អាជ្ញាធរជាតិអប្សរា បានអះអាងថា រយៈពេលជិត២០ឆ្នាំមកនេះ ដើមឈើសរុបប្រមាណ២លានដើមដាំនៅតំបន់អង្គរ ខណៈថ្មីៗនេះ ក្រុមការងារ ព្រះសង្ឃ និងវិស័យឯកជន បានដាំកូនឈើជាង២ ០០០ដើមបន្ថែមទៀតនៅបរិវេណវត្ត «ព្រះវិហារប្រាំពីរល្វែង» ដើម្បីលើកកម្ពស់សោភ័ណភាពប្រាង្គប្រាសាទទៀតផង។
អគ្គនាយកអាជ្ញាធរជាតិអប្សរា លោក ហង់ ពៅ មានប្រសាសន៍ថា អាជ្ញាធរបានចាប់ផ្ដើមការងារដាំកូនឈើឡើងវិញក្នុងរមណីយដ្ឋានអង្គរ តាំងពីឆ្នាំ២០០៤។ រហូតមកដល់ពេលនេះ មានកូនឈើប្រមាណ២លានដើមហើយដែលបានដាំ ដោយចំនួននេះមិនរាប់ដើមឈើដែលអាជ្ញាធរជាតិអប្សរា បានចែកចាយដល់សាធារណជនយកទៅដាំទាំងក្នុងនិងក្រៅខេត្តសៀមរាបនោះទេ។
លោកក៏បានរម្លឹកពីអត្ថប្រយោជន៍ជាច្រើនរបស់ដើមឈើ ទៅលើផ្នែកបរិស្ថាន និងការអភិរក្សប្រាសាទ។
លោកពន្យល់ថា៖ «ដើមឈើតែងទទួលបាននូវភាពសំណើមខ្ពស់ ដែលវាជួយកាត់បន្ថយកម្ដៅនៅលើថ្មប្រាសាទ និងទប់ខ្យល់ មិនឱ្យប៉ះពាល់ផ្ទាល់ទៅលើថ្មប្រាសាទជាដើម ដែលជួយលើការអភិរក្សមួយផ្នែកធំ។ បន្ថែមពីនេះ ដើមឈើក៏មានតួនាទីជួយស្រូបយកខ្យល់កាបូនអុកស៊ីត មិនឱ្យសាយភាយក្នុងបរិយាកាសជាដើម ដែលកាបូននោះវានឹងក្លាយជាភ្លៀងអាស៊ីតពេលចូលទៅក្នុងបរិយាកាស» ។
លោកពន្យល់បន្ថែមថា៖ «គោលការណ៍របស់អាជ្ញាធរជាតិអប្សរា គឺចង់ឱ្យវត្តទាំងអស់ក្នុងរមណីយដ្ឋានអង្គរមានសណ្ដាប់ធ្នាប់ និងបរិស្ថានល្អ ស័ក្ដិសមជាទីសក្ការបូជារបស់ប្រជាជនខ្មែរយើងទាំងមូល និងចង់ឱ្យវត្តទាំងអស់ក្លាយជាគំរូដល់វត្តនៅតាមតំបន់ដទៃទៀត»។
យ៉ាងណា បទល្មើសលួចកាប់ឈើប្រណិត និងប្រភេទឈើកម្រ ក៏តែងកើតមាននៅតំបន់រមណីយដ្ឋានអង្គរជារឿយៗផងដែរ។
ជាក់ស្តែង កាលពីថ្ងៃទី៣១ ខែមីនា ឆ្នាំ២០២១ មានករណីជនល្មើសបានលួចកាប់ដើមឈើគ្រញូងមួយដើមនៅក្នុងតំបន់ការពារទី១ នៃរមណីយដ្ឋានអង្គរ។ លើសពីនេះ ដើមឈើទាលមួយដើមនៅរមណីដ្ឋានអង្គរ ដែលមានអាយុរាប់សិបឆ្នាំ ក៏ត្រូវបានជនល្មើសលួចកាប់កាលពីថ្ងៃទី១២ ខែកក្កដា ឆ្នាំ២០២១។
របាយការណ៍ពីមន្ត្រីបរិស្ថានខេត្តសៀមរាប ធ្លាប់ឱ្យដឹងថា គិតចាប់ពីឆ្នាំ២០២០ រហូតដល់ដើមឆ្នាំ២០២១នេះ បទល្មើសលួចកាប់ដើមគ្រញូងក្នុងតំបន់អង្គរមានជាង១០ករណី ក្នុងនោះក៏មានករណីមួយចំនួនត្រូវបានមន្រ្តីបរិស្ថានបានរឹបអូសវត្ថុតាង និងកសាងសំណុំរឿងទៅតុលាការ។ ក្រៅពីការលួចកាប់ឈើប្រណិត ក៏មានករណីពលរដ្ឋខ្លះបានកាប់ទន្រ្ទានព្រៃធ្វើចម្ការខុសច្បាប់ទៀតផង ប៉ុន្តែករណីរានដីព្រៃនោះ អាជ្ញាធរគ្រាន់តែធ្វើកិច្ចសន្យានិងផាកពិន័យតែប៉ុណ្ណោះ៕
