ប្រធានាធិបតីចិន លោក ស៊ី ជីនពីង នៅថ្ងៃចន្ទនេះ បានអំពាវនាវឱ្យមានកិច្ចសហប្រតិបត្តិការជាសកលបន្ថែមទៀត ទាក់ទងទៅនឹងបញ្ហានានា រួមមាន អំពើភេរវកម្ម ការប្រែប្រួលអាកាសធាតុ និងសន្តិសុខតាមប្រព័ន្ធអ៊ីនធឺណិត (cyber security)។
ការថ្លែងរបស់ប្រធានាធិបតីចិនរូបនេះបានធ្វើឡើងនៅក្នុងសុន្ទរកថាមួយ ខណៈដែលប្រទេសចិនអបអរខួប៥០ឆ្នាំនៃការចូលជាសមាជិកអង្គការសហប្រជាជាតិរបស់ខ្លួន។
ទីភ្នាក់ងារសារព័ត៌មាន Reuters បានស្រង់សម្ដីលោក ស៊ី ជីនពីង ដែលបានលើកឡើងថា ប្រទេសចិនក៏ប្រឆាំងជាដាច់ខាតទៅនឹងឯកតោភាគីនិយម (unilateralism) គោលនយោបាយគាំពារនិយម (protectionism) និងរាល់ការប្រកួតប្រជែងទាំងឡាយណា ដែលការចំណេញរបស់ភាគីមួយគឺជាការខាតបង់របស់ដៃគូម្ខាងទៀត (zero-sum game) ផងដែរ៕
