អតីតប្រធានព្រៃសហគមន៍រុក្ខាវ័ន ជួបគ្រោះថ្នាក់ចរាចរណ៍បាក់ឆ្អឹងកជើង និងបាក់ដងកាំបិតខាងស្ដាំ ក្រោយពីជួបប្រជុំជាមួយព្រះអង្គ ថូ ធូរស់ ដើម្បីជជែកគ្នាគ្រោងធ្វើសាលាសំណាក់នៅក្នុងតំបន់ទេសចរណ៍មួយក្នុងខេត្តឧត្ដរមានជ័យ កាលពីម្សិលមិញ។
ប្រធានព្រៃសហគមន៍សង្ឃរុក្ខាវ័ន ព្រះអង្គ ថូ ធូរស់ ប្រាប់ វីអូឌី នៅថ្ងៃទី២៦ ខែតុលានេះថា អតីតប្រធានសហគមន៍ព្រៃសហគមន៍រុក្ខាវ័ន និងបច្ចុប្បន្នមានតួនាទីជាប្រធានបណ្ដាញការពារសត្វព្រៃ សហគមន៍រុក្ខាវ័ន លោក ប៊ុន សាលួត បានជួបគ្រោះថ្នាក់ចរាចរណ៍កាលពីថ្ងៃទី២៥ ខែតុលា ឆ្នាំ២០២១ ត្រង់ចំណុចភូមិគោកភ្លុក សង្កាត់កូនក្រៀល ក្រុងសំរោង ខេត្តឧត្ដរមានជ័យ រវាងម៉ូតូដែលជនរងគ្រោះបានជិះ ជាមួយនឹងត្រាក់ទ័រ។
ព្រះអង្គ ថូ ធូរស់ បញ្ជាក់ថា ក្រោយពីជួបគ្រោះថ្នាក់ចរាចរណ៍នោះ ក្រុមគ្រួសារ សាច់ញាតិ បានបញ្ជូនលោក ប៊ុន សាលួត ទៅព្យាបាលនិងវះកាត់ជើងនិងឆ្អឹងដងកាំបិតខាងស្ដាំ នៅខេត្តបាត់ដំបង ដោយជោគជ័យ នៅព្រឹកថ្ងៃទី២៦ ខែតុលា។
ព្រះអង្គអំពាវនាវទៅសាធារណជន សប្បុរសជនក្នុងនិងក្រៅប្រទេសជួយជាថវិកា ដើម្បីបង់ថ្លៃព្យាបាលគាត់តាមសទ្ធា តាមរយៈកុងធនាគារអេស៊ីលីដាទាន់ចិត្តរបស់ព្រះអង្គ ឈ្មោះ ថូ ធូរស់ លេខ 0717549538 ព្រោះថ្លៃព្យាបាលសរុបមានចំនួន៤ ៥០០ដុល្លារ។
ព្រះអង្គមានសង្ឃដីកាបន្តថា៖ «ការលះបង់របស់គាត់ខ្ពស់ណាស់ សឹងតែមិនមាននរណាម្នាក់ធ្វើបានដូចគាត់ [ក្នុងការចូលរួមការពារធនធានធម្មជាតិ] និយាយពីគុណសម្បត្តិ ពីការលះបង់របស់គាត់ ដូចជាការធ្វើការងារការពារព្រៃសហគមន៍»។
ព្រះអង្គ ថូ ធូរស់ បញ្ជាក់ថា ក្រោយពីជួបគ្រោះថ្នាក់ចរាចរណ៍នោះ សមត្ថកិច្ចបានឃាត់ត្រាក់ទ័រ និងម៉ូតូរបស់លោក ប៊ុន សាលួត រក្សាទុកនៅអធិការក្រុងសំរោង ខេត្តឧត្ដរមានជ័យ ដើម្បីអនុវត្តវិធានការច្បាប់បន្តផងដែរ ៕