ក្រសួងធនធានទឹក និងឧតុនិយម ឱ្យដឹងថា ស្ថានភាពអាកាសធាតុនៅតាមបណ្ដាខេត្តមួយចំនួនក្នុងតំបន់ទំនាបកណ្ដាល តំបន់ខ្ពង់រាប និងតំបន់មាត់សមុទ្រ អាចនឹងចុះត្រជាក់ចន្លោះពី១៦ទៅ២០អង្សាសេ ទៅតាមតំបន់នីមួយៗ។
សេចក្ដីជូនដំណឹងរបស់ក្រសួងធនធានទឹក និងឧតុនិយម ស្ដីពីស្ថានភាពអាកាសធាតុ ដែលចេញផ្សាយនៅថ្ងៃទី១៣ ខែធ្នូ ឆ្នាំ២០២២នេះ បានលើកឡើងថា ក្នុងមួយសប្ដាហ៍ខាងមុខ កម្ពុជានឹងទទួលរងឥទ្ធិពលពីទ្រនុងសម្ពាធខ្ពស់(ចិន) និងខ្យល់មូសុងឦសាន ក្នុងកម្រិតពីបង្គួរទៅខ្លាំង ដែលស្ថានភាពនេះនឹងធ្វើឱ្យតំបន់ទំនាបកណ្ដាល តំបន់ខ្ពង់រាប និងតំបន់មាត់សមុទ្រ នឹងចុះត្រជាក់។
ប្រភពដដែលបន្តថា សម្រាប់នៅតំបន់ខ្ពង់រាប ដែលមានដូចជា ខេត្តបន្ទាយមានជ័យ ប៉ៃលិន សៀមរាប និងខេត្តបាត់ដំបង អាកាសធាតុអាចនឹងចុះត្រជាក់ក្នុងរង្វង់ពី១៦ទៅ១៩អង្សាសេ ខណៈតំបន់ខ្ពង់រាប រួមមាន ខេត្តមណ្ឌលគិរី រតនគិរី ព្រះវិហារ និងឧត្ដរមានជ័យ សីតុណ្ហភាពអប្បបរមានឹងអាចចុះត្រជាក់ក្នុងរង្វង់ពី១៦ទៅ១៨អង្សាសេ។
ចំណែកតំបន់មាត់សមុទ្រ ក្រសួងថា សីតុណ្ហភាពអប្បបរមានឹងអាចចុះត្រជាក់ក្នុងរង្វង់ពី១៨ទៅ២០អង្សាសេ ហើយនៅលើផ្ទៃសមុទ្រអាចមានរលកក្នុងកម្រិតពីមធ្យមទៅបង្គួរ។
ករណីនេះ ក្រសួងបានអំពាវនាវដល់ប្រជាពលរដ្ឋ និងកងទ័ពដែលរស់នៅ និងឈរជើងនៅតំបន់ជួរភ្នំដងរែក និងខ្ពង់រាបឦសាន ព្រមទាំងប្រជានេសាទ បង្កើនការយកចិត្តទុកដាក់ថែរក្សាសុខភាពចំពោះស្ថានភាពចុះត្រជាក់នេះ៕
