ក្រសួងមហាផ្ទៃ ព្រមានចាត់វិធានការច្បាប់លើសមាគមគ្រូបង្រៀនកម្ពុជាឯករាជ្យ ប្រសិនបើសមាគមមួយនេះមិនផ្ញើរបាយការណ៍សកម្មភាពរបស់ខ្លួនដាក់ជូនក្រសួងមហាផ្ទៃ នៅត្រឹមដំណាច់ខែកុម្ភៈ ឆ្នាំ២០២៣។
លិខិតក្រសួងមហាផ្ទៃ ចុះថ្ងៃទី២៦ ខែមករា ឆ្នាំ២០២៣ ផ្ញើទៅកាន់លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បញ្ជាក់ថា សមាគមត្រូវជូនដំណឹងជាលាយលក្ខណ៍អក្សរអំពីព័ត៌មានរាល់គណនីដែលត្រូវបើក សម្រាប់កិច្ចប្រតិបត្តិការរបស់ខ្លួននៅធនាគារ និងផ្តល់នូវរបាយការណ៍បូកសរុបសកម្មភាពការងារ និងរបាយការណ៍ហិរញ្ញវត្ថុប្រចាំឆ្នាំ២០២២ ជូនមកក្រសួងមហាផ្ទៃ ឱ្យបានមុនដំណាច់ខែកុម្ភៈ ឆ្នាំ២០២៣ ជាកំណត់។
ក្រសួងព្រមានថា៖ «ក្នុងករណីសមាគមមិនអនុវត្តតាមស្មារតីនៃលិខិតនេះ ក្រសួងមហាផ្ទៃនឹងចាត់វិធានការតាមផ្លូវច្បាប់ជាធរមាន»។
ក្នុងពេលជាមួយគ្នានោះ ក្រសួងក៏បានរំលឹកដល់សមាគមគ្រូបង្រៀនកម្ពុជាឯករាជ្យ ត្រូវធ្វើសកម្មភាពឱ្យបានត្រឹមត្រូវតាមការកំណត់ក្នុងលក្ខន្តិកៈដែលបានតម្កល់ទុកនៅក្រសួងមហាផ្ទៃ ព្រមទាំងបទប្បញ្ញត្តិនៃច្បាប់ និងលិខិតបទដ្ឋានគតិយុត្តិនានាជាធរមានផងដែរ។
គួរកត់សម្គាល់ដែរថា មុននឹងធ្វើការព្រមានចាត់វិធានការច្បាប់ នៅក្នុងលិខិតដែលផ្ញើទៅកាន់លោកស្រី អ៊ុក ឆាយ៉ាវី នោះ ក្រសួងមហាផ្ទៃក៏បានរំលឹកឡើងវិញពីសកម្មភាពរបស់សមាគមគ្រូបង្រៀនកម្ពុជាឯករាជ្យ ដែលកាលពីពេលកន្លងទៅថ្មីៗនេះ បានដឹកនាំគ្រូបង្រៀនធ្វើបាតុកម្មនៅក្បែរទីលានប្រជាធិបតេយ្យ ក្នុងគោលបំណងទាមទារឱ្យរដ្ឋាភិបាលដោះលែងអ្នកជាប់ឃុំមនសិការ ប៉ុន្តែត្រូវបានក្រសួងមហាផ្ទៃ ចាត់ទុកសកម្មភាពរបស់សមាគមគ្រូបង្រៀនកម្ពុជាឯករាជ្យ នៅពេលនោះ ថាជាសកម្មភាពបាតុកម្មខុសច្បាប់ ដែលធ្វើឱ្យប៉ះពាល់ដល់សណ្តាប់ធ្នាប់សាធារណៈ។
ក្រសួងលើកឡើងថា៖ «ក្រសួងមហាផ្ទៃបានពិនិត្យឃើញថា សមាគមគ្រូបង្រៀនកម្ពុជាឯករាជ្យ បានដឹកនាំក្រុមបាតុករធ្វើបាតុកម្មខុសច្បាប់លើទ្រូងផ្លូវសាធារណៈ ក្បែរទីលានប្រជាធិបតេយ្យ ខណ្ឌឫស្សីកែវ រាជធានីភ្នំពេញ ដែលធ្វើឱ្យប៉ះពាល់ដល់សណ្តាប់ធ្នាប់សាធារណៈ និងបានធ្វើការដង្ហែក្បួនដោយថ្មើរជើង ដើម្បីទៅដាក់ញត្តិនៅសាលាដំបូងរាជធានីភ្នំពេញ និងខុទ្ទកាល័យសម្តេចតេជោនាយករដ្ឋមន្រ្តី ដែលជាសកម្មភាពបំពាននឹងស្មារតី នៃកិច្ចប្រជុំជាមួយរដ្ឋបាលរាជធានីភ្នំពេញ ដូចបញ្ជាក់ក្នុងកំណត់ហេតុកិច្ចប្រជុំ ចុះថ្ងៃទី២១ ខែធ្នូ ឆ្នាំ២០២២ និងកំណត់ហេតុកិច្ចប្រជុំ ចុះថ្ងៃទី២៦ ខែធ្នូ ឆ្នាំ២០២២»។
ការចេញមកព្រមានរបស់ក្រសួងមហាផ្ទៃនេះ គឺតែប៉ុន្មានម៉ោងប៉ុណ្ណោះក្រោយពីក្រសួងដដែលនេះបានប្រកាសឱ្យសមាគមគ្រូបង្រៀនកម្ពុជាឯករាជ្យ ដង្ហែធម្មយាត្រាដើម្បីលើកកម្ពស់សីលធម៌សង្គមទៅតាមបណ្តាខេត្តមួយចំនួន ដែលចាប់ផ្តើមពីរាជធានីភ្នំពេញ នៅថ្ងៃទី១ ខែកុម្ភៈ ខាងមុខនេះ។
ឆ្លើយតបចំពោះការព្រមានរបស់ក្រសួងមហាផ្ទៃនេះ ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី លើកឡើងថា ចាប់តាំងពីមានវិបត្តិជំងឺកូវីដ-១៩មក សមាគមមិនមានជំនួយឧបត្ថម្ភពីស្ថាប័ន ឬប្រទេសណានោះទេ ហើយបុគ្គលិករបស់សមាគមធ្វើការងារដោយស្ម័គ្រចិត្តប៉ុណ្ណោះ ជាហេតុធ្វើឱ្យសមាគមមិនទាន់បានដាក់របាយការណ៍ដូចអ្វីដែលក្រសួងលើកឡើង។
អ្នកស្រី អ៊ុក ឆាយ៉ាវី ថាជុំវិញករណីដែលសមាគមមិនបានដាក់លិខិតទៅក្រសួងមហាផ្ទៃនេះ សមាគមគ្រូបង្រៀនកម្ពុជាឯករាជ្យ ក៏ធ្លាប់ផ្ញើលិខិតជម្រាបក្រសួងពីមូលហេតុនៃការឧបត្ថម្ភទៅក្រសួងរួចរាល់ហើយ តែមិនដែលឃើញក្រសួងឆ្លើយតបវិញនៅឡើយទេ។
អ្នកស្រីថា៖ « គ្រប់បែបយ៉ាងក្នុងការចំណាយទៅលើទាំងស្នាក់ការ ទាំងចំណាយរបស់សមាគម ព្រោះយើងអត់មានថាអ្នកណាជាអ្នកផ្ដល់ថវិកាឱ្យយើងកន្លងមក ហើយយើងធ្លាប់ដាក់លិខិតមើលហើយថាយើងអត់មានថវិកា ឬធ្វើរបាយការណ៍ឱ្យក្រសួងមែនមួយរយៈកន្លងមក ដោយសារតែយើងអត់មានថវិកាអីទាល់តែសោះ»។
ជាការឆ្លើយតបចំពោះការព្រមានចាត់វិធានការរបស់ក្រសួងមហាផ្ទៃ ថាប្រសិនសមាគមមិនដាក់របាយការណ៍មុនដំណាច់ខែកុម្ភៈនោះ អ្នកស្រី អ៊ុក ឆាយ៉ាវី ថ្លែងថានឹងពិនិត្យលិខិតឱ្យបានជាក់លាក់ជាមុនសិន៕
