ក្រសួងការងារ និងបណ្ដុះបណ្ដាលវិជ្ជាជីវៈ ណែនាំបន្ថែមដល់ម្ចាស់ឬនាយករោងចក្រសហគ្រាសទាំងអស់ ត្រៀមឧបករណ៍ធ្វើតេស្តរហ័សរកមេរោគកូវីដ-១៩ សម្រាប់ធ្វើតេស្តកម្មករនិយោជិតរបស់ខ្លួន ក្រោយពេលឈប់សម្រាកបុណ្យភ្ជុំបិណ្ឌ ប៉ុន្តែថា ការធ្វើតេស្តនេះផ្អែកតាមការស្ម័គ្រចិត្តនិងមិនមានការផាកពិន័យលើអ្នកមិនអនុវត្តតាមការណែនាំនេះឡើយ។
សេចក្តីណែនាំបន្ថែមរបស់ក្រសួងការងារ ចុះថ្ងៃទី០៤ ខែតុលា ឆ្នាំ២០២១នេះ បានលើកឡើងថា ដើម្បីចូលរួមទប់ស្កាត់ការរីករាលដាលទ្រង់ទ្រាយធំនៃជំងឺកូវីដ-១៩ នៅតាមរោងចក្រ សហគ្រាស ក៏ដូចជាការរៀនរស់នៅតាមគន្លងប្រក្រតីថ្មី និងការត្រៀមបើកសកម្មភាពសេដ្ឋកិច្ចឡើងវិញ ក្រសួងបានលើកទឹកចិត្តដល់ម្ចាស់រោងចក្រសហគ្រាសទាំងអស់ត្រៀមឧបករណ៍ធ្វើតេស្តរហ័សរកមេរោគកូវីដ-១៩ សម្រាប់ធ្វើតេស្តកម្មករនិយោជិតរបស់ខ្លួន ក្រោយពេលឈប់សម្រាកបុណ្យភ្ជុំបិណ្ឌ។
តែយ៉ាងណា ក្រសួងថា ការធ្វើតេស្តរហ័សនេះផ្អែកលើគោលការណ៍ស្ម័គ្រចិត្ត និងមិនមានការផាកពិន័យទៅលើម្ចាស់រោងចក្រ សហគ្រាស និងកម្មករនិយោជិតឡើយ។
ក្រសួងក៏ណែនាំដល់កម្មករនិយោជិតដែលបានឈប់សម្រាកក្នុងពិធីបុណ្យភ្ជុំបិណ្ឌ ត្រូវអនុវត្តឱ្យខ្ជាប់ខ្ជួននូវវិធានការ «៣កុំ និង៣ការពារ» ជាពិសេសពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាពបុគ្គលក្នុងពេលធ្វើដំណើរដោយរថយន្តរួម និងត្រូវយកតាមខ្លួននូវទឹកអាល់កុលឬជែលលាងដៃ។
នេះជាការណែនាំបន្ថែមរបស់ក្រសួងការងារ ក្រោយពីខ្លួនបានចេញសេចក្តីណែនាំដូចគ្នានេះម្តងរួចមកហើយកាលពីថ្ងៃទី២៨ ខែកញ្ញា ឆ្នាំ២០២១ ដោយពេលនោះ ក្រសួងគ្រាន់តែបានណែនាំដល់ម្ចាស់រោងចក្រទាំងអស់ត្រូវធ្វើតេស្តរកវីរុសកូវីដ-១៩ទៅលើកម្មករនិយោជិត ដោយមិនបានបញ្ជាក់ថា មានវិធានការផាកពិន័យឬមិនផាកពិន័យនោះឡើយ៕
