សាលាដំបូងរាជធានីភ្នំពេញ បានសម្រេចកាត់ទោសកុមារ កាក់ សុវណ្ណច័្ឆយ ឱ្យជាប់ពន្ធនាគារ៨ខែ ដោយអនុវត្តទោស៤ខែ១៥ថ្ងៃ ហើយទោសនៅសល់ត្រូវព្យួរ ដែលនាំឱ្យកុមាររូបនេះនឹងត្រូវដោះលែងនៅក្នុងសប្ដាហ៍ក្រោយ។
កុមារ កាក់ សុវណ្ណច្ឆ័យ អាយុ១៦ឆ្នាំ ដែលម្ដាយអះអាងថាកំពុងមានជំងឺអូទីហ្សឹម ត្រូវបានសមត្ថកិច្ចចាប់ខ្លួនកាលពីថ្ងៃទី២៤ ខែមិថុនា ឆ្នាំ២០២១។ ក្រោយមក ចៅក្រមសាលាដំបូងរាជធានីភ្នំពេញ បានចោទប្រកាន់និងបញ្ជូនទៅឃុំខ្លួននៅពន្ធនាគារ ក្រោមពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ» បន្ទាប់ពីកុមារអាយុក្រោម១៨ឆ្នាំរូបនេះបានបង្ហោះសាររិះគន់រដ្ឋាភិបាលតាមប្រព័ន្ធតេឡេក្រាម។
ក្រោយពីឃុំខ្លួននៅពន្ធនាគារព្រៃស រង់ចាំសវនាការនិងជំនុំជម្រះរយៈពេលជាង៤ខែនោះ ប្រធានក្រុមប្រឹក្សាជំនុំជម្រះសាលាដំបូងរាជធានី លោក អ៊ួង វុទ្ធា បានប្រកាសសាលក្រមសំណុំរឿងកូនប្រុសអតីតមន្ត្រីបក្សប្រឆាំង នៅថ្ងៃចន្ទនេះ។
ប៉ុន្តែមុនពេលប្រកាស ចៅក្រមបានឱ្យតំណាងស្ថានទូត អង្គការសង្គមស៊ីវិល រួមទាំងអ្នកសារព័ត៌មាន ដែលកំពុងអង្គុយក្នុងបន្ទប់សវនាការរង់ចាំស្ដាប់ការប្រកាសសាលក្រមនេះ ចេញមកខាងក្រៅទាំងអស់ លើកលែងតែមេធាវី និងម្ដាយកុមារ កាក់ សុវណ្ណច្ឆ័យ តែប៉ុណ្ណោះ។
ម្ដាយកុមារ កាក់ សុវណ្ណច្ឆ័យ គឺអ្នកស្រី ព្រំ ចាន់ថា ប្រាប់អ្នកសារព័ត៌មាននៅមុខសាលាដំបូងរាជធានីភ្នំពេញ ដោយទឹកមុខស្រពោនថា ចៅក្រមបានកាត់ទោសកូនប្រុសគាត់ឱ្យជាប់ពន្ធនាគារ៨ខែ ប៉ុន្តែអនុវត្តទោសតែ៤ខែ១៥ថ្ងៃប៉ុណ្ណោះ។
យ៉ាងណា អ្នកស្រីថា កូនរបស់គាត់ត្រូវបានដាក់ឱ្យស្ថិតក្រោមការព្យួរទោសរយៈពេល២ឆ្នាំទៀត ហើយតម្រូវឱ្យរូបគេបង្ហាញខ្លួននៅចំពោះមុខតុលាការគ្រប់ពេលដែលតុលាការកោះហៅជាដើម។
អ្នកស្រី ព្រំ ចាន់ថា បន្តថា ទោះបីជាតុលាការសម្រេចដោះលែងកូនគាត់នៅប៉ុន្មានថ្ងៃខាងមុខក៏ពិតមែន ប៉ុន្តែកូនរបស់គាត់មិនមានសិទ្ធិក្នុងការដើរហើរនិងបញ្ចេញមតិនោះទេ។ អ្នកស្រីស្នើទៅតុលាការឱ្យទម្លាក់ចោលបទចោទប្រកាន់ និងដកបម្រាមឬលក្ខខណ្ឌ ដើម្បីឱ្យកូនប្រុសនិងគ្រួសាររបស់គាត់មានសេរីភាពពេញលេញ។
អ្នកស្រីថា៖ «ត្បិតបានដោះលែង ប៉ុន្តែយើងអត់មានសេរីភាពក្នុងការដើរហើរ ហើយស្ថិតនៅក្នុងការឃ្លាំមើលរបស់ពួកគាត់ទៀត។ អ៊ីចឹងវាពិបាកណាស់ បន្ទុកធ្ងន់មែនទែន សម្រាប់គ្រួសារខ្ញុំ។ ឥលូវហ្នឹង កូនខ្ញុំនៅសល់១០ថ្ងៃទៀតចេញ ការរៀនសូត្ររបស់គាត់ក៏ពិបាក ចង់ប្ដូរទីលំនៅក៏ពិបាក ការដើរទៅណាក៏ពិបាក ត្រូវបង្ហាញខ្លួនគ្រប់ពេលវេលា។ បើអត់បង្ហាញខ្លួន គេអាចចាប់គាត់ដាក់ពន្ធនាគារម្ដងទៀត»។
ក្រោយពីចាប់ឃុំខ្លួនកុមារ កាក់ សុវណ្ណច្ឆ័យ នៅពន្ធនាគារនោះ កាលពីថ្ងៃទី២ ខែកញ្ញា ឆ្នាំ២០២១ ក្រុមអ្នកជំនាញសិទ្ធិមនុស្សរបស់អង្គការសហប្រជាជាតិ បានចេញសេចក្ដីថ្លែងការណ៍រួមមួយ ដោយចាត់ទុកការចាប់ឃុំខ្លួននិងចោទប្រកាន់ទៅកុមាររូបនេះ ថាជាការធ្វើឡើងដោយរំលោភអនុសញ្ញា អង្គការកំពូលមួយនេះ ស្ដីពីសិទ្ធិកុមារ ដែលកម្ពុជាបានផ្ដល់សច្ចាប័ននៅឆ្នាំ១៩៩២។
ក្រុមអ្នកជំនាញសិទ្ធិមនុស្សអន្តរជាតិទាំងនោះបានអំពាវនាវដល់រដ្ឋាភិបាលកម្ពុជាទម្លាក់ចោលការចោទប្រកាន់និងដោះលែងកុមាររូបនេះឱ្យនៅក្រៅឃុំ និងត្រូវធានាថាសិទ្ធិរបស់គាត់ត្រូវបានការពារស្របតាមគោលការណ៍ឧត្ដមផលប្រយោជន៍របស់កុមារ ហើយត្រូវអនុលោមតាមអនុសញ្ញាស្ដីពីសិទ្ធិកុមារ អនុសញ្ញាស្ដីពីសិទ្ធិជនពិការ និងច្បាប់កម្ពុជា ដើម្បីការពារសិទ្ធិកុមារក្នុងការបញ្ចេញមតិនិងការចូលរួមផងដែរ។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ក្រមនីតិវិធីបានចែងថា ចំពោះសវនាការកុមារត្រូវធ្វើអសាធារណៈ ដើម្បីចៀសវាងផលប៉ះពាល់ដល់សេចក្ដីថ្លៃថ្នូររបស់កុមារ។ ប៉ុន្តែលោកបង្ហាញចម្ងល់ថា អំឡុងពេលសវនាការកន្លងមក តុលាការមិនបានធ្វើជាអសាធារណៈដូចពេលប្រកាសសាលក្រមនេះទេ។
លោកបន្តថា សំណុំរឿងកុមារ កាក់ សុវណ្ណច្ឆ័យ ត្រូវបានសហគមន៍ជាតិនិងអន្តរជាតិចាប់អារម្មណ៍ខ្លាំង ត្បិតករណីនេះជារឿងនយោបាយ ដោយសារឪពុករបស់កុមាររូបនេះជាអតីតមន្ត្រីបក្សសង្រ្គោះជាតិដែលកំពុងជាប់ឃុំនៅពន្ធនាគារ ខណៈម្ដាយតែងសកម្មក្នុងការចេញតវ៉ាជារៀងរាល់ថ្ងៃសុក្រ ដើម្បីទាមទាររកយុត្តិធម៌ឱ្យគ្រួសារគាត់និងអ្នកជាប់ឃុំផ្សេងទៀតដែរ។
លោកថា៖ «ឪពុកគាត់គឺជាសកម្មជនអតីតបក្សប្រឆាំង ហើយត្រូវបានចាប់ដាក់ពន្ធនាគារ មិនទាន់ចេញដែរ ពីរឿង “រួមគំនិតក្បត់និងញុះញង់”។ ហើយម្ដាយរបស់គាត់ យើងឃើញថា ការតវ៉ាដែលមានឈ្មោះ “ស្ត្រីថ្ងៃសុក្រ” ជាដើម។ ហើយកុមារ កាក់ សុវណ្ណច្ឆ័យ ត្រូវបានរងការវាយដំកន្លងមក ហើយរកអ្នកដែលបង្កមកដាក់ទោសមិនឃើញ។ ផ្ទុយទៅវិញ គាត់ត្រូវបានចាប់ដាក់ពន្ធនាគារ ផ្ដន្ទាទោសគាត់។ យើងមើលសាលក្រមហ្នឹង វាហាក់បីដូចជាមានការរឹតត្បិតសេរីភាពកុមារបន្ថែមទៀត ដូចជារឿងការផ្លាស់ប្ដូរទីលំនៅត្រូវជូនដំណឹង ការចង់ចេញទៅក្រៅប្រទេសត្រូវសុំការអនុញ្ញាត និងបង្ហាញមុខនៅតុលាការ ជាដើម។ អាហ្នឹងជាការកម្រិតសេរីភាពដែលធ្វើឱ្យប៉ះពាល់ទៅដល់គាត់»។
កុមារ កាក់ សុវណ្ណច្ឆ័យ ធ្លាប់ត្រូវបានសមត្ថកិច្ចរាជធានីភ្នំពេញចាប់ខ្លួនម្ដងរួចមកហើយកាលពីខែតុលា ឆ្នាំ២០២០ ពីបទ «ចូលទីស្នាក់ការអតីតគណបក្សសង្គ្រោះជាតិ» នៅសង្កាត់ចាក់អង្រែលើ រាជធានីភ្នំពេញ ដោយបំពានលើបម្រាមតុលាការ។ ប៉ុន្តែកុមារារូបនោះត្រូវបានសមត្ថកិច្ចដោះលែងវិញ ក្រោយសាកសួរអស់រយៈពេល៤៨ម៉ោង។
ក្រោយពីសមត្ថកិច្ចដោះលែងរួច ប៉ុន្មានខែក្រោយមក កុមារា កាក់ សុវណ្ណច្ឆ័យ ត្រូវបានជនមិនស្គាល់មុខលួចវាយពីក្រោយ បណ្ដាលឱ្យបែកក្បាលដេរ២០ថ្នេរ។ ប៉ុន្តែជាច្រើនខែមកនេះ សមត្ថកិច្ចនៅមិនទាន់រកឃើញមុខជនដៃដល់ ដើម្បីយកមកផ្ដន្ទាទោសនៅឡើយទេ៕