អ្នកភូមិចំនួន១៤៥គ្រួសារ ស្ថិតក្នុងខណ្ឌពោធិ៍សែនជ័យ រាជធានីភ្នំពេញ បានផ្ទុះការតវ៉ាជាថ្មីទៀត នៅព្រឹកថ្ងៃទី២ ខែវិច្ឆិកា ក្រោយពេលក្រុមយោធានៅក្នុងបន្ទាយមួយបានធ្វើបណ្ណកម្មសិទ្ធិលើដីធ្លីដែលកំពុងមានជម្លោះ។
លោក ជា សុខ ដែលអះអាងថាជាតំណាងពលរដ្ឋទាំង១៤៥គ្រួសារ បានប្រាប់ វីអូឌី ថាពលរដ្ឋប្រមាណ១០០នាក់ តំណាងឱ្យ១៤៥គ្រួសារ បាននាំគ្នាប្រមូលផ្ដុំតវ៉ានៅមុខបន្ទាយទាហានវរសេនាតូចការពារអាកាសលេខ៩១ ស្ថិតនៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ដើម្បីទាមទារឱ្យមានដំណោះស្រាយរឿងដីធ្លីរបស់ពួកគាត់។
លោកបន្តថា ពួកគាត់មានជម្លោះដីធ្លីជាមួយទាហានជើងអាកាសលេខ៩១ ជិត២០ឆ្នាំហើយ រហូតពេលនេះនៅមិនទាន់ដោះស្រាយចប់នៅឡើយទេ។ លោកថា ពេលនេះ មេបញ្ជាការ នៃបញ្ជាការដ្ឋានវរសេនាតូចលេខ៩១ លោក សុខ ប៉ាង បានធ្វើបណ្ណកម្មសិទ្ធិជាសមូហភាពលើដីកំពុងមានជម្លោះនោះ ដោយមិនបានជូនដំណឹងដល់អាជ្ញាធរមូលដ្ឋាន និងដោះស្រាយជូនពលរដ្ឋឡើយ។
តំណាងពលរដ្ឋរូបនេះឱ្យដឹងទៀតថា ជុំវិញជម្លោះដីធ្លីនេះ រដ្ឋាភិបាលបានចេញសេចក្ដីសម្រេចជាច្រើនឆ្នាំហើយ ឱ្យកាត់ដីទំហំជាង៤ហិកតាជូនពលរដ្ឋ១៤៥គ្រួសារ ប៉ុន្តែមេយោធានៅវរសេនាតូចលេខ៩១ មិនបានអនុវត្តតាមឡើយ និងបានធ្វើរបាយការណ៍ភូមិកុហករដ្ឋាភិបាលថាបានដោះស្រាយបញ្ចប់វិវាទជូនពលរដ្ឋទៀតផង ខណៈពលរដ្ឋមិនទាន់ទទួលបានដំណោះស្រាយអ្វីទាំងអស់។
លោកបន្ថែមថា៖ «បញ្ហាជម្លោះដីធ្លីរបស់ពួកខ្ញុំនេះ គឺមានសេចក្ដីសម្រេច ស.ជ.ណ មានទាំងចំណាររបស់នាយករដ្ឋមន្ត្រី ឱ្យកាត់ចេញដីជាង៤ហិកតាជូនមកដល់ពួកខ្ញុំ បែរជាអនុវត្តន៍ហ្នឹងអត់ចេញតាំងពីឆ្នាំ២០១៧ រហូតមកដល់ពេលនេះ។ ហើយឥលូវមិនត្រឹមតែមិនអនុវត្តទេ គាត់ថែមទាំងធ្វើប្លង់កម្មសិទ្ធិយកទាំងដីជាង៤ហិកតារបស់ពួកខ្ញុំទៀត ធ្វើជាកម្មសិទ្ធិរបស់លោក សុខ ប៉ាង ប្រធានអង្គភាពនេះទៀត»។
អ្នកស្រី មូល សាមឺន ជាមេភូមិព្រៃទា និងជាជនរងផលប៉ះពាល់ដីធ្លីនេះដែរនោះ បាននិយាយថា ករណីមេបញ្ជាការនៃបញ្ជាការដ្ឋានវរសេនាតូចលេខ៩១ លោក សុខ ប៉ាង សុំធ្វើបណ្ណកម្មលើដីកំពុងមានជម្លោះនេះ គឺអាជ្ញាធរភូមិមិនបានដឹងឡើយ។
មេភូមិរូបនេះអះអាងថា ដីកំពុងមានជម្លោះនោះជាដីរបស់អ្នកភូមិដែលបានកាន់កាប់តាំងពីមុនសម័យ ប៉ុល ពត ប៉ុន្តែឆ្នាំ១៩៨៧ មន្រ្តីយោធាជាន់ខ្ពស់ម្នាក់បានខ្ចីដីពីអ្នកភូមិជាច្រើនហិកតានៅតំបន់នោះ ដើម្បីបោះទីតាំងឱ្យពលទាហានឈរជើង ដោយសងដីនោះជូនពលរដ្ឋវិញក្រោយប្រទេសមានសុខសន្តិភាព។
អ្នកស្រីបន្តថា នៅឆ្នាំ២០០០ អ្នកភូមិបានទាមទារដីនោះមកវិញ ហើយនៅឆ្នាំ២០១៧ លោកនាយករដ្ឋមន្រ្តី ហ៊ុន សែន ក៏បានចេញបទបញ្ជាទៅក្រសួងការពារជាតិឱ្យដោះស្រាយបញ្ចប់បញ្ហានេះហើយនៅឆ្នាំ២០១៨។ ក្នុងនោះ មេបញ្ជាការកងទ័ពជើងគោក លោក ហ៊ុន ម៉ាណែត ក៏បានសន្យាចំពោះមុខតំណាងពលរដ្ឋថា លោកនឹងដោះស្រាយបញ្ចប់បញ្ហាវិវាទដីធ្លីនេះជូនពួកគាត់ឱ្យបានឆាប់ផងដែរ ប៉ុន្តែរហូតមកដល់សព្វថ្ងៃនេះ ពុំមានអ្នកភូមិណាម្នាក់ទទួលបានសំណងនៅឡើយ។
អ្នកស្រីបន្ថែមថា៖ «ឯកសារពលរដ្ឋមានពេញនៅក្នុងដៃ ស្របទៅតាមផ្លូវច្បាប់ទាំងអស់។ លោកឧប [ឧបនាយករដ្ឋមន្ត្រី] ប៊ិន ឈិន ក៏ឱ្យក្រសួងការពារជាតិអនុវត្តតាមចំណារសម្ដេច! លោក ជា សុផារ៉ា ក៏ឱ្យអនុវត្តតាមចំណាររបស់សម្តេច! តែនៅតែមិនអនុវត្ត! ហើយឥលូវបែរជាលោក សុខ ប៉ាង សុំចុះបញ្ជីជាប្រព័ន្ធទៀត។ អ៊ីចឹងប្រជាពលរដ្ឋគាត់ម៉េចសុខចិត្ត! ហើយខ្ញុំក្នុងនាំជាមេភូមិ ជាតំណាង ខ្ញុំរកតែភាពយុត្តិធម៌ជូនពលរដ្ឋទេ ដោះឱ្យពួកគាត់មកក្នុងគោលនយោបាយឈ្នះៗ»។
អ្នកនាំពាក្យកងទ័ពជើងអាកាស នៃក្រសួងការពារជាតិ លោក ប្រាក់ សុខា មានប្រសាសន៍ថា ជម្លោះនេះមិនពាក់ព័ន្ធនឹងអគ្គនាយកដ្ឋានកងទ័ពជើងអាកាសទេ គឺពាក់ព័ន្ធនឹងបញ្ជាការដ្ឋានវរសេនាតូចលេខ៩១នោះផ្ទាល់តែម្តង ហើយលោកបានបង្វែរឱ្យទៅសួរមេបញ្ជាការនៃបញ្ជាការដ្ឋានវរសេនាតូចលេខ៩១ លោក សុខ ប៉ាង វិញ។
លោកបន្ថែមថា៖ «បញ្ហាហ្នឹងជារបស់កងកម្លាំងការពារអាកាស មិនមែនរបស់ទ័ពអាកាសទេ! ហើយរឿងវិវាទដីធ្លីជាមួយប្រជាពលរដ្ឋហ្នឹង ខ្ញុំមិនបានដឹងទេ។ សូមសួរទៅឧត្ដមសេនីយ៍ទោ សុខ ប៉ាង ដែលគាត់ជាមេបញ្ជាការការពារអាកាសកងទ័ពជើងគោក។ ខ្ញុំទ័ពអាកាស ខ្ញុំអត់សូវដឹងរឿងរបស់គេទេ»។
វីអូឌី មិនអាចសុំការឆ្លើយតបពីលោក សុខ ប៉ាង ដែលរងការចោទក្នុងរឿងនេះបាននៅឡើយទេ នៅថ្ងៃអង្គារ។
បើតាមតំណាងពលរដ្ឋ ដីធ្លីដែលមន្រ្តីទាហានខ្ចីពលរដ្ឋដើម្បីដាក់ទាហាននោះ គឺមានទំហំ៩ហិកតា ប៉ុន្តែក្រោយមក រដ្ឋាភិបាលសម្រេចសងដីមកឱ្យពលរដ្ឋវិញបានត្រឹមតែ៤ហិកតាប៉ុណ្ណោះ សម្រាប់ពលរដ្ឋ៣៥គ្រួសារ៕