សាលាឧទ្ធរណ៍បាត់ដំបង បានកោះហៅសកម្មជនព្រៃឈើនិងដីធ្លីម្នាក់នៅខេត្តពោធិ៍សាត់ ឱ្យចូលសវនាការនៅសប្តាហ៍ក្រោយនេះ ពាក់ព័ន្ធរឿងជម្លោះដីធ្លីជាមួយក្រុមហ៊ុន ភាពីម៉ិច កាលពី១០ឆ្នាំមុន។
ព្រះរាជអាជ្ញា នៃមហាអយ្យការអមសាលាឧទ្ធរណ៍បាត់ដំបង លោក ហេង លុយ បានចេញដីកាបង្គាប់ឱ្យសកម្មជនព្រៃឈើ និងដីធ្លី លោក គុជ វេង អាយុ៤៧ឆ្នាំ រស់នៅភូមិដំណាក់ត្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ ឱ្យចូលសវនាការនៅសាលាឧទ្ធរណ៍បាត់ដំបង នៅថ្ងៃទី១០ ខែមករានេះ ក្រោមបទចោទ «ញុះញង់ឱ្យប្រព្រឹត្តបទល្មើស» តាមមាត្រា៤៩៥ នៃក្រមព្រហ្មទណ្ឌ។
សកម្មជនព្រៃឈើ និងដីធ្លី លោក គុជ វេង ប្រាប់វីអូឌីនៅថ្ងៃសុក្រនេះថា កាលពីឆ្នាំ២០១២ រូបលោក និងពលរដ្ឋរាប់រយនាក់ផ្សេងទៀតនៅក្នុងសហគមន៍របស់លោក បាននាំគ្នាតវ៉ាប្រឆាំងក្រុមហ៊ុន ភាពីម៉ិច (Pheapimex) ដែលបានដាក់គ្រឿងចក្រឈូសឆាយដីធ្លី និងព្រៃសហគមន៍របស់ប្រជាពលរដ្ឋដែលកំពុងអាស្រ័យផល។
លោកបន្តថា ក្រោយពីលោកចូលរួមតវ៉ាប្រឆាំងនឹងការឈូសឆាយដីធ្លីពីសំណាក់ក្រុមហ៊ុនចិនមួយនេះ គឺរូបលោកត្រូវបានគេប្តឹងទៅសាលាដំបូងខេត្តពោធិ៍សាត់ ហើយកាលពីថ្ងៃទី៣ ខែមេសា ឆ្នាំ២០២២ តុលាការមួយនេះបានបើកសវនាការ និងបានកាត់ទោសរូបលោកឱ្យជាប់ពន្ធនាគារ១ឆ្នាំ ប៉ុន្តែឱ្យលោកនៅក្រៅឃុំដោយព្យួរទោស។ លោកថា ក្រោយមក លោកបានឱ្យមេធាវីប្តឹងជំទាស់ការសម្រេចនេះទៅសាលាឧទ្ធរណ៍បាត់ដំបង។
លោក គុជ វេង យល់ថា ការចោទប្រកាន់ និងការព្យួរទោសលោក១ឆ្នាំនោះ ជារឿងអយុត្តិធម៌ និងជាការគំរាមកំហែងបំបាក់ស្មារតីមិនឱ្យលោកហ៊ានចេញតវ៉ា និងបំបិទសិទ្ធិសេរីភាពក្នុងការបញ្ចេញមតិតែប៉ុណ្ណោះ។ លោកថា លោកនឹងចូលទៅឆ្លើយបំភ្លឺចំពោះមុខតុលាការឧទ្ធរណ៍បាត់ដំបង និងស្នើដល់តុលាការមួយនេះជួយផ្តល់យុត្តិធម៌ ដោយទម្លាក់ចោលការចោទប្រកាន់នានាលើរូបលោក។
លោកបន្ថែមថា៖ «ការចោទប្រកាន់នេះ ជាការចោទប្រកាន់ដើម្បីកុំឱ្យមានអ្នកហ៊ានតវ៉ាបន្តទៀតតែប៉ុណ្ណោះ ព្រោះខ្ញុំអត់បានទៅញុះញង់អ្នកណាឱ្យទៅតវ៉ាដូចការចោទប្រកាន់នោះទេ។ សំខាន់ ក្រុមហ៊ុននេះទេដែលធ្វើខុស ព្រោះក្រុមហ៊ុននេះចូលមកដល់ អត់បានវាយតម្លៃពីផលប៉ះពាល់បរិស្ថាននិងដីធ្លីរបស់ប្រជាពលរដ្ឋអ្វីទាំងអស់។ មកដល់ដាក់គ្រឿងចក្រទៅឈូសឆាយលើដីដំណាំដាំដុះរបស់ប្រជាពលរដ្ឋ។ អ៊ីចឹងហើយប្រជាពលរដ្ឋគាត់ងើបតវ៉ាខ្លួនគាត់ មិនមែនខ្ញុំជា[អ្នក]ញុះញង់ឱ្យគាត់តវ៉ាទេ ហើយរឿងនេះតាំងពីឆ្នាំ២០១២ មកដល់ឥលូវនេះ វាគួរតែបញ្ចប់ហើយបណ្តឹងហ្នឹងនោះ»។
អ្នកឃ្លាំមើលការរំលោភសិទ្ធិមនុស្ស នៃអង្គការលីកាដូប្រចាំខេត្តពោធិ៍សាត់ លោក ចឹក ចិត្រា មានប្រសាសន៍ថា ករណីតុលាការកោះហៅសកម្មជនព្រៃឈើ និងដីធ្លី លោក គុជ វេង ចូលសវនាការនេះ ហាក់ស្របពេលដែលថ្ងៃបោះឆ្នោតឆ្នាំ២០២៣ ខិតជិតមកដល់ ខណៈលោក គុជ វេង ជាប្រជាសហគមន៍ម្នាក់សកម្មក្នុងការតវ៉ាទាមទារសិទ្ធិដីធ្លី សិទ្ធិបញ្ចេញមតិ និងហ៊ានរិះគន់ពីភាពអសកម្មនានារបស់មន្ត្រីរដ្ឋ និងរដ្ឋាភិបាល។
អ្នកឃ្លាំមើលការរំលោភសិទ្ធិមនុស្សរូបនេះ បន្តថា ការកោះហៅនេះអាចជាចេតនាគំរាមកំហែងបំបិទសិទ្ធិសេរីភាពដល់ប្រជាពលរដ្ឋដែលហ៊ានចេញតវ៉ាតស៊ូមតិនៅក្នុងសហគមន៍របស់ពួកគេផងដែរ។
លោកបន្ថែមថា៖ «នីតិវិធីរបស់តុលាការ វាហាក់ដូចជាមានភាពចៃដន្យ ដែលកើតឡើងមុនពេលបោះឆ្នោតឆ្នាំ២០២៣ខាងមុខ ក្នុងការបង្កការរាំងស្ទះ ឬក៏បំបិទសិទ្ធិសេរីភាពរបស់ប្រជាពលរដ្ឋដែលហ៊ានចេញតស៊ូមតិនៅក្នុងសហគមន៍របស់ពួកគាត់។ អ៊ីចឹងក្នុងនាមយើងជាសង្គមស៊ីវិល យើងទទូចដល់តុលាការទម្លាក់ចោលការចោទប្រកាន់ទៅលើសកម្មជនសហគមន៍ដែលគាត់ហ៊ានចេញតស៊ូមតិ និងការផ្តល់ជាគំនិតក្នុងការទាមទារសិទ្ធិសេរីភាព និងវិស័យសិទ្ធិមនុស្ស ឬក៏សហគមន៍របស់ពួកគាត់ ដើម្បីឱ្យពួកគាត់មានសំឡេងឡើងវិញ»។
ក្រោមជម្លោះដីធ្លីរវាងក្រុមហ៊ុន ភាពីម៉ិច និងប្រជាពលរដ្ឋនៅខេត្តពោធិ៍សាត់នេះ គឺក្រុមហ៊ុនបានប្តឹងពលរដ្ឋ ៧នាក់ ទៅតុលាការ ដោយចោទថាបានធ្វើឱ្យខូចខាតទ្រព្យសម្បត្តិក្រុមហ៊ុនដោយចេតនា ប៉ុន្តែពលរដ្ឋទាំង៧នាក់នោះត្រូវបានតុលាការខេត្តពោធិ៍សាត់ទម្លាក់ចោលការចោទប្រកាន់វិញនៅឆ្នាំ២០១៧ ក្រោយពីជម្លោះនេះបានអូសបន្លាយជិត១០ឆ្នាំ៕