អ្នកឃ្លាំមើលសង្គម យល់ថា ការដែលលោកនាយករដ្ឋមន្ត្រី ហ៊ុន សែន ចេញអន្តរាគមន៍រកយុត្តិធម៌ឱ្យអ្នកអត្ថាធិប្បាយទូរទស្សន៍បាយ័ន ដែលត្រូវតុលាការបង្គាប់ឱ្យឃុំខ្លួន ក្រោយរងការចោទពីបទ «ឆបោកប្រាក់ជាង៣៦លានដុល្លារ» ភ្ជាប់នឹងសារព្រមានដកតំណែងមន្ត្រីអនុវត្តច្បាប់ មិនអាចធានាយុត្តិធម៌សង្គមបានទេ ដរាបណារដ្ឋាភិបាលមិនបង្កើតឱ្យមានប្រព័ន្ធតុលាការឯករាជ្យនោះ។
លោកនាយករដ្ឋមន្ត្រី ហ៊ុន សែន ក្នុងពិធីបិទសន្និបាត នៅក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី២៧ ខែធ្នូ បានទម្លាយថា លោកបានធានាបុគ្គលិកទូរទស្សន៍បាយ័នម្នាក់ដែលត្រូវបានចាប់ខ្លួន ឱ្យបាននៅក្រៅឃុំ តាមរយៈការបញ្ជូនមេធាវីឱ្យការពារក្តី ក្រោយពីលោកបានដឹងកាលពីថ្ងៃអង្គារម្សិលមិញ។
លោកថា៖ «បើរវល់តែល្មោភរឿងចាប់រឿងចងៗហ្នឹង វាយ៉ាងម៉េចៗ! ឥលូវ ខ្ញុំបញ្ជូនមេធាវីរបស់ខ្ញុំទៅការពារហ្មង ហើយវាទាក់ទងជាមួយនឹងអ្នកឧកញ៉ាដែលគេមានប្រាក់កាសនោះ។ រួចហើយគឺថាខាងយើងនេះ ផ្នែកតុលាការផ្នែកអីហ្នឹង អាងឡើងចាប់គ្រឹបៗ។ អារឿងបញ្ហារដ្ឋប្បវេណី យើងកោះហៅទៅបានទេ ដើម្បីទៅពិភាក្សា ទៅមើល! ហើយគិតតែពីរឿងចាប់រឿងចងៗ រួចហើយគេមើលពីក្រៅមក គេមានដឹងតុលាការឯណា! គេដឹងតែពី ហ៊ុន សែន តែម្តង នៅពេលដែលយើងអត់ដឹងផង»។
លោកថ្លែងទាំងមិនបញ្ចេញឈ្មោះថា អ្នកដែលត្រូវចាប់ខ្លួនដែលជាបុគ្គលិកទូរទស្សន៍បាយ័ននោះ រងការចោទប្រកាន់ថាជាប់ព័ន្ធនឹងការឆបោកប្រាក់ជាង៣៦លានដុលា្លរដើម្បីទៅរៀបចំដី ដែលការណ៍នេះ លោកហាក់មិនទាន់ជឿការចោទប្រកាន់នៅឡើយទេ តែថានឹងបន្តតាមដានរហូតទីបញ្ចប់ ដើម្បីចង់ដឹងពីចំណាត់ការច្បាប់មួយនេះ។
លោកថា៖ «បុគ្គលិកបាយ័ននេះ នៅពេលដែលគេត្រូវចាប់ មេធាវីទៅបង្គាប់ទារប្រពន្ធ ៥ ០០០ដុល្លារមុនទៀត ហើយគ្នាអត់មានលុយទៅទៀត។ ចុះបើ៣៦លាន ចាំបាច់ទៅវេទនាទៅអានវិទ្យុបាយ័ន ទូរទស្សន៍បាយ័នធ្វើអី? អ៊ីចឹងបានថា អ៊ីចឹងៗយើងមើលផងមើលៗ កុំអាងតែមានអំណាចគឺថាចេះតែចាប់ ចេះតែចង ចាប់ចងៗៗ! រួចហើយគឺថាអ្នកដែលវេទនាជាងគេ គឺនាយករដ្ឋមន្ត្រី! ម្ខាងគេចោទថាអាងអី? អាចរដ្ឋាភិបាលចាប់! ប៉ុន្តែតុលាការជាអ្នកបញ្ជាចាប់»។
បញ្ហានេះ លោកបានព្រមានថា៖ «អស់លោកកុំអាងតែមានសក្តិ ខ្ញុំសូមព្រមានប្រាប់អស់លោកឱ្យហើយ កុំថាអស់លោកពាក់ត្រឹមផ្កាយ ពាក់លោកខែ ក៏ខ្ញុំដកចេញបានដែរ ខ្ញុំសុំ[ប្រាប់]ឱ្យហើយ ជានគរបាលយុត្តិធម៌ ជាអាវុធហត្ថក្តី កុំចេះតែបណ្តោយតាមតែចិត្តចង់ៗ អ៊ីចឹងត្រូវមើលបញ្ហាហ្នឹងឱ្យបានដិតដល់»។
ភរិយាសកម្មជនបក្សប្រឆាំង ដែលស្វាមីគាត់កំពុងជាប់ពន្ធនាគារដោយរដ្ឋាភិបាលប្តឹង គឺអ្នកស្រី ព្រំ ចន្ថា អាយុ៤៥ឆ្នាំ បង្ហាញការខកចិត្ត ដោយថា ក្នុងសង្គមប្រជាធិបតេយ្យ គេមិនចាប់ស្វាមីរបស់គាត់ដាក់ពន្ធនាគាររហូតដល់៣ឆ្នាំ ដោយគ្រាន់តែមានមតិផ្ទុយនឹងរដ្ឋាភិបាលនោះទេ ដែលការណ៍នេះ អ្នកស្រីចង់ឃើញរដ្ឋាភិបាលលុបបំបាត់ការរើសអើងខាងនយោបាយ ហើយវិលទៅរកគន្លងប្រជាធិបតេយ្យវិញ។
អ្នកស្រីថា៖ «ខ្ញុំចង់បានមេដឹកនាំបែបប្រជាធិបតេយ្យ ខ្ញុំអត់ចង់បានមេដឹកនាំបែបផ្តាច់ការអ៊ីចឹងទេ»។
ប្រធានសមាគមការពារសិទ្ធិមនុស្សអាដហុក លោក នី សុខា កត់សម្គាល់ថា ប្រព័ន្ធតុលាការត្រូវបានគេដឹងថា ស្ថិតក្រោមឥទ្ធិពលរបស់មេដឹកនាំបក្សកាន់អំណាច ហើយថាប្រតិកម្មរបស់នាយករដ្ឋមន្ត្រីពេលនេះ អាចប៉ះចំមនុស្សដែលនៅកៀកនឹងក្រុមគ្រួសាររបស់លោក។
ប៉ុន្តែអ្នកឃ្លាំមើលសិទ្ធិមនុស្សរូបនេះជឿថា បុគ្គលិកទូរទស្សន៍បាយ័នដែលត្រូវគេចាប់ឃុំខ្លួននេះ អាចនឹងមានសំណាងជាងសកម្មជនដីធ្លី បរិស្ថាន និងសកម្មជននយោបាយរាប់រយនាក់ផ្សេងទៀត រួមទាំងអ្នករងគ្រោះដោយការអភិវឌ្ឍព្រលានយន្តហោះថ្មីនៅខេត្តកណ្តាល ដែលពួកគេរងគ្រោះពីប្រព័ន្ធនេះដូចគ្នា តែមេដឹកនាំមិនទាន់ចេញមុខជួយរកយុត្តិធម៌ឱ្យនៅឡើយ។
លោកថា៖ «ក្នុងនាមអង្គការសង្គមស៊ីវិល ខ្ញុំចង់ឱ្យសម្តេចនាយករដ្ឋមន្ត្រី លោកកុំឱ្យឃើញតែករណីមួយ ដូចជាទូរទស្សន៍បាយ័ន! សូមឱ្យលោកជួយប្រមើលមើលទៅពលរដ្ឋផ្សេងទៀតដែលរងគ្រោះដោយសារតែប្រព័ន្ធយុត្តិធម៌ហ្នឹងផង […] ពីព្រោះថាអ្នកដែលរស់នៅលើទឹកដីប្រទេសកម្ពុជា គឺស្ថិតក្រោមការគ្រប់គ្រងរបស់នាយករដ្ឋមន្រ្តីតែមួយទេ»។
បញ្ហានេះ លោកយល់ថា ដើម្បីឱ្យប្រព័ន្ធយុតិ្តធម៌អាចធានាយុត្តិធម៌សង្គម ដោយគ្មានការរើសអើង ឬមិនចាំបាច់មាននាយករដ្ឋមន្ត្រីចេញអន្តរាគមន៍ផ្លូវច្បាប់នោះ ទាល់តែមន្ត្រីយុត្តិធម៌ រួមមាន ចៅក្រម ព្រះរាជអាជ្ញា និងនគរបាលយុត្តិធម៌ ជាដើម មិនមែនជាសមាជិកបក្សកាន់អំណាចដូចបច្ចុប្បន្ន។
អ្នកនាំពាក្យក្រសួងយុត្តិធម៌ លោក ជិន ម៉ាលីន លើកឡើងថា អ្វីដែលនាយករដ្ឋមន្ត្រីបានថ្លែង ជាការបញ្ជាទៅនគរបាលយុត្តិធម៌ ដើម្បីស្វែងរកការពិត ជុំវិញបទចោទប្រកាន់លើអ្នកអត្ថាធិប្បាយទូរទស្សន៍បាយ័ន មិនមែនជាការជ្រៀតជ្រែកកិច្ចការតុលាការនោះទេ។
លោកថា៖ «អ៊ីចឹង ឥលូវនេះ ជនជាប់ចោទ គាត់មានមេធាវី! អ៊ីចឹងមេធាវីគាត់ធ្វើការការពារខ្លះ តតាំងក្តីតាមនីតិវិធីរបស់តុលាការ ហើយការសម្រេចយ៉ាងម៉េច វានៅលើតុលាការ»។
ដោយឡែក សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា សង្កេតឃើញថា របត់នយោបាយនារយៈពេលប៉ុន្មានឆ្នាំចុងក្រោយនេះ អ្នកសារព័ត៌មានមួយចំនួនត្រូវបានចាប់ខ្លួន ចោទប្រកាន់ និងខ្លះទៀតត្រូវចាប់ឃុំខ្លួន ប៉ុន្តែមិនមានប្រតិកម្មពីនាយករដ្ឋមន្ត្រី ដូចករណីអ្នកអត្ថាធិប្បាយនៅទូរទស្សន៍បាយ័នទេ។ ករណីនេះ លោកគិតថា ប្រតិកម្មនេះអាចមកពីការអនុវត្តច្បាប់ប៉ះផលប្រយោជន៍បក្ខពួក និងក្រុមគ្រួសារច្រើនជាង។
លោកថា៖ «សង្គមកម្ពុជា វាខ្វះនូវយន្តការអនុវត្តច្បាប់ពិតប្រាកដ ការអនុវត្តច្បាប់មានករណី វាមិនមែនជាការអនុវត្តច្បាប់ជាគោលការណ៍ទូទៅទេ ដែលគេហៅថា “បរិបទបក្ខពួកអញទៅ វារួចខ្លួន មិនមែនបក្ខពួកអញ ចាប់អ្ហែងមែនទែន” […] ហើយនេះទៅប៉ះអ្នកអត្ថាធិប្បាយទូរទស្សន៍បាយ័ន ជាទូរទស្សន៍របស់កូនគាត់ បានគាត់ឈឺឆ្អាល។ ចុះអ្នកផ្សេងទៀត? យើងសួរថាម៉េច? វាមានច្រើនរូបភាពកន្លងមកហើយ»។
យ៉ាងណា លោកគិតថា ដើម្បីធានាយុត្តិធម៌សង្គមដោយគ្មានការរើសអើងនិន្នាការនយោបាយ វាចាំបាច់ណាស់ សសរស្តម្ភរបស់ជាតិទាំង៣ រួមមាន រដ្ឋាភិបាល តុលាការ និងរដ្ឋសភា ត្រូវតែជាស្ថាប័នឯករាជ្យ មិនរំលោភអំណាចគ្នាដូចបច្ចុប្បន្ន ហើយមន្ត្រីតុលាការត្រូវតែងតាំងដោយប្រធានតុលាការកំពូល មិនមែនតែងតាំងដោយរដ្ឋាភិបាលដូចប្រទេសកម្ពុជាទេ នោះទើបប្រព័ន្ធដឹកនាំធានាបាននូវយុត្តិធម៌ខ្ពស់៕