ភាគីក្រុមហ៊ុនគ្រប់គ្រងទូរទស្សន៍ CNC បដិសេធសំណើសុំជួបពិភាក្សាផ្លូវច្បាប់ ដើម្បីបើកផ្លូវឱ្យមានការផ្ដល់សំណងបន្ថែមដល់បុគ្គលិកដែលត្រូវបានបញ្ឈប់ពីការងារ។
កាលពីថ្ងៃចន្ទសប្ដាហ៍មុន បុគ្គលិកមួយចំនួនធ្វើការនៅទូរទស្សន៍ CNC អះអាងថា ភាគីក្រុមហ៊ុន ខេមបូឌាន ប្រតខេសស្ទីងសឺវីស (Cambodian Broadcasting Service Co., Ltd ឬ CBS) ដែលគ្រប់គ្រងទូរទស្សន៍ CNC បានបញ្ឈប់បុគ្គលិកផ្នែកព័ត៌មាន ផ្នែកកាត់តរូបភាព និងអ្នកសម្របសម្រួលកម្មវិធី សរុប២២នាក់ ទាំងមិនបានទូរទាត់ប្រាក់អត្ថប្រយោជន៍ឱ្យបានពេញលេញតាមច្បាប់ស្ដីពីការងារទេ ដូចជា ប្រាក់ជំងឺចិត្ត ប្រាក់អតីតភាពការងារ និងប្រាក់ដំណាច់ឆ្នាំ។
ករណីនេះ ពួកគេស្វែងរកមេធាវីនៅសហភាពការងារកម្ពុជា ឱ្យជួយការពារផ្លូវច្បាប់ ដើម្បីទាមទារអត្ថប្រយោជន៍បន្ថែមពីភាគីក្រុមហ៊ុនដែលបានបញ្ឈប់ពួកគេពីការងារ។
ប្រធានសហភាពការងារកម្ពុជា លោក អាត់ ធន់ ឱ្យដឹងថា នៅព្រឹកថ្ងៃចន្ទនេះ ភាគីក្រុមហ៊ុនបានបដិសេធទទួលលិខិតរបស់មេធាវីដែលសុំជួបដើម្បីពិភាក្សាផ្លូវច្បាប់រកដំណោះស្រាយ។
តែយ៉ាងណា លោកថា បញ្ហានេះ ក្រុមការងារនឹងបន្តផ្ញើសារតាមអ៊ីម៉ែលបន្ថែមទៀតទៅភាគីក្រុមហ៊ុន CBS ដើម្បីព្យាយាមរកការជជែកទល់មុខគ្នា មុនឈានទៅរកកិច្ចអន្តរាគមន៍ពីក្រសួងការងារ និងក្រុមប្រឹក្សាអាជ្ញាកណ្ដាល។
តែយ៉ាងណា ក្រោយពីមានការផ្សព្វផ្សាយពីបញ្ហានេះ ក្រុមហ៊ុន (CBS) បានបំភ្លឺក្នុងលិខិតចុះថ្ងៃទី២៨ ខែតុលា ឆ្នាំ២០២១ សប្ដាហ៍មុនថា ការបញ្ឈប់បុគ្គលិកនេះ ដោយសារតែក្រុមហ៊ុនត្រូវកែសម្រួលការងារ ហើយថា វិធានកែសម្រួលនោះ ក្រុមហ៊ុនបានជូនដំណឹងរួចហើយចាប់តាំងពីខែកញ្ញា ឆ្នាំ២០២១ ដោយធ្វើជា២ដំណាក់កាល ហើយនេះជាការកែសម្រួលដំណាក់កាលទី២ ដោយបានបញ្ចប់កិច្ចសន្យាបុគ្គលិកចំនួន១៧នាក់នៅទូរទស្សន៍ CNC។
ក្រុមហ៊ុនបានគូសបញ្ជាក់ថា ការបញ្ចប់កិច្ចសន្យាបុគ្គលិកនេះ ខ្លួនបានអនុវត្តស្របតាមច្បាប់ការងារ សម្រាប់ការទូរទាត់អត្ថប្រយោជន៍ជូនបុគ្គលិក ដូចជា ប្រាក់ខែចុងក្រោយ ប្រាក់ជូនដំណឹងមុន ទៅតាមអតីតភាពការងាររបស់បុគ្គលិកម្នាក់ៗ ប្រាក់ដំណាច់ឈប់សម្រាកដែលនៅសល់ ប្រាក់រម្លឹកអតីតភាពការរងារមុនឆ្នាំ២០១៩ និងប្រាក់ដំណាច់អតីតភាពការងារក្រោយឆ្នាំ២០១៩ដែលនៅសល់។
យ៉ាងនេះក្ដី បុគ្គលិកផ្នែកព័ត៌មានទូរទស្សន៍ CNC ម្នាក់ ប្រចាំនៅខេត្តត្បូងឃ្មុំ លោក ជឹង សេងឡុង ឱ្យដឹងថា គាត់ធ្វើការនៅក្រុមហ៊ុននេះរយៈ៨ឆ្នាំហើយ តែការទូរទាត់ពីភាគីក្រុមហ៊ុនបានតែមួយឆ្នាំទេ។
លោកថា៖ «ខ្ញុំគ្រាន់តែចង់បានការគិតគូរពីក្រុមហ៊ុនហ្នឹងឱ្យគ្រប់ឆ្នាំរបស់ខ្ញុំដែលខ្ញុំធ្វើការ។ ទី២ បើគាត់អត់ព្រម មានតែទៅក្រសួងការងារ ឬក៏សុំអន្តរាគមន៍ពីសម្តេច [នាយករដ្ឋមន្ត្រី] ឱ្យជួយពួកខ្ញុំ ពីព្រោះដូចដឹងហើយ បើក្រុមហ៊ុនគាត់ថាក្ស័យធន អាហ្នឹងមិនអីទេ! អានេះ គាត់បញ្ឈប់បុគ្គលិកក្នុងហេតុផលកែសម្រួលផ្សេងៗ ហើយមួយចំនួនក្នុងហ្នឹងឃើញរើសបុគ្គលិកបន្ថែមទៀត»។