សមាជិកបណ្ដាញព្រៃឡង់ម្នាក់នៅស្រុកសណ្ដាន់ ខេត្តកំពង់ធំ អំពាវនាវដល់តុលាការឱ្យទម្លាក់ចោលការចោទប្រកាន់និងផ្តល់យុត្តិធម៌ជូនគេ ក្រោយឈ្មួញឈើប្ដឹងពីបទមនុស្សឃាត ដោយថា រូបគេមិនបានប្រព្រឹត្តដូចការចោទប្រកាន់ឡើយ។
សាលាដំបូងខេត្តកំពង់ធំ នៅថ្ងៃទី១៦ ខែកញ្ញា ឆ្នាំ២០២១ បានបើកសវនាការលើសំណុំរឿងរបស់សមាជិកបណ្តាញសហគមន៍ព្រៃឡង់ លោក ចាន់ ធឿន ក្រោមការចោទប្រកាន់ថាបានប៉ុនប៉ងមនុស្សឃាត ទៅតាមបណ្តឹងរបស់ឈ្មួញឈើម្នាក់ឈ្មោះ ប៉ាក យ៉ាងគួ។
មេធាវីការពារក្តីឱ្យលោក ចាន់ ធឿន គឺលោក សំ សុគង់ ប្រាប់ វីអូឌី នៅថ្ងៃព្រហស្បតិ៍នេះថា តុលាការនឹងប្រកាសសាលក្រមលើសំណុំរឿងរបស់លោក ចាន់ ធឿន នៅថ្ងៃទី២៨ ខែកញ្ញាខាងមុខនេះ។
សមាជិកបណ្ដាញព្រៃឡង់ លោក ចាន់ ធឿន រស់នៅភូមិត្រពាំងត្រឡាច ឃុំមានរិទ្ធ ប្រាប់ វីអូឌី ថាសវនាការនៅថ្ងៃព្រហស្បតិ៍នេះ គឺលោកមិនបានចូលរួមនោះទេ ដោយសារបារម្ភពីការចាប់ខ្លួន ប៉ុន្តែមេធាវីការពារក្តីរបស់លោកបានចូលរួមក្នុងសវនាការនេះ។
សកម្មជនព្រៃឡង់រូបនេះអះអាងថា បុគ្គលឈ្មោះ ប៉ាក យ៉ាងគួ គឺជាកូនមេបញ្ជាការរងកងរាជអាវុធហត្ថខេត្តកំពង់ធំ និងជាឈ្មួញរកស៊ីឈើច្រើនឆ្នាំមកហើយក្នុងខេត្តនេះ ហើយបានប្តឹងរូបលោកក្នុងសំណុំរឿងព្រហ្មទណ្ឌ និងទាមទារប្រាក់សំណង២ ០០០ដុល្លារ។
លោក ចាន់ ធឿន រៀបរាប់ថា កាលពីខែកក្កដា ឆ្នាំ២០២០ រូបលោកនិងពលរដ្ឋផ្សេងទៀតបានចុះទប់ស្កាត់បទល្មើសព្រៃឈើនៅក្នុងសហគមន៍មួយស្ថិតនៅភូមិត្រពាំងត្រឡាច ឃុំមានរិទ្ធ ស្រុកសណ្ដាន់ ដោយប្រទះឃើញបុគ្គលឈ្មោះ ប៉ាក យ៉ាងគួ ដែលជាឈ្មួញឈើ បានដឹកឈើតាមគោយន្តចេញពីព្រៃសហគមន៍។
សកម្មជនព្រៃឈើរូបនេះបន្តថា រូបលោកបានយកទូរសព្ទថតគោយន្តដឹកឈើនោះ ហើយឈ្មួញឈើបានស្ទុះប្រទាញប្រទង់ដណ្ដើមទូរសព្ទ និងឆក់យកកាំបិតស្នៀតភ្ជង់រូបលោក រួចប្តឹងលោកទៅតុលាការថែមទៀត។
លោកបន្ថែមថា៖ «កាលហ្នឹងគេបានឆក់កាំបិតពីចង្កេះខ្ញុំបាន ហើយគេភ្ជង់ខ្ញុំតែម្តង គេភ្ជង់យកទូរសព្ទ។ ភ្ជង់យកទូរសព្ទ គេថា អាហ្អែងឱ្យអញឬមិនឱ្យ ចុងកាំបិតនៅនឹងពោះខ្ញុំហើយ កាំចុងស្នៀតចុងស្រួចទៀត។ ពេលហ្នឹងខ្ញុំភ័យ ខ្ញុំឱ្យគេ ខ្លាចគេចាក់យើងសម្លាប់។ ដល់ឱ្យទូរសព្ទទៅគេ បានគេដើរចេញ គេបោះពាក្យសម្តីថា គេគុំខ្ញុំយូរហើយ។ ឥលូវខ្ញុំកំពុងបារម្ភពីសុវត្ថិភាពផង និងការចាប់ខ្លួនផង។ អាចយើងជិះម៉ូតូទៅណាមកណាម្នាក់ឯង គេអាចនិងជួលអ្នកមកធ្វើឃាតយើងក៏ថាបាន ព្រោះយើងបានធ្វើប៉ះពាល់ផលប្រយោជន៍របស់គេ»។
លោក ចាន់ ធឿន បន្ថែមថា វាជារឿងអយុត្តិធម៌មួយដែលរូបលោកជាអ្នកការពារព្រៃឈើ ត្រូវរងការគំរាមកំហែងនិងត្រូវបានប្តឹងទៅតុលាការដោយជនបំផ្លាញព្រៃឈើទៅវិញ។ លោកបានអំពាវនាវដល់តុលាការឱ្យពិចារណាទម្លាក់ចោលការចោទប្រកាន់មកលើរូបលោក។
វីអូឌី មិនអាចសុំការឆ្លើយតបពីដើមបណ្តឹង លោក ប៉ាក យ៉ាងគួ បានទេ នៅថ្ងៃព្រហស្បតិ៍នេះ។ ប៉ុន្តែលោកធ្លាប់ប្រាប់សារព័ត៌មានក្រៅស្រុកមួយកាលពីខែសីហា ឆ្នាំ២០២០ ថាមូលហេតុដែលលោកប្តឹងសកម្មជនព្រៃឡង់ ដោយសារសកម្មជនរូបនោះបានថតរូបលោកដឹកឈើធ្វើផ្ទះបន្តិចបន្តួច។ លោកថា ឈើដែលដឹកតាមគោយន្តនោះ លោកទិញពីពលរដ្ឋនៅមូលដ្ឋាន មិនមែនជាឈើដឹកចេញពីព្រៃឡង់ឬព្រៃសហគមន៍នោះទេ។
ប្រធានបណ្ដាញសហគមន៍ព្រៃឡង់ ខេត្តកំពង់ធំ លោក ហឿន សុភាព មានប្រសាសន៍ថា ករណីតុលាការចាត់ការលើបណ្ដឹងរបស់ឈ្មួញឈើ ប្រឆាំងអ្នកការពារព្រៃឈើនេះ វាជារឿងអយុត្តិធម៌និងជាការគំរាមកំហែងបំបាក់ស្មារតីបណ្តាញព្រៃឡង់ មិនឱ្យហ៊ានធ្វើសកម្មភាពការពារព្រៃបន្តទៀតតែប៉ុណ្ណោះ។
ប្រធានបណ្ដាញសហគមន៍ព្រៃឡង់រូបនេះ លើកឡើងថា លោក ចាន់ ធឿន ជាសមាជិកបណ្តាញសហគមន៍ព្រៃឡង់ម្នាក់ ដែលស្រឡាញ់ព្រៃឈើ និងសកម្មក្នុងការចូលរួមការពារព្រៃ មិនដែលធ្វើសកម្មភាពអ្វីខុសច្បាប់ឡើយ។
លោកបន្ថែមថា៖ «ខ្ញុំគិតថា ការចោទប្រកាន់នោះ ទាំងតុលាការ ទាំងអាជ្ញាធរ ទាំងដើមបណ្ដឹង គឺពួកគេរួមគ្នាធ្វើសកម្មជនព្រៃឈើ មិនឱ្យហ៊ានការពារព្រៃឈើ។ តែធាតុពិត ចាន់ ធឿន មិនបានធ្វើរឿងដូចការចោទប្រកាន់។ បច្ចុប្បន្ន បទល្មើសព្រៃឈើនៅសហគមន៍ និងព្រៃឡង់នៅខេត្តកំពង់ធំ គឺកើតមានរាល់ថ្ងៃ ដោយដឹកទាំងផ្លូវទឹក និងផ្លូវគោក តាមគោយន្ត និងកាណូត ដោយគ្មានការទប់ស្កាត់ពីសំណាក់អាជ្ញាធរឡើយ»។
មេធាវីការពារក្តីឱ្យសមាជិកបណ្ដាញសហគមន៍ព្រៃឡង់ លោក ចាន់ ធឿន គឺលោក សំ សុគង់ មានប្រសាសន៍ថា បើពិនិត្យលើអង្គហេតុ គឺគ្មានភស្តុតាងណាដាក់បន្ទុកលើកូនក្តីរបស់លោកទេ ហើយកូនក្តីរបស់លោកត្រូវតែរួចផុតពីការចោទប្រកាន់។
លោកបន្ថែមថា៖ «អង្គហេតុហ្នឹងជាអង្គហេតុអត់ពិត ហើយភស្តុតាងអត់មានភស្តុតាងអីក្រៅពីចម្លើយរបស់ជនរងគ្រោះ និងសាក្សីដែលជាបក្សពួករបស់ជនរងគ្រោះ។ អ៊ីចឹងខ្ញុំគិតថា ផ្អែកតាមអង្គហេតុនិងភស្តុតាងហ្នឹង បើយើងគិតទៅលើមាត្រា៣៨ នៃរដ្ឋធម្មនុញ្ញ គេនិយាយពីវិមតិសង្ស័យ មានន័យថា វាអត់មានភស្តុតាងអីដែលធ្ងន់ធ្ងរថាកូនក្តីរបស់ខ្ញុំបានប្រព្រឹត្តទេ។ អ៊ីចឹងបើពិនិត្យមើលទៅលើអង្គហេតុនិងភស្តុតាងហ្នឹង ខ្ញុំសង្ឃឹមថា តុលាការនឹងសម្រេចឱ្យកូនក្តីខ្ញុំរួចផុតពីបទចោទ។ នៅក្នុងសវនាការហ្នឹង ខ្ញុំក៏បានសំណូមពរដល់តុលាការឱ្យទម្លាក់ចោលបទចោទលើកូនក្តីខ្ញុំដែរ»៕
