រដ្ឋបាលខេត្តកោះកុង និងអាជ្ញាធរជាតិដោះស្រាយទំនាស់ដីធ្លី បានព្រមានពីការមិនទទួលខុសត្រូវលើការបាត់បង់ផលប្រយោជន៍ ចំពោះពលរដ្ឋណាដែលមិនព្រមមកចាប់ឆ្នោះយកដីឡូត៍តាមការកំណត់របស់អាជ្ញាធរ។
កាលពីថ្ងៃទី១៩ ខែតុលានេះ រដ្ឋបាលខេត្តកោះកុង បានចេញសេចក្ដីជូនដំណឹងជាថ្មីទៀតឱ្យប្រជាពលរដ្ឋចំនួន៣ប្រភេទ ដែលរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន ញូញៀន (Union Development Group ឬ UDG) ស្ថិតនៅស្រុកបទុមសាគរ និងស្រុកគិរីសាគរ ឱ្យទៅចាប់ឆ្នោតយកដីឡូត៍នៅថ្ងៃទី២២ ខែតុលា ឆ្នាំ២០២១នេះបន្តទៀត។
ក្នុងសេចក្ដីជូនដំណឹងបានព្រមានថា ប្រសិនបើពលរដ្ឋណាខកខានមិនបានទៅចាប់ឆ្នោតយកដីឡូត៍ ដែលជាការដោះស្រាយគោលនយោបាយរបស់រដ្ឋាភិបាល ទៅតាមការកំណត់របស់អាជ្ញាធរនោះទេ នោះរដ្ឋបាលខេត្តកោះកុង និងអាជ្ញាធរជាតិដោះស្រាយទំនាស់ដីធ្លី ចាត់ទុកពលរដ្ឋទាំងនោះថាបោះបង់ចោលសិទ្ធិទទួលបានការដោះស្រាយ ហើយអាជ្ញាធរមិនទទួលខុសត្រូវរាល់ការបាត់បង់ផលប្រយោជន៍របស់ពលរដ្ឋទាំងអស់នោះឡើយ។
រដ្ឋបាលខេត្តកោះកុង បញ្ជាក់ថា ពលរដ្ឋប្រភេទទី១ មាន២៤៧គ្រួសារ ជាពលរដ្ឋរស់នៅក្នុងទីតាំងវិនិយោគរបស់ក្រុមហ៊ុន ដែលត្រូវទទួលបានសំណងដីលំនៅឋានទំហំ០,៥ហិកតា ដីចម្ការទំហំ៣ហិកតា និងថវិកា៩ ០០០ដុល្លារ ខណៈពលរដ្ឋប្រភេទទី២ មាន២៥៥គ្រួសារ ជាប្រជាពលរដ្ឋរស់នៅខុសមូលដ្ឋានឬខុសភូមិឃុំ ត្រូវទទួលបានសំណងដី២ហិកតា និងពលរដ្ឋប្រភេទទី៣ មាន៨៣១គ្រួសារ ជាប្រជាពលរដ្ឋស្នើសុំគោលនយោបាយបន្ថែម ដែលត្រូវទទួលបានសំណង១ហិកតា។
វីអូឌី មិនអាចសុំការបញ្ជាក់បន្ថែមពីអភិបាលរង និងជាអ្នកនាំពាក្យរដ្ឋបាលខេត្តកោះកុង លោក សុខ សុទ្ធី បានទេ នៅថ្ងៃសុក្រនេះ។
អ្នកស្រី សាំង ពុយ ជាប្រជាពលរដ្ឋរស់នៅឃុំកោះស្ដេច ស្រុកគិរីសាគរ និងជាពលរដ្ឋប្រភេទទី២ បានប្រាប់ វីអូឌី នៅថ្ងៃសុក្រនេះថា អ្នកស្រីមិនអាចទទួលសំណងជាគោលនយោយនូវការផ្ដល់សំណងដី២ហិកតានេះបានទេ ខណៈក្រុមគ្រួសារអ្នកស្រីប៉ះពាល់ដីក្នុងទំហំច្រើន ដែលមានប្រមាណជា២០ហិកតា ពេញទៅដោយដំណាំហូបផ្លែនោះ។
ពលរដ្ឋរូបនេះបន្តថា ពួកគាត់ប្រហែល៥០គ្រួសារដែលបានប៉ះពាល់ដីក្នុងទំហំច្រើន គឺមិនទាន់ទៅទទួលយកសំណងឬទៅចាប់ឆ្នោតយកដីឡូត៍នៅឡើយទេ រហូតមកដល់ពេលនេះ។ អ្នកស្រីថា ពួកគាត់ត្រៀមតវ៉ានិងដាក់សំណើទៅអាជ្ញាធរពាក់ព័ន្ធទៀត ដើម្បីឱ្យពួកគាត់ជួយដោះស្រាយបន្តទៀត។
អ្នកស្រី សាំង ពុយ បានចាត់ទុកការព្រមានរបស់អាជ្ញាធរពីការមិនទទួលខុសត្រូវចំពោះពលរដ្ឋណាមិនទៅចាប់ឆ្នោតយកដីឡូត៍នោះថា ជាការបង្ខិតបង្ខំឱ្យពលរដ្ឋទទួលយកសំណងទាំងមិនពេញចិត្ត។
អ្នកស្រីបន្ថែមថា៖ «គាត់ថា គាត់អត់បានបង្ខិតបង្ខំ ប៉ុន្តែការកំណត់ឱ្យប្រជាពលរដ្ឋទៅយកសំណងហ្នឹង វាជាការបង្ខិតបង្ខំ! ហើយគាត់ថា ដីយើងមានប៉ុន្មានក៏ដោយ ក៏គាត់ឱ្យ២ហិកតាហ្នឹងដែរ អ៊ីចឹងពួកខ្ញុំសម្រេចគ្នាអត់ទទួលយកបានទេ ហើយពួកខ្ញុំនឹងនាំគ្នាតវ៉ាទៀត»។
អ្នកស្រី ព្រាប រដ្ឋា នៅឃុំព្រែកខ្សាច់ ដែលមានដីលំនៅឋាននិងចម្ការត្រឹមតែជាង៦០អា និងជាពលរដ្ឋប្រភេទទី១ បានឱ្យដឹងថា គ្រួសារអ្នកស្រីបានទទួលយកសំណងតាមការដោះស្រាយរបស់អាជ្ញាធរនេះហើយ ប៉ុន្តែអ្នកស្រីនៅតែមានការព្រួយបារម្ភ ខ្លាចជួបការលំបាក និងបាត់បង់មុខរបរ ដូចប្រជាពលរដ្ឋមួយចំនួនដែលទទួលបានការដោះស្រាយនាពេលកន្លងមក។
ពលរដ្ឋរូបនេះបន្តថា កន្លងមក ពលរដ្ឋមួយចំនួនដែលធ្លាប់ទទួលយកសំណងបានធ្លាក់ខ្លួនក្រីក្រ ដោយពួកគេបានបាត់បង់មុខរបរ ហើយពួកគេបានត្រលប់មកប្រកបរបររកស៊ីនៅភូមិចាស់វិញ ខណៈទីតាំងថ្មីគ្មានកន្លែងសម្រាប់ប្រកបរបររកស៊ីដូចទីតាំងចាស់។
អ្នកស្រីបន្ថែមថា៖ «បានជាខ្ញុំទទួល [សំណង] ពីព្រោះដីអ្នកដែលនៅជុំវិញខ្ញុំហ្នឹង គេទទួលយកអស់ នៅតែដីខ្ញុំម្នាក់ឯង។ អ៊ីចឹងយើងពិបាកក្នុងការតវ៉ាទាមទារទៀត អ៊ីចឹងខ្ញុំក៏យកទៅ។ ម៉្យាងទៀតដីជាក់ស្ដែងខ្ញុំតិចដែរ ហើយដីដែលខ្ញុំចាប់ឆ្នោតបានហ្នឹងចំកន្លែងល្អដែរ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា ជម្លោះដីធ្លីរវាងប្រជាពលរដ្ឋ និងក្រុមហ៊ុន ញូញៀន មានរយៈពេលជាង១០ឆ្នាំទៅហើយ។
លោកបានចាត់ទុកការព្រមានរបស់អាជ្ញាធរទៅលើប្រជាពលរដ្ឋ ថាជាការដាក់សម្ពាធលើពលរដ្ឋឱ្យទទួលសំណងទាំងបង្ខំចិត្ត និងគ្មានឆន្ទៈក្នុងការដោះស្រាយបញ្ចប់ជូនពលរដ្ឋឡើយ។ លោកស្នើដល់អាជ្ញាធរពាក់ព័ន្ធពិចារណាឡើងវិញ ដោយជួបពិភាក្សាជាមួយពលរដ្ឋណាដែលមិនព្រមទទួលសំណងនោះ ដើម្បីរកដំណោះស្រាយមួយដែលអាចទទួលបានទាំងអស់គ្នា។
លោកបន្ថែមថា៖ «ដើម្បីដោះស្រាយឱ្យបានជោគជ័យ ទាល់តែការដោះស្រាយនោះឈរលើគោលការណ៍យុត្តិធម៌ ហើយប្រជាពលរដ្ឋត្រេកអរក្នុងការទទួលយកសំណោះស្រាយ។ វាមិនមែនជាការចាប់បង្ខំឱ្យប្រជាពលរដ្ឋទទួលយកដំណោះស្រាយទេ។ បើមិនទទួល គឺលែងទទួលខុសត្រូវ អ៊ីចឹងបង្ហាញថា អាជ្ញាធរគ្មានឆន្ទៈក្នុងការដោះស្រាយជូនប្រជាពលរដ្ឋទេ។ ហើយការធ្វើបែបនេះ បង្ហាញថា អាជ្ញាធរគិតប្រយោជន៍ក្រុមហ៊ុនជាជាងប្រយោជន៍ប្រជាពលរដ្ឋ ហើយដំណោះស្រាយបែបនេះនឹងធ្វើឱ្យប្រជាពលរដ្ឋកាន់តែរងទុក្ខនិងកាន់វេទនា»។
របាយការណ៍និងការវិភាគផ្លូវច្បាប់របស់អង្គការមួយកាលពីឆ្នាំ២០១២ បានរកឃើញថា គម្រោងផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនចិននេះបានធ្វើឱ្យប្រជាពលរដ្ឋចំនួន១ ១៤៣គ្រួសារ ត្រូវបង្ខំឱ្យបោះបង់ចោលដីធ្លីប្រមាណជាង១ម៉ឺនហិកតា និងផ្ទះ១ ៥០០ខ្នងត្រូវបង្ខំឱ្យរុះរើនិងឈូសឆាយ៕