ក្រសួងធនធានទឹក និងឧតុនិយម អំពាវនាវឱ្យប្រុងប្រយ័ត្នពីកត្តាអាកាសធាតុដែលនឹងចូលមកដល់នៅសប្ដាហ៍ក្រោយនេះ ដោយសារតែកម្ពុជារងឥទ្ធិពលព្យុះ បង្កឱ្យរាជធានី-ខេត្តចំនួន១២ប្រឈមនឹងជំនន់ទឹកភ្លៀង ក្នុងនោះមានទាំងរាជធានីភ្នំពេញផងដែរ និងខេត្តខ្លះទៀតជួបបញ្ហាខ្យល់កន្ទ្រាក់។
សេចក្ដីជូនដំណឹងរបស់ក្រសួងធនធានទឹក និងឧតុនិយម ចុះថ្ងៃទី៥ ខែតុលា ឆ្នាំ២០២១ ថាកម្ពុជានឹងរងឥទ្ធិពលព្យុះពីមហាសមុទ្រចិនខាងត្បូង នៅថ្ងៃទី៨ ខែតុលា ដែលស្ថានភាពនេះនឹងបង្កឱ្យរាជធានី-ខេត្តចំនួន១២អាចប្រឈមនឹងជំនន់ទឹកភ្លៀងចាប់ពីថ្ងៃទី១០ ដល់ថ្ងៃទី១២ ខែតុលា។
បើតាមក្រសួង រាជធានី-ខេត្តដែលប្រឈមនឹងឥទ្ធិពលអាកាសធាតុនេះ រួមមាន រាជធានីភ្នំពេញ ខេត្តកណ្ដាល ស្វាយរៀង ព្រៃវែង កំពង់ស្ពឺ តាកែវ កំពង់ឆ្នាំង ពោធិ៍សាត់ កំពង់ធំ សៀមរាប កោះកុង និងខេត្តព្រះសីហនុ។
មួយវិញទៀត ក្រសួងថា សម្រាប់ខេត្តព្រះវិហារ ឧត្ដរមានជ័យ កំពង់ចាម និងត្បូងឃ្មុំ មានភ្លៀងផ្គរ រន្ទះកម្រិតពីមធ្យមទៅខ្លាំង បង្កជាខ្យល់កន្ត្រាក់ ដែលត្រូវបង្កើនការប្រុងប្រយ័ត្ន ពិសេសតំបន់មាត់សមុទ្រមានរលកសមុទ្រពីមធ្យមទៅខ្ពស់៕