៗនេះ។ យើងនឹងផ្ញើសារជូនទៅគណបក្សដទៃដែលគិតថាអាចរួបរួមគ្នាបាន ដើម្បីប្រកួតប្រជែងជាមួយគណបក្សកាន់អំណាច»។
ប្រធានវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន មានប្រសាសន៍ថា ក្រសួងមហាផ្ទៃគួរតែចាត់មន្ត្រីជំនាញជួបជជែកឬពិភាក្សាជាមួយអ្នកដែលស្នើសុំចុះបញ្ជីគណបក្សនយោបាយថ្មី ដើម្បីងាយស្រួលឱ្យពួកគាត់បានបំពេញនូវចន្លោះខ្វះខាត នឹងឆាប់ទទួលបានគ្រប់លក្ខខណ្ឌស្របតាមច្បាប់ស្តីពីគណបក្សនយោបាយ។
ផ្ទុយទៅវិញ លោកថា បើសិនជាការចុះបញ្ជីគណបក្សនយោបាយថ្មី ក្រសួងមហាផ្ទៃមានការលម្អៀងផ្នែកនយោបាយ នោះការចុះបញ្ជីគណបក្សនឹងធ្វើឱ្យជួបបញ្ហាប្រឈមច្រើន ហើយមិនអាចចុះបញ្ជីប្រកួតប្រជែងនយោបាយទៀតផង។
លោកមានប្រសាសន៍ថា៖ «រឿងចុះបញ្ជីគណបក្សនយោបាយនេះ អាចមានភាពប្រទាញប្រទង់គ្នាដែរ ការចុះបញ្ជីគណបក្សនេះ វាស្ថិតនៅក្រោមសមត្ថកិច្ចរបស់ក្រសួងមហាផ្ទៃ។ យើងដឹងហើយថា ក្រសួងមហាផ្ទៃជាផ្នែកមួយរបស់រដ្ឋាភិបាលដែលដឹកនាំដោយគណបក្សប្រជាជន បើសិនការអនុវត្តដំណើរការចុះបញ្ជីមានភាពលម្អៀងផ្នែកនយោបាយ ក៏ជាបញ្ហាសម្រាប់គណបក្សឬអ្នកនយោបាយដែលមានបំណងទៅបង្កើតគណបក្សថ្មីហ្នឹងនិងចុះបញ្ជីដែរ»។
គិតចាប់តាំងពីការរំលាយគណបក្សសង្គ្រោះជាតិ នៅខែវិច្ឆិកា ឆ្នាំ២០១៧ ដោយតុលាការកំពូលកម្ពុជាមក មានអតីតមន្ត្រីគណបក្សសង្គ្រោះជាតិ ចំនួនជាង២០នាក់ ក្នុងចំណោម១១៨នាក់ ដែលជាប់បម្រាមធ្វើនយោបាយរយៈពេល៥ឆ្នាំនោះ បានស្នើសុំសិទ្ធិធ្វើនយោបាយឡើងវិញ។ ពួកគេមួយចំនួនបានទៅបង្កើតគណបក្សនយោបាយថ្មី និងមួយចំនួនទៀតនៅមិនទាន់សម្រេចចិត្តនៅឡើយទេ ខណៈការបោះឆ្នោតឃុំ-សង្កាត់នឹងធ្វើឡើងនៅឆ្នាំក្រោយនេះ។
រហូតមកដល់ពេលនេះ មានគណបក្សនយោបាយជាង៤០បានចុះបញ្ជីនៅក្រសួងមហាផ្ទៃ ក្នុងនោះមានគណបក្សចំនួន៥ ដែលបានបង្កើតឡើងដោយអតីតមន្ត្រីគណបក្សប្រឆាំង រួមមាន គណបក្សឆន្ទៈខ្មែរ របស់លោក គង់ មូនីកា កូនប្រុសរបស់លោក គង់ គាំ, គណបក្សខ្មែរអភិរក្ស របស់លោក រៀល ខេមរិន្ទ្រ, គណបក្សខ្មែរស្រឡាញ់ជាតិ របស់លោក ជីវ កត្តា, គណបក្សកំណែទម្រង់កម្ពុជា របស់លោក ប៉ុល ហំម និងលោក អ៊ូ ច័ន្ទរ័ត្ន និងគណបក្សបេះដូងជាតិ ដែលត្រូវបានគេអះអាងថាជារបស់លោក ថាច់ សេដ្ឋា៕