កម្មករ–កម្មការិនីជាង ៣០០នាក់ បម្រើការងារនៅរោងចក្រ ខេមបូ ហ៊ែនសាំ (CAMBO HANDSOME LTD) ស្ថិតក្នុងសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ បាននាំគ្នាបិទទ្វាររោងចក្រ ដោយកម្មករថា រោងចក្រនៅតែបើកដំណើរការ តែមិនផ្ដល់សំណងដល់កម្មករដែលរោងចក្របានបញ្ឈប់។
កម្មករ និងប្រធានសហជីព ស៊ីខៅឌូ ប្រចាំរោងចក្រ ខេមបូ ហ៊ែនសាំ លោក នេត តារាវុធ ប្រាប់វីអូឌីនៅថ្ងៃអង្គារថា នាព្រឹកនេះ កម្មករជាង ៣០០នាក់ បានមកបិទទ្វាររោងចក្រ។ កម្មករដែលមកបិទទ្វាររោងចក្រនេះ ក្រោយរោងចក្រប្រកាសបិទដំណើរការការងារឬអាជីវកម្មរបស់ខ្លួន តែកម្មករនៅតែឃើញមានកម្មករផ្សេងចូលមកធ្វើការជាធម្មតា។
លោកបន្ថែមថា ថៅកែរោងចក្របានបិទទ្វារអាជីវកម្មដោយមិនបានជូនដំណឹងត្រឹមត្រូវ និងបញ្ឈប់កម្មករទាំងអស់ពីការងារដោយមិនបានទូទាត់អត្ថប្រយោជន៍ផ្សេងៗជូនកម្មករឱ្យបានត្រឹមត្រូវតាមផ្លូវច្បាប់នៅឡើយ។ លោកបន្តថា ការបញ្ចប់កិច្ចសន្យាការងារកម្មករពេលនេះ គឺភាគីរោងចក្រដោះស្រាយចំណុចដែលកម្មករទាមទារបានតែ ៤ចំណុច ប៉ុណ្ណោះ ក្នុងចំណោម ៥ចំណុច ដែលកម្មករបានស្នើសុំ។
លោក នេត តារាវុធ លើកឡើងថា កម្មករគ្រាន់តែចង់បានការទូទាត់អត្ថប្រយោជន៍ចំនួន ៥ចំណុច រួមមាន ប្រាក់ឈ្នួលចុងក្រោយ ប្រាក់ជួសឱ្យការឈប់សម្រាកប្រចាំឆ្នាំដែលនៅសស់ ប្រាក់ជួសឱ្យការជូនដំណឹងមុន ប្រាក់អតីតភាពការងារឆ្នាំ២០២៣ និងមុនឆ្នាំ២០១៩ដែលនៅសស់ និងសំណងជំងឺចិត្ត។
លោកមានប្រសាសន៍ថា៖ «ដោយសារក្រុមហ៊ុនអត់ទូទាត់ប្រាក់ប្រាំចំណុចឱ្យកម្មករ ដល់អ៊ីចឹងកម្មករបិទផ្លូវ មានខាងអភិបាលខណ្ឌ និងក្រសួងចុះមកដែរ ដាក់ឈ្មោះថា “បិទ” តែឱ្យកម្មករចូលធ្វើការធម្មតា»។
ប្រធានសហជីពបន្តថា មូលហេតុដែលថៅកែរោងចក្រចង់ឱ្យកម្មករដែលធ្លាប់ធ្វើការច្រើនឆ្នាំឈប់ធ្វើការ ដើម្បីកេងចំណេញ និងចង់បង្កើតរោងចក្រសាជាថ្មីប៉ុណ្ណោះ។
លោកថា៖ «មានគំនិតចង់ដកចេញកម្មករចាស់ៗចោល តែដោយមិនគោរពច្បាប់ យកផលចំណេញពីកម្មករ គិតលុយអត់គ្រប់គ្រាន់ពីកម្មករ។ ទីមួយ រោងចក្រចង់បើកថ្មី ដើម្បីកាត់បន្ថយពន្ធ»។
វីអូឌី បានព្យាយាមសុំការឆ្លើយតបពីអភិបាលខណ្ឌពោធិ៍សែនជ័យ លោក ហែម ដារិទ្ធិ ប៉ុន្តែមិនមានការឆ្លើយតបទេ នៅថ្ងៃអង្គារ។ ចំណែកស្ត្រីម្នាក់ដែលជាអ្នកទទួលទូរសព្ទខាងភាគីរោងចក្រ ខេមបូ ហ៊ែនសាំ បានបដិសេធក្នុងការបញ្ចេញអត្តសញ្ញាណ និងសុំមិនឆ្លើយតបជុំវិញករណីនេះឡើយ។
អ្នកសម្របសម្រួលសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ប្រចាំរាជធានីភ្នំពេញ លោក ឃឹម មករា មានប្រសាសន៍ថា នៅរសៀលថ្ងៃទី៧ ខែកុម្ភៈ សហជីពកំពុងពិភាក្សា និងស្វែងរកដំណោះស្រាយជាមួយភាគីក្រុមហ៊ុន ដោយមានការសម្របសម្រួលពីក្រសួងការងារ ប៉ុន្តែនៅមិនទាន់ទទួលបានលទ្ធផលយ៉ាងណានៅឡើយទេ។
កាលពីថ្ងៃទី១ ខែកុម្ភៈ ឆ្នាំ២០២៣ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានដាក់លិខិតមួយទៅប្រធាននាយកដ្ឋានវិវាទការងារ នៃក្រសួងការងារ និងបណ្តុះបណ្តាលវិជ្ជាជីវៈ ឱ្យជួយអន្តរាគមន៍ និងដោះស្រាយវិវាទការងារជូនកម្មករនៅក្រុមហ៊ុន ខេមបូ ហ៊ែនសាំ (CAMBO HANDSOME LTD) ឱ្យស្របទៅតាមច្បាប់ការងារ បន្ទាប់ពីក្រុមហ៊ុនប្រកាសបិទអាជីវកម្ម និងបញ្ចប់កិច្ចសន្យាការងាររកម្មករនិយោជិតទាំងអស់។
លិខិតដដែលឱ្យដឹងថា កាលពីថ្ងៃទី៣១ ខែមករា ឆ្នាំ២០២៣ និយោជកក្រុមហ៊ុន ខេមបូ ហ៊ែនសាំ អិលធីឌី បានជូនដំណឹងអំពីការបិទប្រតិបត្តិការផលិតកម្មរបស់ក្រុមហ៊ុន និងការបញ្ចប់កិច្ចសន្យាការងាររបស់កម្មករ-និយោជិតទាំងអស់ ប៉ុន្តែការទូទាត់ប្រាក់បំណាច់បញ្ចប់កិច្ចសន្យាការងារ មិនបានត្រឹមត្រូវតាមច្បាប់ស្ដីពីការងារនោះទេ។
ស៊ីខៅឌូ និយាយទៀតថា ការដាក់ពាក្យបណ្តឹងទៅប្រធាននាយកដា្ឋនវិវាទការងារ ឱ្យអន្តរាគមន៍ និងជួយដោះស្រាយនេះ ដើម្បីជំរុញឱ្យនិយោជកក្រុមហ៊ុនខាងលើ អនុវត្តច្បាប់កម្ពុជាឱ្យកាន់តែល្អប្រសើរ និងទប់ស្កាត់ការរីករាលដាលនៃបញ្ហាផ្សេងទៀតផងដែរ៕
