សកម្មជនដីធ្លី នៅស្រុកស្រែអំបិល ខេត្តកោះកុង បានសុំពន្យារពេលចូលសវនាការ ដោយសារខ្លួនទើបសម្រាលកូន មិនអាចធ្វើដំណើរទៅចូលរួមសវនាការ និងមិនទាន់រកមេធាវីមកការពារក្ដីបាននៅឡើយ។
កាលពីថ្ងៃទី១៩ ខែតុលា ឆ្នាំ២០២១ តំណាងអយ្យការអមសាលាដំបូងខេត្តកោះកុង លោក ឃុន តឿន បានចេញដីកាកោះហៅអ្នកស្រី អិប តឹង រស់នៅភូមិតានី ឃុំជីខលើ ស្រុកស្រែអំបិល ឱ្យបង្ហាញខ្លួននៅសវនាការនៅព្រឹកថ្ងៃទី២ ខែវិច្ឆិកា ឆ្នាំ២០២១ ស្អែកនេះ ក្រោមបទចោទ «បរិហារកេរ្តិ៍ជាសាធារណៈ» ដែលធ្វើឡើងទៅតាមបណ្ដឹងរបស់ឧកញ៉ា ហេង ហ៊ុយ ពាក់ព័ន្ធរឿងបរិហារកេរ្តិ៍។
អ្នកស្រី អិប តឹង ដែលអះអាងថាទើបសម្រាលកូនបានជាង២០ថ្ងៃ ប្រាប់ វីអូឌី នៅថ្ងៃចន្ទនេះថា អ្នកស្រីបានដាក់ពាក្យសុំពន្យារពេលចូលសវនាការនេះ កាលពីចុងសប្ដាហ៍មុន ដោយសារតែអ្នកស្រីទើបសម្រាលកូន ហើយសរសៃខ្ចី ពិបាកក្នុងការធ្វើដំណើរទៅចូលរួមសវនាការ និងមិនមានពេលវេលាគ្រប់គ្រាន់សម្រាប់ស្វែងរកមេធាវីមកជួយការពារក្ដី។
ស្ត្រីសកម្មជនដីធ្លីរូបនេះនៅតែលើកឡើងថា ខ្លួនបានរងភាពអយុត្តិធម៌ជាខ្លាំង ខណៈអ្នកស្រីនិងពលរដ្ឋជិត២០០គ្រួសារទៀតបានបាត់បង់ដីធ្លី ដោយសារក្រុមហ៊ុន ហេង ហ៊ុយ អភិវឌ្ឍន៍ (Heng Huy Development Co., Ltd) របស់លោក ហេង ហ៊ុយ រំលោភយកអស់តាំងពីឆ្នាំ២០០៧ និងប្ដែងពលរដ្ឋ១០នាក់ទៅតុលាការថែមទៀត។
អ្នកស្រីបន្ថែមថា៖ «ខ្ញុំយល់ថារឿងនេះ វាអយុត្តិធម៌សម្រាប់ខ្ញុំខ្លាំងណាស់ ដែលតុលាការខេត្តកោះកុងចាត់ការតាមបណ្ដឹង ហេង ហ៊ុយ យ៉ាងលឿន ដោយសារតែ ហេង ហ៊ុយ មានលុយ។ គាត់ចង់ឱ្យតុលាការធ្វើអីក៏បាន តែសម្រាប់បណ្ដឹងរបស់យើងអ្នករងគ្រោះដីធ្លីវិញ មិនបានគេចាត់ការលឿនអ៊ីចឹងទេ»។
អ្នកស្រី ដេត ហួរ ដែលអះអាងថាកំពុងមានជម្លោះដីធ្លី និងជាប់បណ្ដឹងនៅតុលាការដោយសារ លោក ហេង ហ៊ុយ ប្ដឹងដែរនោះ ស្នើដល់តុលាការទម្លាក់ចោលការចោទប្រកាន់លើកអ្នកស្រី អិប តឹង និងពលរដ្ឋ៩នាក់ផ្សេងទៀត ដោយថា ពលរដ្ឋទាំងនោះពុំមានកំហុសដូចការចោទប្រកាន់ឡើយ។
ពលរដ្ឋរូបនេះបានចោទលោក ហេង ហ៊ុយ ថាបានរំលោភយកដីធ្លីរបស់ពួកគាត់ចំនួន១៩៧គ្រួសារ តាំងពីឆ្នាំ២០០៧ និងបានប្ដឹងតំណាងពលរដ្ឋ១០នាក់ទៅតុលាការថែមទៀត ក្នុងនោះមាន អ្នកស្រី អិប តឹង បានរងបណ្ដឹងចំនួន២ដង។
អ្នកស្រីបន្ថែមថា៖ «យើងនិយាយរឿង ហេង ហ៊ុយ យកដី! ដោយសារតែលោក ហេង ហ៊ុយ យកដីយើងមែន! អ៊ីចឹងជុំវិញរឿងហ្នឹង តុលាការគួរទម្លាក់ចោលការចោទប្រកាន់ និងអាជ្ញាធរធ្វើការដោះស្រាយដីធ្លីជូនពួកយើង មិនគួរមកចាត់ការលើបណ្ដឹងប្រឆាំងពលរដ្ឋរងគ្រោះដីធ្លីមួយករណីទៀតអ៊ីចឹងទេ»។
អ្នកស្រី អិប តឹង បានផ្សព្វផ្សាយរូបថតលោក ហេង ហ៊ុយ លើហ្វេសប៊ុករបស់អ្នកស្រីដែលមានឈ្មោះ «ដាដា ដាដា» កាលពីថ្ងៃទី៥ ខែសីហា ឆ្នាំ២០២១ ដោយបានសរសេរថា «កើតជាមនុស្ស មុននិងក្រោយគង់តែស្លាប់ តែមុននឹងស្លាប់ ធ្វើឱ្យល្អបន្តិចទៅ កុំដូចពាក្យចាស់ថា ខ្លួនរស់តែឈ្មោះស្អុយរលួយគួរឱ្យខ្ពើម មិនចង់ឮ! ដូចលោក ហេង ហ៊ុយ ប្លន់ដីពលរដ្ឋហើយ ហៅពលរដ្ឋឡើងតុលាការទៀត»។
លោក ហេង ហ៊ុយ បានលើកឡើងក្នុងបណ្ដឹងដាក់ទៅអធិការនគរបាលស្រុកស្រែអំបិល កាលពីថ្ងៃទី៦ ខែសីហា ឆ្នាំ២០២១ ថាការផ្សព្វផ្សាយលើបណ្ដាញសង្គមរបស់អ្នកស្រី អិប តឹង នេះជាការភូតកុហកបោកប្រាស់ មួលបង្កាច់ បង្ខូចកេរ្តិ៍ ធ្វើឱ្យមានការរើសអើង និងធ្វើឱ្យប៉ះពាល់ដល់កិត្តិយសសេចក្ដីថ្លៃថ្នូររបស់លោកយ៉ាងធ្ងន់ធ្ងរ។
វីអូឌី មិនអាចសុំការបញ្ជាក់បន្ថែមពីប្រធានក្រុមហ៊ុន ហេង ហ៊ុយ គឺលោក ហេង ហ៊ុយ បានទេនៅថ្ងៃនេះ។
មន្រ្តីសម្របសម្រួលអង្គការការពារសិទ្ធិមនុស្សលីកាដូ ប្រចាំខេត្តកោះកុង លោក ហ៊ួរ អ៊ីន បានស្នើដល់តុលាការឱ្យពិចារណាឡើងវិញ ចំពោះចំណាត់ការលើបណ្ដឹងប្រឆាំងអ្នកស្រី អិប តឹង។ លោកថា រឿងនេះកើតឡើងដោយសារតែបញ្ហាជម្លោះដីធ្លីរវាងពលរដ្ឋ និងឧកញ៉ា ហេង ហ៊ុយ មិនត្រូវបានដោះស្រាយ។
ជុំវិញការតវ៉ាដីធ្លីរបស់ក្រុមពលរដ្ឋនេះ លោក ហេង ហ៊ុយ ធ្លាប់អះអាងថា ដីដែលក្រុមហ៊ុនរបស់លោកកំពុងកាន់កាប់នោះជាដីមានបណ្ណកម្មសិទ្ធិត្រឹមត្រូវស្របទៅតាមច្បាប់ ដែលលោកបានប្រមូលទិញពីប្រជាពលរដ្ឋជាច្រើនឆ្នាំមកហើយ។
រដ្ឋបាលខេត្តកោះកុង បានចុះផ្សាយកាលពីចុងឆ្នាំ២០២០ ថាករណីវិវាទដីធ្លីរវាងពលរដ្ឋនិងក្រុមហ៊ុន ហេង ហ៊ុយ ត្រូវបានដោះស្រាយចប់ជាស្ថាពរតាំងពីឆ្នាំ២០០៩ តាមរយៈសាលដីកាស្ថាពររបស់តុលាការកំពូល និងអនុក្រឹត្យលេខ៣៦ របស់រាជរដ្ឋាភិបាល កាលពីឆ្នាំ២០០៩នោះផងដែរ។
រដ្ឋបាលខេត្តកោះកុង បន្តថា លោក ហេង ហ៊ុយ ទទួលបានកម្មសិទ្ធិដីធ្លីនោះនៅឆ្នាំ២០១១ ខណៈពលរដ្ឋ១៩៧គ្រួសារទើបតែប្រមូលផ្ដុំតវ៉ាជាថ្មីទៀតនៅឆ្នាំ២០១៩ ក្រោយពីតុលាការ និងក្រសួងរៀបចំដែនដី បានបិទបញ្ចប់បណ្ដឹងតវ៉ារួចទៅហើយ។
ចំណែកក្រសួងរៀបចំដែនដី បានបដិសេធចំនួន៣ដងហើយ ដោយមិនដោះស្រាយឱ្យពលរដ្ឋទាំងនោះឡើយ និងស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ ចំពោះអ្នកដែលក្រសួងថាបានញុះញង់ឱ្យពលរដ្ឋ១៩៧គ្រួសារនោះឡើងមកតវ៉ាដល់រាជធានីភ្នំពេញផងដែរ៕
