សមត្ថកិច្ចបានឃាត់ខ្លួនអតីតសកម្មជនគណបក្សសង្រ្គោះជាតិ២នាក់បន្ថែមទៀត កាលពីម្សិលមិញ ដោយពួកគេទាំងពីរនាក់នោះត្រូវបាននគរបាលបញ្ជូនទៅឃុំខ្លួនហើយដែរ ក្រោមបទចោទប្រកាន់ «ញុះញង់បង្កភាពវឹកវរដល់សន្តិសុខសង្គម និងក្លែងបន្លំលិខិតឯកសារសាធារណៈ»។
សមត្ថកិច្ចបានឃាត់ខ្លួនអតីតសកម្មជនគណបក្សប្រឆាំង លោក ទុំ ប៊ុនថន នៅរាជធានីភ្នំពេញ និងអតីតមេឃុំបិតត្រាំង ស្រុកព្រៃនប់ ខេត្តព្រះសីហនុ លោក ឡាក់ គៀន កាលពីថ្ងៃទី២៩ ខែកញ្ញា ឆ្នាំ២០២១។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍ថា ការចាប់ខ្លួនអតីតសកម្មជនបក្សប្រឆាំងកាលពីថ្ងៃទី២៩ ខែកញ្ញានេះ ធ្វើឡើងតាមដីការបស់តុលាការទាំងអស់ ដោយម្នាក់ឈ្មោះ ទុំ ប៊ុនថន ត្រូវបានតុលាការចោទពីបទ «ញុះញង់បង្កភាពវឹកវរដល់សន្តិសុខសង្គម» និងម្នាក់ទៀតឈ្មោះ ឡាក់ គៀន ត្រូវបានចោទប្រកាន់ពីបទ «ក្លែងបន្លំលិខិតសាធារណៈ»។
លោក ឆាយ គឹមខឿន៖ «ឃាត់តាមដីការបស់តុលាការទាំងអស់ អាហ្នឹងគេឃាត់ហើយ [បញ្ជូនឃុំឬអត់?] ចង់ដឹងទៅសួរអ្នកឃាត់ បងគ្រាន់តែដឹងប៉ុណ្ណឹងទេ! ឃាត់ហើយ គ្មានលែងវិញទេ មានដីកាតុលាការហើយ ឃាត់ហើយ ដាក់គុកហើយ»។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាឌី សុំមិនធ្វើអត្ថាធិប្បាយចំពោះរឿងនេះទេ ដោយបង្វែរសំណួរឱ្យទៅសួរអ្នកនាំពាក្យអយ្យការវិញ ប៉ុន្តែ វីអូឌី នៅមិនអាចរកការឆ្លើយតបពីអ្នកនាំពាក្យអយ្យការអមសាលាដំបូងរាជធានីភ្នំពេញនោះបានទេ នៅថ្ងៃទី៣០ ខែកញ្ញានេះ។
ភរិយាលោក ឡាក់ គៀន គឺអ្នកស្រី អន ចន្ធូ បានប្រាប់ វីអូឌី ថាសមត្ថកិច្ចបានទៅចាប់ខ្លួនស្វាមីរបស់គាត់នៅម៉ោង៤ល្ងាច កាលពីថ្ងៃទី២៩ ខែកញ្ញា ដោយមិនបានបង្ហាញដីការបស់តុលាការឡើយ ហើយបច្ចុប្បន្ន ស្វាមីរបស់គាត់ត្រូវបានសមត្ថកិច្ចបញ្ជូនមកភ្នំពេញ។
អ្នកស្រីថា៖ «គេឱ្យខ្ញុំធ្វើម៉េចឱ្យប្ដីចេញមក បើមិនអ៊ីចឹងទេ គេចាប់ខ្ញុំ ហើយគេនឹងកម្ទេចផ្ទះខ្ញុំចោល។ ហើយខ្ញុំក៏ទៅហៅគាត់មក ព្រោះគេប្រាប់ខ្ញុំថា គេគ្រាន់តែសួរទេ។ ដល់ពេលគាត់ចេញមក គេអត់មានសួរអីទេ គេវាយខ្នោះគាត់ដាក់ឡានតែម្ដង។ ខ្ញុំសួររកដីកា ហើយគេថាដីកាគេឱ្យប៉ូលិសប៉ុស្តិ៍បង្ហាញ ដល់ពេលខ្ញុំទៅរកប៉ូលិសប៉ុស្តិ៍ អត់មាន»។
អ្នកស្រីបន្តថា ក្រោយពីចាប់ខ្លួនរួច សមត្ថកិច្ចទើបបង្ហាញដីកា បន្ទាប់ពីបងរបស់គាត់យកសម្លៀកបំពាក់ទៅឱ្យគ្រួសាររបស់គាត់នៅអធិការស្រុក។ អ្នកស្រីបន្តថា ដីកាដែលសមត្ថកិច្ចបង្ហាញនោះ ជាដីកាឱ្យគ្រួសារគាត់ចូលបំភ្លឺនៅតុលាការឱ្យបានមុនថ្ងៃទី២៩ ខែកញ្ញានេះ ពាក់ព័ន្ធនឹងការក្លែងបន្លំឯកសាររឿងដីធ្លី។
នាយករងទទួលបន្ទុកកម្មវិធីឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត សង្កេតឃើញថា ការចាប់ខ្លួនអតីតសកម្មជនបក្សប្រឆាំង ធ្វើឡើងបន្ទាប់ពីការឆ្លងឆ្លើយពាក្យសម្ដីរវាងមេដឹកនាំនយោបាយនាពេលថ្មីៗនេះ។
លោកបន្តថា អ្នកនយោបាយគួរតែងាកមកជជែកគ្នាស្វែងរកដំណោះស្រាយ ដោយកម្កល់ផលប្រយោជន៍ជាតិជាធំ ដើម្បីរួមគ្នាអភិវឌ្ឍប្រទេសជាតិ ហើយធ្វើការប្រកួតប្រជែងគ្នាតាមរយៈការបោះឆ្នោតដោយសេរីនិងយុត្តិធម៌វិញទើបប្រសើរជាង។
លោកថា៖ «អ្វីសំខាន់ទៀត កម្ពុជាយើងគួរតែពិនិត្យដែរ ក្នុងការរិះគន់លទ្ធិប្រជាធិបតេយ្យនិងគោរពសិទ្ធិមនុស្សកន្លងមក [ថា]តើកម្ពុជាយើងមានចំណុចខ្វះចន្លោះអី! ខ្វះអី! បើសិនជាយើងនាំគ្នាកែលម្អនិងបំពេញបន្ថែម អាហ្នឹងវាជាផលប្រយោជន៍រួមរបស់ប្រទេសកម្ពុជា។ បើមិនអ៊ីចឹង ការរិះគន់ទាក់ទងនឹងបញ្ហាសិទ្ធិមនុស្សនៅតែមានបន្ត។ ហើយយើងឃើញហើយ បទពិសោធន៍កន្លងមក ការដាក់ទណ្ឌកម្មលើទៅបុគ្គលមួយចំនួននៅកម្ពុជាដែលគេថាមានការបំពានសិទ្ធិមនុស្សជាដើមអីហ្នឹង អាហ្នឹងវាមិនមែនជាផលចំណេញសម្រាប់កម្ពុជាទេ»។
គិតចាប់ពីខែមករា ដើមឆ្នាំ២០២០មក អតីតសកម្មជនគណបក្សសង្រ្គោះជាតិ រួមទាំងសកម្មជនការពារបរិស្ថានផង ចំនួនជាង៤០នាក់ហើយត្រូវបានអាជ្ញាធរចាប់ខ្លួន។ ពួកគេត្រូវរងការចោទប្រកាន់ពីបទ «រួមគំនិតក្បត់ជាតិ» និង «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» ជាដើម៕
