សាលាដំបូងខេត្តស្វាយរៀង បានសម្រេចដោះលែងតំណាងពលរដ្ឋមានជម្លោះដីធ្លី២រូបឱ្យនៅក្រៅឃុំជាបណ្តោះអាសន្ន ក្រោយឃុំខ្លួនពួកគេជិត២០ថ្ងៃ និងបន្ទាប់ពីពលរដ្ឋមានជម្លោះដីធ្លីទាំងនោះសម្រេចទទួលយកសំណងក្នុងមួយម៉ែត្រការ៉េ៩០០រៀល តាមការចង់បានរបស់អាជ្ញាធរ។
តំណាងសហគមន៍ដីធ្លីចេកមាស ឃុំឈើទាល ស្រុកស្វាយជ្រុំ ខេត្តស្វាយរៀង គឺអ្នកស្រី ឥន សូត្រ និងអ្នកស្រី យស់ សោភ័ណ្ឌ ត្រូវបានស្នងការនគរបាលខេត្តស្វាយរៀងកោះហៅឱ្យចូលខ្លួនទៅឆ្លើយបំភ្លឺនៅស្នងការដ្ឋាននគរបាលខេត្ត កាលពីថ្ងៃទី២៧ ខែសីហា។ បន្ទាប់ពីចូលខ្លួនទៅបំភ្លឺតាមការកោះហៅហើយ ពួកគេមិនត្រូវបានអនុញ្ញាតឱ្យវិលត្រលប់មកផ្ទះវិញទេ។ លុះដល់ព្រឹកថ្ងៃទី២៨ ខែសីហា តំណាងសហគមន៍ដីធ្លីទាំង២នាក់ក៏ត្រូវបានសមត្ថកិច្ចបញ្ជូនបន្តទៅកាន់តុលាការខេត្តស្វាយរៀងតែម្តង។
តំណាងសហគមន៍ដីធ្លីចេកមាស ឃុំឈើទាល អ្នកស្រី ឥន្ទ សូត្រ បានឱ្យ វីអូឌី ដឹងនៅថ្ងៃទី១៦ ខែកញ្ញានេះថា អ្នកស្រីក៏ដូចជាសមាជិកម្នាក់ទៀត ត្រូវបានមេធាវីស្នើសុំទៅតុលាការ ដើម្បីបាននៅក្រៅឃុំបណ្ដោះអាសន្ន កាលពីថ្ងៃម្សិលមិញ។
អ្នកស្រីបន្តថា ការនៅក្រៅឃុំបណ្ដោះអាសន្ននេះមិនទាន់អាចធ្វើអ្វីបាននោះទេ ត្បិតអ្នកស្រីត្រូវទៅជួបតុលាការ បើសិនជាមានការកោះហៅណាមួយ។ ដូច្នេះ អ្នកស្រីមិនអាចធ្វើសកម្មភាពដែលនាំឱ្យប៉ះពាល់ដល់ប្រព័ន្ធតុលាការឡើយ។
អ្នកស្រីបន្តថា៖ «ខ្ញុំវាគ្រាន់ថាល្អជាងនៅក្នុង [ពន្ធនាគារ] នោះបន្តិច។ យើងមកផ្ទះ បានធូរស្រាលបន្តិច បានជួបជុំគ្រួសារ បានជួបជុំកូនអ៊ីចឹង។ ស្រឡះមុខ ស្រឡះមាត់ [ហើយ] មានសេរីភាពជាង។ អាចទៅណាទៅណីបានខ្លះ ល្អជាងនៅនោះ[ពន្ធនាគារ]។ តែក្ដីបារម្ភនៅតែមានអ៊ីចឹង ព្រោះមានការតាមដាន គេអង្កេតតែរហូតអ៊ីចឹង»។
អ្នកស្រី ឥន្ទ សូត្រ អះអាងថា បច្ចុប្បន្ន ពលរដ្ឋជាង១០០គ្រួសារដែលមានដីប៉ះពាល់ពីគម្រោងយកធ្វើអាងស្តុកទឹកជិត១០០ហិកតា បានព្រមទទួលយកសំណងតាមគោលនយោបាយរបស់រដ្ឋាភិបាល ដែលបានផ្ដល់ជូនពួកគាត់តម្លៃ៩០០រៀលក្នុងមួយម៉ែត្រការ៉េ ខណៈពួកគេមិនមានសង្ឃឹមអ្វីផ្សេងទៀតនោះទេ ក្រោយពីតំណាង២នាក់របស់ខ្លួន ត្រូវបានសមត្ថកិច្ចចាប់ខ្លួនដាក់ពន្ធនាគារកាលពីចុងខែសីហា។
ចំណែកតំណាងពលរដ្ឋម្នាក់ទៀតដែលត្រូវបានដោះលែងឱ្យនៅក្រៅឃុំបណ្ដោះអាសន្នដែរនោះ អ្នកស្រី យស់ សោភ័ណ្ឌ បានស្នើទៅតុលាការឱ្យទម្លាក់ចោលការចោទប្រកាន់មកលើពួកគាត់ ដោយថា ពួកគាត់បានព្រមទទួលយកសំណងតាមការចង់បានរបស់អាជ្ញាធររួចទៅហើយ។
អ្នកស្រីបន្ថែមថា៖ «ខ្ញុំសុំឱ្យអាជ្ញាធរនិងតុលាការទម្លាក់ការចោទប្រកាន់មកលើករូបខ្ញុំចោលទាំងស្រុងបណ្ដោយទៅ ព្រោះអ្វីដែលពួកខ្ញុំបានធ្វើ គឺធ្វើតាមអ្វីដែលមេឃុំនិងចៅហ្វាយស្រុកដែលគាត់ឱ្យយើងធ្វើ យើងធ្វើតាមគាត់រហូត ដែលថាត្រូវប្រឆាំងអីលើរូបគាត់អត់មានទេ»។
អ្នកនាំពាក្យសាលាដំបូងខេត្តស្វាយរៀង លោក ទេព ផល្លា មិនអាចសុំការបំភ្លឺបន្ថែមបានទេ នៅថ្ងៃនេះ។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន បានលើកឡើងថា ការដោះលែងតំណាងពលរដ្ឋទាំង២នាក់ឱ្យមានសេរីភាពឡើងវិញ វាជារឿងត្រឹមត្រូវ។ លោកបន្តថា អ្វីដែលពលរដ្ឋចង់ឃើញ គឺការដោះស្រាយប្រកបដោយសន្តិវិធី មិនបង្កការគំរាមកំហែងឬធ្វើទុក្ខបុកម្នេញលើពលរដ្ឋ។
លោកមានប្រសាសន៍ថា៖ «ការដោះលែងឱ្យនៅក្រៅឃុំបណ្ដោះអាសន្នរបស់តំណាងសហគមន៍ដីធ្លីនេះ វាជារឿងមួយដែលល្អប្រសើរ ពីព្រោះដើម្បីធានាថា ការអនុវត្តការផ្ដល់យុត្តិធម៌ហ្នឹងដោយយល់ពួកគាត់។ ហើយមួយវិញទៀត ស្នើសុំឱ្យការកាត់សេចក្ដីនេះឈរលើគោលការណ៍យុត្តិធម៌ កុំឱ្យមានពាក្យថា ការប្រើប្រាស់ប្រព័ន្ធតុលាការជាការគំរាមកំហែង»។
កាលពីថ្ងៃទី២៨ ខែសីហា សាលាដំបូងខេត្តស្វាយរៀង សម្រេចឃុំខ្លួនតំណាងសហគមន៍ចេកមាស ២នាក់ គឺលោកស្រី ឥន សូត្រ និងលោកស្រី យស់ សោភ័ណ្ឌ ដាក់ពន្ធនាគារបណ្ដោះអាសន្ន ក្រោមបទចោទតាមមាត្រា១០ និង១១ នៃច្បាប់ស្ដីពីវិធានការទប់ស្កាត់ការឆ្លងរាលដាលជំងឺកូវីដ-១៩ ដោយសារមិនគោរពតាមវិធានការរដ្ឋបាលខេត្តដែលបានដាក់ចេញ ហើយត្រូវផាកពិន័យម្នាក់ៗ២លានរៀលទៀតផង។
ការអនុវត្តវិធានការច្បាប់កូវីដ-១៩ ទៅលើតំណាងពលរដ្ឋមានជម្លោះដីធ្លីនៅឃុំឈើទាលនេះ ក្រោយពេលពួកគាត់ប្រមូលផ្តុំគ្នានៅលើដីស្រែមានវិវាទ ធ្វើយុទ្ធនាការលើបណ្តាញសង្គមកាលពីថ្ងៃទី២ ខែសីហា ដើម្បីទាមទារឱ្យមានដំណោះស្រាយសមរម្យ។ យុទ្ធនាការនេះត្រូវបានអាជ្ញាធរចោទថាល្មើសបម្រាមនិងវិធានការរបស់ក្រសួងសុខាភិបាល ត្បិតមិនបានសុំច្បាប់ជាមុន និងមិនបានពាក់ម៉ាស់ ជាដើម៕
