សហភាពការងារកម្ពុជា អះអាងថា នៅសប្ដាហ៍ក្រោយ មេធាវីរបស់ខ្លួននឹងដាក់លិខិតទៅភាគីក្រុមហ៊ុន ដើម្បីបើកផ្លូវឱ្យមានការចរចា ដើម្បីទាមទារអត្ថប្រយោជន៍បន្ថែមឱ្យបុគ្គលិកទូរទស្សន៍ CNC ជាង២០នាក់ដែលភាគីក្រុមហ៊ុនបានបញ្ឈប់ពីការងារ។
ប្រធានសហភាពការងារកម្ពុជា លោក អាត់ ធន់ ឱ្យដឹងនៅថ្ងៃនេះថា ក្រុមការងារលោកនឹងដាក់លិខិតទៅក្រុមហ៊ុន ខេមបូឌាន ប្រតខេសស្ទីងសឺវីស (Cambodian Broadcasting Service Co., Ltd) ដែលគ្រប់គ្រងទូរទស្សន៍ CNC នៅថ្ងៃចន្ទសប្ដាហ៍ក្រោយ ដើម្បីវែកញែកផ្លូវច្បាប់ស្វែងរកអត្ថប្រយោជន៍បន្ថែមជូនអ្នកដែលត្រូវបានបញ្ឈប់ពីការងារ ក្រោយពីពួកគេបានដាក់លិខិតជាលាយលក្ខណ៍អក្សររកមេធាវីឱ្យជួយការពារអត្ថប្រយោជន៍តាមផ្លូវច្បាប់។
បើតាមលោក អាត់ ធន់ បញ្ហាដែលជំរុញឱ្យមានការពឹងពាក់នេះ ដោយសារក្រុមហ៊ុនបានផ្ដល់អត្ថប្រយោជន៍ជូនបុគ្គលិកដែលបានបញ្ឈប់តែ២ចំណុច ក្នុងចំណោម៥ចំណុចដែលបុគ្គលិកត្រូវទទួលបាន ស្របតាមច្បាប់ស្ដីពីការងារ ហើយថា ៣ចំណុចដែលនៅសល់នឹងលើកយកទៅជជែកជាមួយភាគីក្រុមហ៊ុន ។
លោកថា៖ «ដូចជាប្រាក់ជំងឺចិត្ត ប្រាក់អតីតភាពការងារ ឬប្រាក់បណ្ដេញចេញ និងប្រាក់ដំណាច់ឆ្នាំ»។
បុគ្គលិកផ្នែកព័ត៌មាន លោក យ៉ង់ សុភា ដែលត្រូវបានក្រុមហ៊ុនបញ្ឈប់ពីការងារដែរនោះ បានប្រាប់VOD ថាអ្នកត្រូវបានក្រុមហ៊ុនជូនដំណឹងផ្លូវការរំសាយពីការងារនោះ ស្ថិតនៅផ្នែកព័ត៌មាន ផ្នែកកាត់តរូបភាព និងផ្នែកសម្របសម្រួលកម្មវិធី សរុបចំនួន២២នាក់ ហើយថា ការបញ្ឈប់ពួកគេនេះ ភាគីក្រុមហ៊ុនអះអាងពីមូលហេតុជួបវិបត្តិហិរញ្ញវត្ថុ៕