សមត្ថកិច្ចក្នុងតំបន់ បាននិយាយកាលពីថ្ងៃព្រហស្បតិ៍ម្សិលមិញថា ពលករបរទេសរាប់រយនាក់ដែលត្រូវបានសង្រ្គោះពីកាស៊ីណូនៅក្រុងបាវិត ខេត្តស្វាយរៀង បាននាំគ្នាសម្រុកចូលទៅក្នុងប្រទេសវៀតណាម ដោយរត់កាត់តាមវាលស្រែ និងហែលឆ្លងទន្លេ។
ក្នុងសប្តាហ៍នេះ នគរបាលអន្តោប្រវេសន៍បានឆ្មក់ចូលកាស៊ីណូម៉ុកបាយ ដែលជាកាស៊ីណូដ៏ល្បីមួយនៅក្រុងបាវិត ខណៈពលករបរទេសរាប់រយនាក់នាំគ្នាសម្រុកចាកចេញតាមច្រកព្រំដែន ខេត្តស្វាយរៀង។
បន្ទាប់ពីជនបរទេសរាប់រយនាក់អំពាវនាវរកជំនួយពីទីតាំងនានាទូទាំងប្រទេស ដែលជនរងគ្រោះបានរាយការណ៍ថា ពួកគេត្រូវបានបង្ខាំងនិងបង្ខំឱ្យប្រព្រឹត្តអំពើឆបោកតាមអ៊ីនធឺណិតនោះ នគរបាលបានបើកប្រតិបត្តិការឆ្មក់ចូលទីតាំងប្រព្រឹត្តអំពើឆបោក ដោយបានសង្រ្គោះកម្មកររាប់ពាន់នាក់ នៅខេត្តព្រះសីហនុ និងរាជធានីភ្នំពេញ។
ខណៈនគរបាលឆ្មក់ចូលទីតាំងនានានៅក្នុងប្រទេស គេឃើញមានពលករបរទេសជាច្រើននាក់នាំគ្នាសម្រុកចាកចេញតាមរថយន្តក្រុងពីកាស៊ីណូក្រុងបាវិត។
ប្រធានមន្ទីរការងារខេត្តស្វាយរៀង លោក អ៊ូ សុខឿន បានឱ្យដឹងកាលពីថ្ងៃព្រហស្បតិ៍ម្សិលមិញថា សមត្ថកិច្ចជំនាញបានចាប់ផ្ដើមចុះត្រួតពិនិត្យទីតាំងកាស៊ីណូម៉ុកបាយ ដែលជាតំបន់ដ៏ធំមួយដែលមានអគារប្រហែល៣០នៅខាងក្រោយកាស៊ីណូ។
លោក អ៊ូ សុខឿន បាននិយាយថា៖ «យើងមិនទាន់បញ្ចប់ការងារនេះនៅឡើយទេ។ យើងនឹងបន្តធ្វើមួយថ្ងៃទៀត។ យើងកំពុងតែពិនិត្យមើលថាតើក្រុមហ៊ុននីមួយៗមានជនបរទេសប៉ុន្មាននាក់ ហើយថាតើពួកគេមានលិខិតបញ្ជាក់ឬទេ ហើយប៉ុន្មានអ្នកមានបណ្ណការងារ […] វាមិនមែនជារឿងចម្លែកទេ»។
បើទោះជាលោក អ៊ូ សុខឿន និយាយថា ការត្រួតពិនិត្យមានលក្ខណៈធម្មតាក៏ដោយ ប៉ុន្តែនៅប៉ុន្មានថ្ងៃមុនការត្រួតពិនិត្យ ហ្វូងមនុស្សបានសម្រុកចាកចេញពីទីតាំងកាស៊ីណូ ដោយខ្លះគប់ដុំថ្មទៅលើរថយន្តក្រុងដែលកំពុងដឹកកម្មករចេញពីទីតាំងកាស៊ីណូ។
អធិការនគរបាលក្រុងបាវិត លោក ឯម សុវណ្ណារិទ្ធ មានប្រសាសន៍ថា មនុស្សរាប់រយនាក់នាំគ្នាចាកចេញពីទីតាំងកាស៊ីណូ ដែលភាគច្រើនឆ្លងចូលប្រទេសវៀតណាម តាមវាលស្រែ និងហែលឆ្លងទន្លេ ដោយមិនឆ្លងតាមច្រកទ្វារព្រំដែនឡើយ។
លោកថា៖ «យើងបានឃើញពួកគេ ពួកគេបានត្រលប់ទៅស្រុកកំណើតវិញ ពួកគេមិនចូលតាមច្រកព្រំដែនទេ ព្រោះពួកគេនឹងត្រូវផាកពិន័យ ដោយសារពួកគេមិនមានលិខិតឆ្លងដែន ហើយអាចរងការផាកពិន័យចំនួន ៦លានដុង [ប្រហែល ២៤០ដុល្លារ]។ ពួកគេគ្មានលុយទេ»។
លោកបាននិយាយថា លោកមិនដឹងថាមានមនុស្សប៉ុន្មានអ្នកដែលនៅសល់ទេព្រោះ «យើងមិនបានរាប់ទេ»។
លោកបន្តថា៖ «ក្រុមហ៊ុនបានអនុញ្ញាតឱ្យពួកគេចាកចេញដោយសេរី»។ លោកថា អ្នកខ្លះនៅទីនេះ [កាស៊ីណូម៉ុកបាយ] តាំងពីជំងឺកូវីដ-១៩ រាតត្បាត។
លោកបន្ថែមថា៖ «ឥលូវនេះ កាស៊ីណូអនុញ្ញាតឱ្យបុគ្គលិករបស់ខ្លួនដែលចង់ទៅផ្ទះ អាចទៅបានដោយសេរី ហើយអ្នកដែលចង់ស្នាក់នៅ អាចស្នាក់នៅបានតាមចិត្តពួកគេ»។
អ្នកបើកបរម៉ូតូកង់បីម្នាក់ ដែលសុំមិនបញ្ចេញឈ្មោះ ដោយបារម្ភពីសុវត្ថិភាព បាននិយាយថា គាត់បានឃើញជនជាតិបរទេសជាច្រើននាក់នាំគ្នាសម្រុកចាកចេញពីកាស៊ីណូម៉ុកបាយ ទៅកាន់ព្រំដែន ពេញមួយសប្តាហ៍ ដោយខ្លះរត់ ខ្លះដើរ និងខ្លះទៀតជិះរថយន្ត។
លោកបានបន្ថែមថា នៅទីនេះ [កាស៊ីណូម៉ុកបាយ] ស្ងាត់ជាងមុន ហើយលោកបានប៉ាន់ប្រមាណថាមានកម្មកររាប់ពាន់នាក់សម្រុកចាកចេញក្នុងរយៈពេលប៉ុន្មានថ្ងៃចុងក្រោយនេះ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Bavet Compound Workers Flee Country Through River, Rice Fields
