រដ្ឋមន្ត្រីក្រសួងមហាផ្ទៃ បញ្ជាទៅអាជ្ញាធរពាក់ព័ន្ធគ្រប់លំដាប់ថ្នាក់ត្រៀមទប់ស្កាត់ក្រុមប្រឆាំងដែលចេញទៅរារាំងការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅពាក់កណ្ដាលឆ្នាំក្រោយ ដើម្បីរក្សាសន្តិសុខជាតិជូនប្រជាពលរដ្ឋម្ចាស់ឆ្នោត។
ក្នុងពិធីប្រកាសចូលកាន់តំណែងអភិបាល នៃគណៈអភិបាលខេត្តកំពត នារសៀលថ្ងៃពុធនេះ រដ្ឋមន្ត្រីក្រសួងមហាផ្ទៃ លោក ស ខេង បានថ្លែងថា ការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ខាងមុខនេះ នឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២ខាងមុខ។ ករណីនេះ លោកបញ្ជាទៅអាជ្ញាធរគ្រប់លំដាប់ថ្នាក់ រួមគ្នាទប់ស្កាត់ក្រុមប្រឆាំងដែលចេញទៅរារាំងការបោះឆ្នោត ដើម្បីរក្សាសន្តិសុខជូនប្រជាពលរដ្ឋម្ចាស់ឆ្នោតផងដែរ ។
លោកថ្លែងដូច្នេះថា៖ «ក្នុងន័យនេះ ខ្ញុំក៏សុំស្នើទៅក្រុមការងារ ក៏ដូចជារដ្ឋបាលគ្រប់លំដាប់ថ្នាក់ដែលមានការពាក់ព័ន្ធ មេត្តាគាំទ្រនិងចូលរួមធ្វើម៉េចឱ្យការរៀបចំធ្វើបញ្ជីឈ្មោះបោះឆ្នោតរបស់ គ.ជ.ប នេះ ទទួលបានជោគជ័យ ដោយរាប់តាំងពីការគាំទ្រផ្នែកសន្តិសុខ សណ្ដាប់ធ្នាប់សាធារណៈ កុំឱ្យមានការរំខានពីមជ្ឈដ្ឋានប្រឆាំងដែលប៉ុនប៉ងបំផ្លាញការបោះឆ្នោត និងបញ្ហាដទៃទៀតដែលពាក់ព័ន្ធ»។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ិន មានប្រសាសន៍ថា គណបក្សនេះនឹងត្រៀមខ្លួនចូលរួមការប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដរាបណាគណបក្សនេះមានសេរីភាពគ្រប់គ្រាន់ក្នុងការជួបជុំ ផ្សព្វផ្សាយគោលនយោបាយទៅកាន់ម្ចាស់ឆ្នោតបានទូលំទូលាយ ដូចបក្សកាន់អំណាច។
ចំណែកការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំក្រោយនេះ លោកមើលឃើញថា ទំនងជាមិនមានក្រុមប្រឆាំងចេញរារាំងការបោះឆ្នោតនោះទេ។ ប៉ុន្តែលោកយល់ថា រដ្ឋមន្ត្រីក្រសួងមហាផ្ទៃ លោក ស ខេង មិនគួរថ្លែងសារគំរាមកំហែងម្ចាស់ឆ្នោតបែបនេះទេ ដែលអាចធ្វើឱ្យក្រុមអ្នកធ្លាប់គាំទ្រអតីតបក្សប្រឆាំងមានការភ័យខា្លច មិនហ៊ានបញ្ចេញមតិយោបល់ផ្សេងៗជាដើម។
លោកមានប្រសាសន៍ថា៖ «អាចបង្កឱ្យមានការភ័យខ្លាចដល់អ្នកគាំទ្រអតីតគណបក្សសង្គ្រោះជាតិ អាចធ្វើឱ្យពួកគាត់ភ័យខ្លាចមិនហ៊ានចូលរួម មិនហ៊ានបញ្ចេញយោបល់ផ្សេងៗ កាលណាមានការលើកឡើងជាសារនយោបាយបែបនេះ»។
នាយកប្រតិបត្តិអង្គការ NICFEC លោក សំ គន្ធាមី មានប្រសាសន៍ថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដែលប្រព្រឹត្តទៅនៅពាក់កណ្ដាលឆ្នាំក្រោយនេះ លោកជឿថា មិនមានក្រុមប្រឆាំងណាទៅរារាំងការបោះឆ្នោតនោះទេ។
យ៉ាងណា លោកចាត់ទុកការលើកឡើងរបស់រដ្ឋមន្ត្រីក្រសួងមហាផ្ទៃ ថាជាសារគំរាមកំហែង បំភិតបំភ័យប្រជាពលរដ្ឋម្ចាស់ឆ្នោត ដែលផ្ទុយនឹងគោលការណ៍ច្បាប់។
លោកមានប្រសាសន៍ថា៖ «គំរាមកំហែង មានការបំភិតបំភ័យអ៊ីចឹង វាប៉ះពាល់ដល់ដំណើរការបោះឆ្នោតដោយសេរីនិងយុត្តិធម៌ហើយ ព្រោះការបោះឆ្នោតសេរី គឺគ្មានការបំភិតបំភ័យ គំរាមកំហែង ទិញសន្លឹកឆ្នោត សព្វបែបយ៉ាងហ្នឹង គឺអត់មានទេ»។
រដ្ឋាភិបាលកម្ពុជាបានកំណត់យកថ្ងៃទី៥ ខែមិថុនា ឆ្នាំ២០២២ ជាកាលបរិច្ឆេទសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ខណៈការបោះឆ្នោតជាតិជ្រើសរើសតំណាងរាស្ត្រនឹងធ្វើឡើងនៅខែកក្កដា ឆ្នាំ២០២៣។
អង្គការសង្គមស៊ីវិលទាំង៦៤ បានលើកឡើងថា អនុសាសន៍ឬលក្ខខណ្ឌទាបបំផុតសម្រាប់ការបោះឆ្នោតនៅពេលខាងមុខនេះ គឺផ្អែកលើរដ្ឋធម្មនុញ្ញ ច្បាប់ និងកតិកាសញ្ញាអន្តរជាតិ កិច្ចព្រមព្រៀងសន្តិភាពទីក្រុងប៉ារីស និងផ្អែកលើអនុសាសន៍ជាច្រើនទៀត ដែលផ្ដល់ដោយស្ថាប័នអង្គការសហប្រជាជាតិ និងភាគីពាក់ព័ន្ធផ្សេងៗទៀត៕
