រដ្ឋាភិបាលបានប្រកាសឱ្យប្រើប្រាស់ក្រដាសប្រាក់ «៣ម៉ឺនរៀល» ប្រភេទថ្មី ដែលមានរូបលោកនាយករដ្ឋមន្ត្រី ហ៊ុន សែន និងសម្ដេចតា ដោយភ្ជាប់សារថា អបអរសាទរខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ដែលខួបនេះនឹងចូលមកដល់នៅថ្ងៃសៅរ៍ចុងសប្ដាហ៍នេះ។
អនុក្រឹត្យចុះថ្ងៃទី១៨ ខែតុលា ឆ្នាំ២០២១ រដ្ឋាភិបាលបានសម្រេចឱ្យប្រើប្រាស់ក្រដាសប្រាក់ថ្មីប្រភេទ «៣ម៉ឺនរៀល» ចាប់ពីថ្ងៃចុះហត្ថលេខាទៅ។ អនុក្រឹត្យនេះបញ្ជាក់ថា ធនាគារជាតិនៃកម្ពុជា មានភារកិច្ចចេញប្រកាស ដើម្បីផ្សព្វផ្សាយពីលក្ខណៈសម្គាល់នៃក្រដាសប្រាក់ប្រភេទថ្មីនេះ។
ដោយឡែក សេចក្ដីប្រកាសរបស់ធនាគារជាតិនៃកម្ពុជា បានប្រកាសថា ផ្ទៃខាងមុខនៃក្រដាសប្រាក់ ត្រូវបានរំលេចឡើងនូវព្រះឆាយាល័ក្ខណ៍មើលចំព្រះភក្ត្រនៃព្រះករុណា ព្រះបាទសម្ដេចព្រះនរោត្ដម សីហនុ ព្រះបរមរតនកោដ្ឋ នាឱកាសកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។ ចំណែកផ្នែកខាងខ្នងត្រូវបានរំលេចឡើងនូវព្រះឆាយាល័ក្ខណ៍ ព្រះករុណា ព្រះបាទសម្ដេចព្រះនរោត្ដម សីហនុ ព្រះបរមរតនកោដ្ឋ និងលោកនាយករដ្ឋមន្ត្រី ហ៊ុន សែន នាឱកាសនៃការយាងនិវត្តន៍មកកាន់មាតុភូមិវិញរបស់ព្រះករុណាព្រះបរមរតនកោដ្ឋ នៅថ្ងៃទី១៤ ខែវិច្ឆិកា ឆ្នាំ១៩៩១។
បន្ថែមពីនេះ នៅលើក្រដាសប្រាក់ប្រភេទ «៣ម៉ឺនរៀល» នេះវិញ នៅខាងក្រោមអក្សរធនាគារជាតិនៃកម្ពុជា បានសរសេរថា «អបអរខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស (១៩៩១-២០២១)» ។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានលើកឡើងនៅថ្ងៃចន្ទនេះថា រូបភាពនៅលើក្រដាសប្រាក់៣ម៉ឺនរៀលនោះ គឺចង់បង្ហាញពីប្រវត្តិសាស្ត្រ ដែលមានលោកនាយករដ្ឋមន្រ្តី ហ៊ុន សែន ជាបុគ្គលឆ្នើមមួយរូបក្នុងការជួយជ្រោមជ្រែងឱ្យមានកិច្ចព្រមព្រៀងនេះ។
លោកលើកឡើងថា៖ «វាបង្ហាញអំពីប្រវត្តិសាស្រ្ត ដែលជាប្រវត្តិសាស្រ្តរបស់កម្ពុជា ដែលជាបុគ្គលឆ្នើមទាំង២រូបហ្នឹង អ្នកដែលនាំមកនូវសន្តិភាពតាមប្រវត្តិសាស្រ្តកម្ពុជា ដែលជាអ្នកជួយផ្ចុងផ្ដើម ជួយជំរុញនៃកិច្ចព្រមព្រៀងសន្តិភាពទីក្រុងប៉ារីស»។
អតីតតំណាងរាស្ត្រគណបក្សសង្គ្រោះជាតិ និងជាស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន មានប្រសាសន៍ថា បើសិនជាគេគិតពីប្រវត្តិសាស្ត្រដ៏អស្ចារ្យសម្រាប់កម្ពុជា ហើយចង់លើកស្តារស្នាដៃរបស់វរជនខ្មែរដែលបានផ្សះផ្សាជាតិនិងបញ្ចប់សង្គ្រាមជាដើម រដ្ឋាភិបាលគួរយកថ្ងៃ២៣តុលា ជាថ្ងៃបុណ្យជាតិឡើងវិញ ប្រហែលជាប្រសើរជាងការបំផុសដាក់រូបថ្នាក់ដឹកនាំលើក្រដាសប្រាក់។
លោកថា៖ «យើងគាំទ្រសម្ដេចឪ លោកជាប្រធានកាលពីសម័យហ្នឹង ហើយលោកជាព្រះមហាក្សត្រ ការដែលដាក់រូបព្រះអង្គជារឿងត្រឹមត្រូវហើយ។ ក៏ប៉ុន្តែសម្ដេចនាយករដ្ឋមន្ត្រី ប្រជាពលរដ្ឋខ្មែរអបអរប៉ុនណាយើងមិនដឹង ក៏ប៉ុន្តែអ្នកគាំទ្រលោកច្បាស់ជាគាំទ្រហើយ»។
ដូចគ្នានេះដែរ នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត យល់ថា បញ្ហាសិទ្ធិមនុស្សនិងភាពផុយស្រួយនៃការបែកបាក់ជាតិនៅតែគំរាមកំហែងកម្ពុជា បើសារនេះមានតែនៅលើក្រដាសប្រាក់ទេនោះ។
លោកថា៖ «បញ្ហាវានៅសំខាន់បំផុតត្រង់ថា គ្រប់ភាគីអ្នកនយោបាយទាំងអស់ត្រូវធ្វើយ៉ាងណា ត្រូវមានឆន្ទៈ ដើម្បីរកនូវឯកភាពជាតិនិងសាមគ្គីភាពជាតិតែមួយឱ្យបាន អាហ្នឹងគឺជារឿងសំខាន់ […] ហើយនិងដើរតាមព្រះរាជតម្រិះព្រះករុណាព្រះបាទនរោត្ដម សីហនុ ព្រះបរមរតនកោដ្ឋនៃយើង»។
ប៉ុន្តែបើតាមអនុក្រឹត្យចុះថ្ងៃទី២ ខែសីហា ឆ្នាំ២០១៩ ទិវាសន្តិភាពទីក្រុងប៉ារីសត្រូវបានរដ្ឋាភិបាលលុបចេញពីប្រតិទិនឈប់សម្រាកប្រចាំឆ្នាំ ជាលើកទី២ ចាប់ពីឆ្នាំ២០២០មក ក្នុងនោះក៏មានទាំង «ទិវាសិទ្ធិមនុស្សអន្តរជាតិ១០ធ្នូ» ផងដែរ ក្រោមហេតុផលថា ដើម្បីសម្រួលបន្ទុកអ្នកវិនិយោគដែលត្អូញត្អែរថា កម្ពុជាមានថ្ងៃបុណ្យជាតិឈប់សម្រាកច្រើនពេក៕
