គណបក្សបេះដូងជាតិ ស្នើយ៉ាងទទូចដល់ក្រសួងមហាផ្ទៃពន្លឿននីតិវិធីលើការពិនិត្យនិងសម្រេចលើការស្នើសុំចុះបញ្ជីគណបក្សមួយនេះឱ្យបានឆាប់ ដើម្បីឱ្យខ្លួនមានលទ្ធភាពធ្វើសកម្មភាពនយោបាយស្របតាមច្បាប់។
សេចក្ដីថ្លែងការណ៍របស់គណបក្សបេះដូងជាតិ ដែលមានលោក សៀម ភ្លុក ជាប្រធាន ចុះថ្ងៃទី១ ខែវិច្ឆិកា ឆ្នាំ២០២១នេះ បានលើកឡើងថា គណបក្សនេះបានដាក់ពាក្យស្នើសុំចុះបញ្ជីគណបក្សនយោបាយទៅក្រសួងមហាផ្ទៃ អស់រយៈពេលជិត៥ខែមកហើយ និងបានធ្វើការកែសម្រួលចំនួន៣លើកជាបន្តបន្ទាប់តាមសំណើរបស់ក្រសួង ឱ្យស្របតាមបទប្បញ្ញត្តិនៃច្បាប់ស្តីពីច្បាប់គណបក្សនយោបាយ។
សេចក្ដីថ្លែងការណ៍ដដែលនោះបន្តថា៖ «គណបក្សបេះដូងជាតិ មានការសោកស្ដាយយ៉ាងខ្លាំងចំពោះក្រសួងមហាផ្ទៃ ដែលយឺតយ៉ាវក្នុងការឆ្លើយតបចំពោះការស្នើសុំចុះបញ្ជីគណបក្សនយោបាយនៃគណបក្សបេះដូងជាតិ»។
ករណីនេះ គណបក្សបេះដូងជាតិ បានអំពាវនាវយ៉ាងទទូចដល់ក្រសួងមហាផ្ទៃពន្លឿនការពិនិត្យនិងសម្រេចលើការស្នើសុំនេះឱ្យបានឆាប់ ដើម្បីឱ្យខ្លួនមានលទ្ធភាពធ្វើសកម្មភាពនយោបាយស្របតាមច្បាប់របស់កម្ពុជា។
កន្លងមក តំណាងស្ថាបនិកគណបក្សបេះដូងជាតិ លោក សៀម ភ្លុក បានដាក់សំណើស្នើសុំបង្កើតគណបក្សនយោបាយថ្មីនេះទៅកាន់ក្រសួងមហាផ្ទៃ កាលពីថ្ងៃទី៣ ខែមិថុនា។ ប៉ុន្តែផ្អែកតាមបញ្ញត្តិមាត្រា១០ នៃច្បាប់ស្ដីពីគណបក្សនយោបាយ ក្រសួងបានស្នើឱ្យតំណាងស្ថាបនិកគណបក្សនេះត្រូវធ្វើការកែសម្រួលខ្លឹមសារក្នុងលក្ខន្តិកៈគណបក្សឱ្យត្រឹមត្រូវ ស្របតាមបញ្ញត្តិមាត្រា១០ ត្រង់ចំណុច៤ នៃច្បាប់ស្ដីពីគណបក្សនយោបាយ រួចផ្ញើទៅក្រសួងវិញ។
គិតចាប់តាំងពីការរំលាយគណបក្សសង្គ្រោះជាតិ នៅខែវិច្ឆិកា ឆ្នាំ២០១៧ ដោយតុលាការកំពូលកម្ពុជាមក មានអតីតមន្ត្រីគណបក្សសង្គ្រោះជាតិ ចំនួនជាង២០នាក់ ក្នុងចំណោម១១៨នាក់ ដែលជាប់បម្រាមធ្វើនយោបាយរយៈពេល៥ឆ្នាំនោះ បានស្នើសុំសិទ្ធិធ្វើនយោបាយឡើងវិញ។ ពួកគេមួយចំនួនបានទៅបង្កើតគណបក្សនយោបាយថ្មី និងមួយចំនួនទៀតនៅមិនទាន់សម្រេចចិត្តនៅឡើយទេ ខណៈការបោះឆ្នោតឃុំ-សង្កាត់នឹងធ្វើឡើងនៅឆ្នាំក្រោយនេះ។
រហូតមកដល់ពេលនេះ មានគណបក្សនយោបាយជាង៤០បានចុះបញ្ជីនៅក្រសួងមហាផ្ទៃ ក្នុងនោះមានគណបក្សចំនួន៥ ដែលបានបង្កើតឡើងដោយអតីតមន្ត្រីគណបក្សប្រឆាំង រួមមាន គណបក្សឆន្ទៈខ្មែរ របស់លោក គង់ មូនីកា កូនប្រុសរបស់លោក គង់ គាំ, គណបក្សខ្មែរអភិរក្ស របស់លោក រៀល ខេមរិន្ទ្រ, គណបក្សខ្មែរស្រឡាញ់ជាតិ របស់លោក ជីវ កត្តា, គណបក្សកំណែទម្រង់កម្ពុជា របស់លោក ប៉ុល ហំម និងលោក អ៊ូ ច័ន្ទរ័ត្ន និងគណបក្សបេះដូងជាតិ ដែលត្រូវបានគេអះអាងថាជារបស់លោក ថាច់ សេដ្ឋា៕