លោកនាយករដ្ឋមន្រ្តី ហ៊ុន សែន ណែនាំឱ្យមានការបើកទទួលអ្នកដំណើរតាមផ្លូវអាកាសពីប្រទេសថៃ ដោយមិនចាំបាច់ឆ្លងកាត់ការធ្វើចត្តាឡីស័ក ដូចដែលរដ្ឋាភិបាលក្រុងបាងកកប្រកាសអនុវត្តបែបនេះសម្រាប់អ្នកដំណើរពីកម្ពុជានិងប្រទេសចំនួន៤៥ទៀត នៅដើមខែក្រោយ។
ការណែនាំរបស់លោកនាយករដ្ឋមន្រ្តី ធ្វើឡើងក្នុងកិច្ចប្រជុំពេញអង្គគណៈរដ្ឋមន្រ្តី នៅថ្ងៃទី២២ ខែតុលា ឆ្នាំ២០២១ តាមរយៈខ្សែអាត់សំឡេងមានរយៈពេលជិត៣០នាទី ដែលVODទទួលបាន។
តាមប្រភពដដែល លោកនាយករដ្ឋមន្ត្រី ហ៊ុន សែន ក៏បានបញ្ជាទៅក្រសួងការបរទេសពិនិត្យមើលលទ្ធភាពបើកទទួលអ្នកដំណើរពីប្រទេសសមាជិកអាស៊ានដទៃទៀត ដូចជា ម៉ាឡេស៊ី ឥណ្ឌូនេស៊ី និងហ្វីលីពីន ផងដែរ ខណៈលោកថា បច្ចុប្បន្ន កម្ពុជាមានជើងហោះហើរតែពីប្រទេសចិន សិង្ហបុរី និងកូរ៉េខាងត្បូង ប៉ុណ្ណោះ។
លោក ហ៊ុន សែន មានប្រសាសន៍ថា៖ «យើងអាចចាប់ផ្ដើមមានគោលការណ៍បដិការជាមួយនឹងថៃ។ យើងទៅថៃ គេមិនឱ្យធ្វើចត្តាឡីស័ក ថៃមកយើង គេក៏មិនធ្វើចត្តាឡីស័ក។ អ៊ីចឹងអាចចាប់ផ្ដើមបើកការហោះហើរ ដោយឧបមាថា ទេសចរដែលថៃទទួល គឺអាចមកដល់ថៃ អាចមកដល់កម្ពុជា ក្នុងពេលដែលយើងមានគោលការណ៍រួចមកហើយ រវាងវីហ្សាមួយប្រើបាន២ប្រទេសៗ។ អ៊ីចឹងអាចថា ទម្លាយទេសចរថៃ អ្នកវិនិយោគថៃ មកកាន់កម្ពុជាផង និងទេសចរពីប្រទេសដទៃមកប្រទេសថៃ អាចឆ្លងមកទស្សនកិច្ចនៅប្រទេសកម្ពុជា»។
ប្រមុខរដ្ឋាភិបាលកម្ពុជាបន្តថា វិធានការនេះជាជំហានបន្ទាប់មួយក្នុងការត្រៀមបើកប្រទេសឡើងវិញទាំងស្រុង ដែលលោករំពឹងកន្លងមកថា នឹងចាប់ផ្ដើមនៅចុងឆ្នាំ២០២១ ដើម្បីស្ដារវិស័យទេសចរណ៍ ពិសេសផ្នែកសេវាកម្មនិងសណ្ឋាគារ ស្របពេលពលរដ្ឋកម្ពុជា-ថៃ និងពលរដ្ឋនៅប្រទេសដទៃទៀតភាគច្រើនបានចាក់វ៉ាក់សាំងបង្ការជំងឺកូវីដ-១៩រួចរាល់។
អ្នកនាំពាក្យក្រសួងទេសចរណ៍ លោក តុប សុភ័ក ថ្លែងនៅថ្ងៃម្សិលមិញថា ក្រសួងទេសចរណ៍ និងស្ថាប័នពាក់ព័ន្ធ បានកំណត់លក្ខខណ្ឌបើកទទួលភ្ញៀវទេសចរអន្តរជាតិរួចរាល់ហើយ ប៉ុន្តែនៅរង់ចាំការសម្រេចនិងប្រកាសជាផ្លូវការ ដែលលោកថានឹងធ្វើឡើងនៅពេលដ៏ខ្លីខាងមុខ។
លោកបន្ថែមថា ខាងក្រសួងក៏កំពុងរៀបចំនីតិវិធីប្រតិបត្តិស្តង់ដារសុវត្ថិភាពពីជំងឺកូវីដ-១៩ សម្រាប់ភ្ញៀវអន្តរជាតិដែលចូលមកទស្សនាតំបន់អង្គរ នៅពេលកម្ពុជាបើកទ្វារប្រទេសឡើងវិញផងដែរ ដើម្បីជាផ្នែកមួយពង្រឹងគោលដៅទេសចរណ៍វប្បធម៌ ប្រវត្តិសាស្រ្ត និងបរិស្ថានធម្មជាតិ ក្នុងខេត្តដែលសំខាន់បំផុតរបស់ប្រទេស ស្របតាមផែនការមេរយៈពេលខ្លី ឆ្នាំ២០២១-២០២៣។
លោក តុប សុភ័ក ថ្លែងថា៖ «នីតិវិធីប្រតិបត្តិស្តង់ដារអប្បបរមា ដែលយើងហៅ SOP ហ្នឹង គឺយើងបានត្រៀមលក្ខណៈច្រើនរួចមកហើយ ហើយយើងក៏នឹងបន្តធ្វើថែមទៀត ពាក់ព័ន្ធទៅនឹងការពង្រឹងគោលដៅទេសចរណ៍របស់យើង ទាំងការពង្រឹងឧស្សាហកម្មទេសចរណ៍ សេវាកម្មទេសចរណ៍។ អ៊ីចឹង SOP ហ្នឹងសំខាន់! ទាំង SOP ទាក់ទងការធ្វើដំណើរ ការស្នាក់នៅ ការហូបចុក នៅក្នុងកញ្ចប់ទស្សនកិច្ចហ្នឹង គឺយើងត្រូវរៀបចំទាំងអស់»។
អ្នកនាំពាក្យរដ្ឋបាលខេត្តសៀមរាប លោក សុខ ថុល ថ្លែងថា ប្រតិបត្តិករទេសចរណ៍ក្នុងខេត្ត ពិសេសផ្នែកសេវាកម្ម សណ្ឋាគារ និងបដិសណ្ឋារកិច្ច បានរងការប៉ះពាល់ធ្ងន់ធ្ងរជាងគេពីវិបត្តិជំងឺផ្លូវដង្ហើមថ្មីអស់រយៈពេលជិត២ឆ្នាំមកនេះ។ លោកបន្ថែមថា វិស័យនេះនឹងអាចងើបឡើងវិញ ដោយសាររដ្ឋាភិបាលបានកំណត់គោលការណ៍បើកទទួលទេសចរណ៍ពីក្រៅប្រទេសនៅចុងឆ្នាំ២០២១នេះ យ៉ាងច្បាស់លាស់រួចហើយ ដូចជា ការធ្វើចត្តាឡីស័ក និងទេសចរណ៍វ៉ាក់សាំង ជាដើម។
លោកមានប្រសាសន៍ថា៖ «ខ្ញុំជឿថា ក្នុងអាស៊ីរបស់យើង និងអាស៊ីអាគ្នេយ៍ ក៏យើងឃើញបើកឱ្យមានដំណើរការហើយ ដូចជា ថៃអីហ្នឹងក៏បើកដែរ ប៉ុន្តែកំណត់ប្រទេសក្នុងការចូលមកក្នុងប្រទេសថៃ។ អ៊ីចឹងហើយបើសិនជាយើងបើកដំណើរការគ្រប់ទៅ ស្ថានភាពទេសចររបស់យើងនឹងអាចប្រសើរឡើង»។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន ឱ្យដឹងនៅថ្ងៃនេះថា ប្រតិបត្តិករទេសចរណ៍ក្នុងខេត្តសៀមរាប កំពុងរៀបចំសេវាកម្មរបស់ខ្លួនជាបណ្ដើរៗហើយសម្រាប់ត្រៀមទទួលភ្ញៀវអន្តរជាតិឡើងវិញ ស្របតាមគន្លងប្រក្រតីភាពថ្មី តាមបទដ្ឋានរួមរបស់អាស៊ាន ដែលផ្ដោតលើគម្លាតសុវត្ថិភាពនិងអនាម័យ។
លោកស្រីថា កិច្ចការនេះទាមទារពេលវេលា ការចំណាយថវិកា និងការរៀបចំយុទ្ធសាស្រ្តទាក់ទាញដល់ភ្ញៀវ ហើយប្រតិបត្តិករទេសចរណ៍មិនអាចប្រើកញ្ចប់សេវាកម្មនិងផលិតផលដូចមុនបរិបទកូវីដ-១៩ទេ ដោយសារការត្រៀមបើកឡើងវិញនេះ គឺធ្វើឡើងដំណាលគ្នានឹងប្រទេសដទៃក្នុងតំបន់ ដូចជា ប្រទេសថៃ ជាដើម។
លោកស្រីមានប្រសាសន៍ថា៖ «ធម្មតា ការដើរលេងធ្វើម៉េចឱ្យស្រួលខ្លួន បង្កលក្ខណៈឱ្យគេងាយស្រួលក្នុងការចូលមកអីអ៊ីចឹងទៅ គេចេះតែចង់ចូលហើយ ទាំងគេ ទាំងយើង។ តែប្រសិនបើរៀងពិបាកៗពេក គេប្រៀបធៀបជាមួយប្រទេសជិតខាងទៅ គេនឹងយកប្រទេសណាដែលមានភាពងាយស្រួលជាង។ អ៊ីចឹងយើងមិនប្រាកដទទួលបានខ្ជោកខ្ជាកដូចកាលពីមុនបរិបទកូវីដនោះទេ ដោយសារថា ឥលូវវាផ្សេងគ្នាអីអ៊ីចឹង មានការប្រកួតប្រជែង»។
យ៉ាងណា លោកស្រីរំពឹងថា ខេត្តសៀមរាបនឹងទទួលបានភ្ញៀវទេសចរអន្តរជាតិឡើងវិញបន្តិចម្តងៗបន្ទាប់ពីរដ្ឋាភិបាលបើកប្រទេសឡើងវិញ។
បើតាមប្រធានសមាគមរូបនេះ មានសណ្ឋាគារនិងភោជនីយដ្ឋានជាង៣ ០០០ទីតាំង ដែលភាគច្រើនស្ថិតក្នុងខេត្តសៀមរាប ត្រូវបានបិទទ្វារ និងធ្វើឱ្យប៉ះពាល់ដល់ការងារបុគ្គលិកចម្លោះពី៥ទៅ៦ម៉ឺនកន្លែង ដោយខ្លះត្រូវបង្ខំចិត្តប្តូរទៅធ្វើការសំណង់ឬទៅធ្វើស្រែចម្ការ ខ្លះត្រូវបានរឹបអូសដីធ្លី ផ្ទះសម្បែង ដោយសារបាត់បង់ចំណូល មិនមានលទ្ធភាពសងរម្លស់ធនាគារបានជាដើម៕
