ប្រទេសចិន កាលពីថ្ងៃសៅរ៍កន្លងទៅ បានបាញ់បង្ហោះរ៉ុក្កែតមួយដែលផ្ទុកអវកាសយានិកចំនួន៣នាក់ទៅកាន់ស្ថានីយអវកាសនាពេលអនាគតរបស់ខ្លួនដោយជោគជ័យ។
យានអវកាសដែលមានឈ្មោះថា Shenzhou-13 នេះ ត្រូវបានបង្ហោះចេញពីខេត្ត កានស៊ូ (Gansu) ភាគពាយព្យប្រទេសចិន នៅរំលងអធ្រាត្រឈានចូលថ្ងៃសៅរ៍ និងបានចូលចតដោយជោគជ័យនៅស្ថានីយអវកាសក្នុងរយៈពេលប្រមាណជា៦ម៉ោងបន្ទាប់ពីចាកចេញពីផែនដី។
ទាក់ទិននឹងករណីនេះ ប្រទេសចិនសង្ឃឹមថា នឹងបញ្ចប់ការសាងសង់ស្ថានីយអវកាសផ្ទាល់ខ្លួន ដើម្បីប្រជែងជាមួយស្ថានីយ៍អវកាសអន្តរជាតិ (International Space Station) នៅចុងឆ្នាំក្រោយ ហើយការបង្ហោះយានអវកាស Shenzhou-13 នេះ គឺជាបេសកកម្មទី២របស់ប្រទេសដែលត្រូវការសម្រាប់គម្រោងនេះ។
ក្នុងចំណោមអវកាសយានិកទាំង៣រូប ដែលរួមមានបុរស២នាក់ និងស្ត្រីម្នាក់ ក្នុងនោះ អ្នកស្រី វ៉ាង យ៉ាភីង (Wang Yaping) គឺជាស្ត្រីដំបូងគេដែលបានទៅដល់ស្ថានីយអវកាសចិននេះ។
បន្ទាប់ពីទៅដល់ស្ថានីយអវកាសនេះ អវកាសយានិកទាំង៣រូប ក៏នឹងត្រូវស្នាក់នៅទីនោះរយៈពេល៦ខែ ជាបេសកកម្មនៅទីអវកាសដែលមានរយៈពេលយូរបំផុតសម្រាប់ប្រទេសចិន ដោយពួកគេនឹងត្រូវធ្វើតេស្តបច្ចេកវិទ្យាសំខាន់ៗ រួមនឹងការងារមួយចំនួនទៀត។
គួរបញ្ជាក់ថា ប្រទេសចិនបានចំណាយពេលមួយទសវត្សរ៍ចុងក្រោយ ដើម្បីអភិវឌ្ឍបច្ចេកវិទ្យាអវកាសផ្ទាល់ខ្លួន ខណៈដែលខ្លួនត្រូវបានរារាំងដោយច្បាប់សហរដ្ឋអាមេរិកក្នុងការធ្វើការជាមួយអង្គការណាសា (NASA)។
ស្របពេលដែលស្ថានីយអវកាសអន្តរជាតិ នឹងឈប់ធ្វើប្រតិបត្តិការក្នុងរយៈពេលពីរទៅបីឆ្នាំខាងមុខនេះ ស្ថានីយអវកាសរបស់ចិនត្រូវបានរំពឹងថានឹងក្លាយជាស្ថានីយតែមួយគត់នៅក្នុងដែនអវកាស៕
