ក្រុមការងារអាជ្ញាធរជាតិអប្សរា បានប្រទះឃើញរូបចម្លាក់ព្រះសិរមេទេវតាព្រះភ័ក្រ្ត៤ កប់ក្នុងដីនៅក្បែរខឿនជ្រុងឦសាននៃខ្លោងទ្វារតាកាវ ស្ថិតនៅទិសខាងលិចនៃប្រាសាទបាយ័ន ខេត្តសៀមរាប។
អាជ្ញាធរជាតិអប្សរាបានឱ្យដឹងនៅក្នុងទំព័រហ្វេសប៊ុករបស់ខ្លួននៅថ្ងៃចន្ទម្សិលមិញថា រូបព្រះសិរមេទេវតាព្រះភ័ក្រ្ត៤ ដែលបានរកឃើញ គឺមានព្រះភ័ក្រ្ត២ បានបាក់ត្រឹមពាក់កណ្ដាលច្រមុះចុះក្រោម។ ចំពោះចម្លាក់ព្រះសិរទេវតាដែលបានរកឃើញនេះ ក្រុមការងារបានយកទៅធ្វើការផ្គុំសាកល្បងជាមួយនឹងចម្លាក់ស្មាទេវតា ដើម្បីផ្ទៀងផ្ទាត់ ហើយជាលទ្ធផលចម្លាក់ព្រះភ័ក្រ្តនោះពិតជាត្រូវគ្នាជាមួយនឹងតួខ្លួនមេទេវតាប្រាកដមែន។
អាជ្ញាធរជាតិអប្សរាបន្តថា បន្ទាប់ពីផ្គុំរួចរាល់ហើយ ក្រុមការងារបានសហការជាមួយនឹងនគរបាលការពារបេតិកភណ្ឌក្នុងតំបន់អង្គរ ដើម្បីយកចម្លាក់ព្រះភ័ក្រ្តនោះទៅរក្សាទុកនៅទីតាំងការដ្ឋានខ្លោងទ្វារតាកាវ ដើម្បីធ្វើការជួសជុលឡើងវិញ។
អ្នកនាំពាក្យអាជ្ញាធរជាតិអប្សរា លោក ឡុង កុសល មានប្រសាសន៍ថា ទីក្រុងអង្គរធំ បានសាងសង់ឡើងដោយព្រះបាទជ័យវរ្ម័នទី៧ ក្នុងសតវត្សរ៍ទី១២ ដែលករណីនេះ ក្រុមការងារអាចសន្និដ្ឋានបានថា រូបចម្លាក់ព្រះសិរមេទេវតាព្រះភ័ក្ត្រ៤នេះកសាងឡើងក្នុងសតវត្សរ៍ទី១២ ព្រោះរូបចម្លាក់នេះជាផ្នែកមួយរបស់ទីក្រុងអង្គរធំ។
លោកបន្តថា៖ «សម្រាប់ការងាររុករករូបចម្លាក់បន្ថែម គឺកំពុងដំណើរការតទៅមុខទៀត។ យើងរំពឹងថា នឹងអាចរកឃើញបន្តថែមទៀត។ ឥលូវនេះ គឺយើងរក្សាទុកនៅកន្លែងការដ្ឋានជួសជុល និងមានគ្រប់គ្រងយ៉ាងជាក់លាក់ពីនគរបាលការពារបេតិកភណ្ឌ»។
លោកបានបន្ថែមថា៖ «កន្លងមក ខាងក្រុមការងារអប្សរាបានធ្វើការផ្សព្វផ្សាយ ដូចជាព្រះកេសរបស់ទេវតា ព្រះកេសរបស់យក្ស បដិមា ដែលយើងគិតថាបាត់បង់ពីមុនមក។ ដោយពីសម័យសង្គ្រាមស៊ីវិល មានការជួញដូររូបចម្លាក់ ដោយមិននឹកស្មានថាអាចរកឃើញនោះទេ ព្រោះដោយសារតែភាគច្រើនគឺបាត់បង់ទៅហើយ។ តែតាមការរកឃើញជាបន្តបន្ទាប់មក យើងក៏មានមោទកភាពដែរ ដែលអាចរកឃើញឡើងវិញ»៕
