ពលរដ្ឋមួយក្រុមដែលកំពុងមានជម្លោះដីធ្លីជាមួយក្រុមហ៊ុន «ហេង ហ៊ុយ អេគ្រីខាល់ឈ័រ គ្រុប» ស្ថិតក្នុងស្រុកស្រែអំបិល ខេត្តកោះកុង បាននាំគ្នាធ្វើយុទ្ធនាការតាមបណ្ដាញសង្គម ទាមទារការដោះស្រាយវិវាទដីធ្លី និងទម្លាក់ចោលការចោទប្រកាន់លើតំណាងរបស់ពួកគេ។
កាលពីថ្ងៃទី១៨ ខែតុលា ឆ្នាំ២០២១ ពលរដ្ឋមួយក្រុមដែលកំពុងមានបញ្ហាដីធ្លីនៅខេត្តកោះកុង បាននាំគ្នាធ្វើយុទ្ធនាការដោយឈរលើកបដាផ្សព្វផ្សាយតាមហ្វេសប៊ុករបស់ពួកគេរៀងៗខ្លួន ដោយស្នើសុំដល់លោកនាយករដ្ឋមន្ត្រី ហ៊ុន សែន ឱ្យជួយដោះស្រាយវិវាទដីធ្លីរបស់ពួគេ និងស្នើដល់តុលាការខេត្តកោះកុងទម្លាក់ចោលការចោទប្រកាន់លើតំណាងពលរដ្ឋ១០នាក់ដែលកំពុងរងបណ្ដឹងនៅស្ថាប័នមួយនេះផងដែរ។
ក្នុងបដាដែលពលរដ្ឋលើកបានសរសេរថា «ដីជាអាយុជីវិតរបស់ពួកគេ ១៩៧គ្រួសារ នៅភូមិតានី ឃុំជីខលើ ស្រុកស្រែអំបិល ខេត្តកោះកុង» និងបានទាមទារទៅលោក ហេង ហ៊ុយ ជាមន្ត្រីនគរបាលនៅខេត្តកោះកុង សងដីជូនប្រជាពលរដ្ឋ១៩៧គ្រួសារវិញ។ ក្នុងបដាទាំងនោះក៏បានសរសេរទាមទារឱ្យតុលាការខេត្តកោះកុងទម្លាក់ការចោទប្រកាន់លើតំណាងពលរដ្ឋ១០នាក់ផងដែរ។
អ្នកស្រី ដេត ហួរ ដែលអះអាងថាជាតំណាងប្រជាពលរដ្ឋ និងកំពុងជាប់បណ្ដឹងនៅតុលាការ ប្រាប់ វីអូឌី នៅថ្ងៃអង្គារនេះថា ការដែលពួកគាត់ជ្រើសរើសយកការតស៊ូមតិតាមរយៈអនឡាញនេះ ដោយសារបញ្ហាជំងឺកូវីដ-១៩ ដែលធ្វើឱ្យពួកគាត់មិនអាចទៅប្រមូលផ្តុំតាមស្ថាប័នពាក់ព័ន្ធផ្សេងៗទៀតបានឡើយ។ ប៉ុន្តែអ្នកស្រីថា ពេលជំងឺកូវីដ-១៩ស្ងាត់ទៅវិញ ពួកគាត់នឹងឡើងមកតវ៉ាតាមស្ថាប័នរដ្ឋនៅថ្នាក់ជាតិបន្តទៀត ប្រសិននៅតែពុំមានដំណោះស្រាយ។
តំណាងពលរដ្ឋរូបនេះឱ្យដឹងទៀតថា ដីទំហំ១ ២០០ហិកតារបស់អ្នកភូមិ១៩៧គ្រួសារនេះ ត្រូវបានក្រុមហ៊ុនរបស់លោក ហេង ហ៊ុយ ដែលជាមន្ត្រីនគរបាលខេត្តកោះកុង រំលោភយកអស់តាំងពីឆ្នាំ២០០៧។ ហើយលោក ហេង ហ៊ុយ បានប្ដឹងតំណាងពលរដ្ឋ១០នាក់ទៅតុលាការពីបទ «បរិហារកេរិ៍្តជាសាធារណៈ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» យ៉ាងអយុត្តិធម៌ថែមទៀត។
អ្នកស្រី ដេត ហួរ បន្ថែមថា៖ «ពួកយើងរាល់ថ្ងៃនេះជាប់បណ្ដឹងនៅតុលាការ ដោយសារតែរឿងតវ៉ាដីធ្លី។ អ៊ីចឹងសូមឱ្យអាជ្ញាធរនិងតុលាការពិចារណាទម្លាក់ចោលការចោទប្រកាន់លើពួកយើង និងចុះមកពិនិត្យដីធ្លីដល់កន្លែងជាក់ស្តែង និងដោះស្រាយដីធ្លីជូនពួកយើងនៅភូមិតានីនេះផ្ទាល់។ ពលរដ្ឋពួកយើងកើតទុក្ខមិនសុខចិត្ត និងធ្លាក់ខ្លួនក្រីក្រដល់សព្វថ្ងៃនេះ និងកូនចៅអត់បានទៅរៀនសូត្រ ដោយសារតែការបាត់បង់ដីធ្លី អត់ដីសម្រាប់បង្កបង្កើនផល។ អ៊ីចឹងខ្ញុំសូមអំពាវនាវដល់សម្ដេចជួយដោះស្រាយដីធ្លីពលរដ្ឋដែលបាត់បង់ដោយសារលោក ហេង ហ៊ុយ រំលោភយកនេះផង»។
តំណាងពលរដ្ឋម្នាក់ទៀត អ្នកស្រី អិប តឹង ដែលកំពុងជាប់បណ្ដឹងនៅតុលាការដែរនោះ បាននិយាយថា វាជារឿងអយុត្តិធម៌មួយដែលពួកគាត់បាត់បង់ដីធ្លីនិងបាត់បង់មុខរបរ ដោយសារក្រុមហ៊ុនមួយនេះប្ដឹងពួកគាត់ទៅតុលាការ ហើយត្រូវបានតុលាការចាត់ការលើបណ្ដឹងនោះថែមទៀត។
អ្នកស្រីបន្តថា ទោះអ្នកភូមិបានបាត់បង់ដីធ្លីក្នុងចំនួនច្រើនដោយសារក្រុមហ៊ុន ហេង ហ៊ុយ ក៏ដោយ ប៉ុន្តែអ្នកភូមិទាមទារសំណងមកវិញត្រឹមតែដី២ហិកតា និងលុយ៧ ០០០ដុល្លារប៉ុណ្ណោះក្នុងមួយគ្រួសារ។ អ្នកស្រីថា ក្រុមហ៊ុនបានដាក់គ្រឿងចក្រឈូសឆាយស្រូវនិងផលដំណាំហូបផ្លែផ្សេងទៀតរបស់អ្នកភូមិ ដោយមិនបានដោះស្រាយសំណងឡើយ។
អ្នកស្រីបន្ថែមថា៖ «ខ្ញុំទទួលស្គាល់ថាមានបងប្អូនប្រជាពលរដ្ឋមួយចំនួន គាត់បានលក់ដីឱ្យលោក ហេង ហ៊ុយ មែន! គាត់លក់ដីព្រៃកន្លែងផ្សេងទេ! ប៉ុន្តែជាក់ស្តែង ដីស្រែដែលពួកគាត់ធ្វើអាស្រ័យផលរាល់ឆ្នាំហ្នឹង គឺគាត់មិនបានលក់! គឺហេង ហ៊ុយ យកដោយស្រស់ៗតែម្តង ហើយអត់មានដោះស្រាយសំណងអីជូនគាត់សោះតែម្តង។ ក្រុមខ្ញុំនេះទៅតវ៉ាដោយខ្លួនឯង អត់មានការញុះញង់ពីអ្នកណាទេ ពីព្រោះអីយើងបានបាត់បង់ដីពិតមែន។ ខ្ញុំមានការខកចិត្តខ្លាំងណាស់ យើងបាត់បង់ដីហើយ យើងតវ៉ាយកដីខ្លួនឯងមកវិញសោះ ត្រូវជាប់បណ្ដឹងទៀត»។
ប្រធានក្រុមហ៊ុន ហេង ហ៊ុយ គឺលោក ហេង ហ៊ុយ មានប្រសាសន៍ថា ដីដែលក្រុមហ៊ុនរបស់លោកកំពុងកាន់កាប់នោះ គឺជាដីមានបណ្ណកម្មសិទ្ធិត្រឹមត្រូវស្របទៅតាមច្បាប់ ដែលលោកបានប្រមូលទិញពីប្រជាពលរដ្ឋជាច្រើនឆ្នាំមកហើយ។
លោកបន្តថា ករណីពលរដ្ឋក្នុងចំនួនច្រើនដែលនាំគ្នាតវ៉ានិងប្ដឹងលោកថារំលោភយកដីធ្លីនោះ គឺធ្វើឡើងតាមការញុះញង់របស់មេខ្យល់តែប៉ុណ្ណោះ ហើយថា លោកមិនបានទៅរំលោភយកដីធ្លីពលរដ្ឋ ដូចការចោទប្រកាន់ឡើយ។
លោកបន្ថែមថា៖ «ក្រសួងគេចុះមកពិនិត្យមើល ខាងខេត្តគេចុះមកហើយ ខ្ញុំមានប្លង់ដីត្រឹមត្រូវ អត់មានអីទៅបំពានដីរបស់ប្រជាពលរដ្ឋទាំងអស់ហ្នឹងទេ។ ប៉ុន្តែពលរដ្ឋទាំងអស់ហ្នឹងមានគេញុះញង់ បាននាំគ្នាប្ដឹងធ្វើបាបគេឯង ដើម្បីបំពុលសង្គម»។
វីអូឌី មិនអាចសុំការឆ្លើយតបពីអភិបាលរង និងជាអ្នកនាំពាក្យរដ្ឋបាលខេត្តកោះកុង លោក សុខ សុទ្ធី បានទេ នៅថ្ងៃអង្គារនេះ។
រដ្ឋបាលខេត្តកោះកុង បានចុះផ្សាយកាលពីចុងឆ្នាំ២០២០ ថាករណីវិវាទដីធ្លីរវាងពលរដ្ឋនិងក្រុមហ៊ុន ហេង ហ៊ុយ ត្រូវបានដោះស្រាយចប់ជាស្ថាពរតាំងពីឆ្នាំ២០០៩ តាមរយៈសាលដីកាស្ថាពររបស់តុលាការកំពូល និងអនុក្រឹត្យលេខ៣៦ របស់រាជរដ្ឋាភិបាល កាលពីឆ្នាំ២០០៩នោះផងដែរ។
រដ្ឋបាលខេត្តកោះកុង បន្តថា លោក ហេង ហ៊ុយ ទទួលបានកម្មសិទ្ធិដីធ្លីនោះនៅឆ្នាំ២០១១ ខណៈពលរដ្ឋ១៩៧គ្រួសារទើបតែប្រមូលផ្តុំតវ៉ាជាថ្មីទៀតនៅឆ្នាំ២០១៩ ក្រោយតុលាការនិងក្រសួងរៀបចំដែនដីបានបិទបញ្ចប់បណ្ដឹងតវ៉ារួចទៅហើយ។
ចាប់តាំងពីពាក់កណ្ដាលឆ្នាំ២០១៩មក ពលរដ្ឋ១៩៧គ្រួសារ មកពីឃុំជីខលើ និងជីខក្រោម បានឡើងមកតវ៉ានៅរាជធានីភ្នំពេញជាបន្តបន្ទាប់ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លីរបស់ពួកគាត់ ដោយចោទក្រុមហ៊ុន ហេង ហ៊ុយ ថាបានរំលោភយកតាំងពីឆ្នាំ២០០៧។ ប៉ុន្តែករណីនេះត្រូវបានក្រសួងរៀបចំដែនដី បដិសេធចំនួន៣ដងហើយ ដោយមិនដោះស្រាយឱ្យពលរដ្ឋទាំងនោះឡើយ និងស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ ចំពោះអ្នកដែលក្រសួងថាបានញុះញង់ឱ្យពលរដ្ឋ១៩៧គ្រួសារនោះឡើងមកតវ៉ាដល់រាជធានីភ្នំពេញផងដែរ។
យ៉ាងណា កន្លងមក មន្ត្រីអង្គការសង្គមស៊ីវិលនៅខេត្តកោះកុងតែងតែស្នើដល់ក្រសួងរៀបចំដែនដី និងអាជ្ញាធរពាក់ព័ន្ធឱ្យពិចារណានិងដោះស្រាយជូនពលរដ្ឋ ដោយលើគោលការណ៍ច្បាប់ យុត្តិធម៌ និងមនុស្សធម៌ ដើម្បីបញ្ចប់ជម្លោះដីធ្លីដ៏រ៉ាំរ៉ៃមួយនេះ និងកុំឱ្យប្រជាពលរដ្ឋជួបការលំបាកបន្តទៀត៕