ប្រជាពលរដ្ឋជិត១ ០០០គ្រួសារ នៅស្រុកចំនួន៣ ក្នុងខេត្តកោះកុង ដែលអះអាងថា កំពុងមានជម្លោះដីធ្លីជាមួយក្រុមហ៊ុនរបស់លោកឧកញ៉ា លី យ៉ុងផាត់ បានរកកិច្ចអន្តរាគមន៍ពីអាជ្ញាធរស្រុកឱ្យជួយដោះស្រាយវិវាទដីធ្លី ក្រោយជម្លោះអូសបន្លាយជាង១០ឆ្នាំគ្មានការដោះស្រាយ។
ពលរដ្ឋ៥នាក់ តំណាងឱ្យ៨៤៣គ្រួសារ នៅថ្ងៃទី១១ ខែតុលា ឆ្នាំ២០២១នេះ បាននាំគ្នាយកញត្តិទៅដាក់នៅរដ្ឋបាលស្រុកបទុមសាគរជាថ្មីទៀត ដើម្បីជំរុញទៅអាជ្ញាធរស្រុកនេះពន្លឿនការដោះស្រាយបញ្ចប់វិវាទដីធ្លីរបស់ពួកគាត់។
ក្នុងញត្តិនោះបានលើកឡើងថា ប្រជាពលរដ្ឋ៨៤៣គ្រួសារ និងមានដីសរុប១ ៧២៧,៦ហិកតា ស្ថិតក្នុងស្រុកបទុមសាគរ ស្រុកស្រែអំបិល និងស្រុកថ្មបាំង ខេត្តកោះកុង ត្រូវបានក្រុមហ៊ុន «កោះកុងស៊ូហ្គើ» និង «កោះកុងផ្លេនថេសិន» របស់លោកឧកញ៉ា លី យ៉ុងផាត់ សមាជិកព្រឹទ្ធសភា ឈូសឆាយរំលោភយកអស់តាំងពីឆ្នាំ២០០៦។
ក្នុងញត្តិនេះ ក្រុមពលរដ្ឋអះអាងថា ដីនោះ ពួកគេបានកាន់កាប់និងចូលអាស្រ័យផលតាំងពីឆ្នាំ១៩៧៩ ហើយអ្នកខ្លះទៀតបានកាន់កាប់នៅឆ្នាំ២០០០ ដោយអ្នកខ្លះធ្វើចម្ការ អ្នកខ្លះធ្វើស្រែនិងដាំដំណាំហូបផ្លែផ្សេងៗទៀតសម្រាប់ចិញ្ចឹមជីវិត ដោយពុំមានអាជ្ញាធរណាទៅហាមឃាត់ឬរារាំងឡើយ។
ញត្តិដដែលបន្តថា ទើបតែនៅឆ្នាំ២០០៦ ក្រុមហ៊ុនរបស់លោក លី យ៉ុងផាត់ បានទៅឈូសឆាយផលដំណាំរបស់ពួកគាត់អស់ដើម្បីយកដីដាំអំពៅ ហើយបានបង្ខំឱ្យពលរដ្ឋយកសំណងបន្តិចបន្តួច។
លោក ឈឹម សាផាន ដែលអះអាងថាជាតំណាងពលរដ្ឋ ប្រាប់ វីអូឌី នៅថ្ងៃចន្ទនេះថា ពលរដ្ឋបានតវ៉ាជាច្រើនឆ្នាំ និងបានរកកិច្ចអន្តរាគមន៍ពីអាជ្ញាធរក្រោមជាតិ និងស្ថាប័នថ្នាក់ជាតិជាច្រើនកន្លែងដែរ ប៉ុន្តែរហូតពេលនេះ មិនទាន់ទទួលបានដំណោះស្រាយនៅឡើយទេ។
លោកបន្តថា សំណងដែលអ្នកភូមិចង់បានគឺសុំការផ្ដល់ដី២ហិកតា និងលុយសំណងខូចផលដំណាំ៥០០០ដុល្លារប៉ុណ្ណោះក្នុងមួយគ្រួសារ ខណៈការបាត់បង់ដីធ្លីជាង១០ឆ្នាំមកនេះបានធ្វើឱ្យពួកគាត់គ្មានដីសម្រាប់បង្កបង្កើនផល និងពលរដ្ឋខ្លះធ្លាក់ខ្លួនក្រីក្រ ជាដើម។
លោកបន្ថែមថា៖ «ប្រសិនបើនៅតែអត់មានដំណោះស្រាយទេ ប្រជាសហគមន៍យើងនឹងទៅរស់នៅលើដីរបស់ពួកយើងដែលបានបាត់បង់វិញហើយ ព្រោះដីនោះគេទុកចោលអត់ធ្វើអីទេឥលូវនេះ។ យើងក៏បានដាក់ញត្តិជម្រាបជូនអាជ្ញាធររួចហើយដែរ។ ប្រជាសហគមន៍យើងចង់បានតែ៥ ០០០ដុល្លារ និងដី២ហិកតាទេ ព្រោះដីពួកយើងដែលបាត់បង់នោះវាច្រើនហួសទៅហើយ»។
តំណាងពលរដ្ឋរូបនេះបន្ថែមថា អ្នកភូមិកំពុងរកវិធានការ ដើម្បីប្ដឹងលោក លី យ៉ុងផាត់ ទៅតុលាការ និងសហគមន៍អន្តរជាតិផងដែរ ប្រសិនបើពួកគេនៅតែមិនទទួលបានការដោះស្រាយ។
អភិបាលស្រុកបទុមសាគរ លោក ហាក់ ឡេង មានប្រសាសន៍ថា អាជ្ញាធរស្រុកមិនអាចដោះស្រាយទៀតបានទេ ព្រោះករណីនេះ ខាងក្រសួងរៀបចំដែនដី និងអាជ្ញាធរពាក់ព័ន្ធ បានដោះស្រាយឱ្យចប់យូរហើយ។ លោកថា ពលរដ្ឋទាំងនោះមកទាមទារម្តងទៀតតែប៉ុណ្ណោះ។
លោកបន្ថែមថា៖ «ព្រោះការងារនេះ ក្រសួងគេដោះស្រាយចប់អស់ហើយ។ រឿងចាស់ទេ! ប៉ុន្តែពួកគាត់ចេះមកតវ៉ាទាមទារទៀត»។
វីអូឌី មិនអាចសុំការឆ្លើយតបពីអ្នកនាំពាក្យក្រសួងរៀបចំដែនដី លោក សេង ឡូត និងលោកឧកញ៉ា លី យ៉ុងផាត់ បានទេ នៅថ្ងៃចន្ទនេះ។
ជុំវិញជម្លោះដីធ្លីនេះ មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា កន្លងមក អាជ្ញាធរបានដោះស្រាយបញ្ចប់វិវាទប្រហែលជា៥ក្រុមរួចមកហើយ។ ប៉ុន្តែលោកថា ក្រោយមកក៏មានមួយក្រុមផ្សេងទៀតបានអះអាងថា ពួកគេក៏បាត់បង់ដីធ្លីដោយសារក្រុមហ៊ុននេះរំលោភយកដែរ ហើយបានផ្ទុះការតវ៉ាដើម្បីទាមទារសំណង។
លោកបន្ថែមថា៖ «បើសិនជាពួកគាត់ពិតជាប្រជាពលរដ្ឋដែលបានរងផលប៉ះពាល់ដីស្រែដីចម្ការដោយសារក្រុមហ៊ុនរំលោភយកមែន អាជ្ញាធរមិនបាច់គិតថាពួកគាត់ជាអ្នកតវ៉ាមុនឬអ្នកតវ៉ាក្រោយទេ បើសិនជាពួកគាត់ជាជនរងគ្រោះពិតប្រាកដ គួរតែមានដំណោះស្រាយណាមួយសមរម្យជូនពួកគាត់ដែរ ដើម្បីឈានទៅរកការដោះស្រាយបញ្ចប់ជម្លោះដីធ្លីនៅក្នុងខេត្តកោះកុង»។
កាលពីថ្ងៃទី២១ ខែកញ្ញា ឆ្នាំ២០២០ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្ដីប្រកាសព័ត៌មានមួយ ដោយបដិសេធមិនដោះស្រាយជូនក្រុមពលរដ្ឋ៨៤៣គ្រួសារនេះទេ ក្រោមហេតុផលថា ក្រសួងបានដោះស្រាយជូនពួកគេរួចរាល់ហើយ៕
