ក្រសួងមហាផ្ទៃ ប្រាប់ទៅគណបក្សកម្ពុជានិយម ឱ្យកែសម្រួលខ្លឹមសារក្នុងលក្ខន្តិកៈនិងរៀបចំកម្មវិធីនយោបាយសំខាន់ៗរបស់ខ្លួនឡើងវិញ បើពុំនោះទេ ក្រសួងនឹងមិនអនុញ្ញាតចុះឈ្មោះគណបក្សនេះក្នុងបញ្ជីគណបក្សនយោបាយនោះទេ។
យោងតាមលិខិតរបស់ក្រសួងមហាផ្ទៃ ផ្ញើជូនលោក យ៉ែម បុញ្ញឬទ្ធិ ប្រធានគណៈកម្មាធិការបណ្ដោះអាសន្នគណបក្សកម្ពុជានិយម ចុះថ្ងៃទី៣ ខែវិច្ឆិកា ឆ្នាំ២០២១ បានលើកឡើងថា ក្រសួងបានទទួលរួចហើយនូវសំណើសុំចុះឈ្មោះ «គណបក្សកម្ពុជានិយម» ក្នុងបញ្ជីគណបក្សនយោបាយនៅក្រសួងមហាផ្ទៃ។
ប៉ុន្តែពាក់ព័ន្ធនឹងសំណើនេះ ក្រសួងពិនិត្យឃើញថា គណៈកម្មាធិការបណ្ដោះអាសន្នគណបក្សកម្ពុជានិយម ពុំបានភ្ជាប់មកជាមួយនូវកម្មវិធីនយោបាយសំខាន់ៗរបស់គណបក្ស ស្របតាមបញ្ញត្តិមាត្រា២០ នៃច្បាប់ស្ដីពីគណបក្សនយោបាយឡើយ។ ចំណែកលក្ខន្តិកៈគណបក្ស ក្រសួងក៏សង្កេតឃើញមានទម្រង់នៃការសរសេរទុកចន្លោះទំនេរចោលក្នុងទំព័រជាច្រើន ត្រង់ជំពូកនិងផ្នែកនីមួយៗនៃលក្ខន្តិកៈ ខណៈខ្លឹមសារក្នុងប្រការមួយចំនួនមានលក្ខណៈផ្ទុយនឹងបទប្បញ្ញត្តិនៃច្បាប់ស្ដីពីគណបក្សនយោបាយ។
ករណីនេះ ក្រសួងមហាផ្ទៃ ស្នើឱ្យគណបក្សកម្ពុជានិយម ត្រូវកែសម្រួលខ្លឹមសារក្នុងលក្ខន្តិកៈ និងត្រូវរៀបចំនូវ «កម្មវិធីនយោបាយសំខាន់ៗរបស់គណបក្ស» ឱ្យបានត្រឹមត្រូវ ស្របតាមបទប្បញ្ញត្តិ នៃច្បាប់ស្ដីពីគណបក្សនយោបាយឡើងវិញ រួចហើយផ្ញើមកក្រសួង ក្នុងរយៈពេលយ៉ាងយូរ១៥ថ្ងៃ គិតចាប់ពីថ្ងៃទទួលលិខិតជូនដំណឹងជាកំហិត។
ក្រសួងក៏បានព្រមានដែរថា ក្នុងករណីគណបក្សនេះមិនអនុវត្តតាមស្មារតីនៃលិខិតជូនដំណឹងនេះ ក្រសួងនឹងមិនអនុញ្ញាតចុះឈ្មោះក្នុងបញ្ជីគណបក្សនយោបាយឡើយ។
គួរបញ្ជាក់ថា រហូតមកដល់ពេលនេះ មានគណបក្សនយោបាយជាង៤០បានចុះបញ្ជីនៅក្រសួងមហាផ្ទៃ ក្នុងនោះមានគណបក្សចំនួន៦ដែលបានបង្កើតឡើងដោយអតីតមន្ត្រីគណបក្សប្រឆាំង រួមមាន គណបក្សឆន្ទៈខ្មែរ របស់លោក គង់ មូនីកា កូនប្រុសរបស់លោក គង់ គាំ, គណបក្សខ្មែរអភិរក្សនិយម របស់លោក រៀល ខេមរិន្ទ, គណបក្សខ្មែរស្រឡាញ់ជាតិ របស់លោក ជីវ កត្តា, គណបក្សកែទម្រង់កម្ពុជា របស់លោក ប៉ុល ហំម និងលោក អ៊ូ ច័ន្ទរ័ត្ន, គណបក្សកម្ពុជានិយម របស់លោក យ៉ែម បុញ្ញឬទ្ធិ និងគណបក្សបេះដូងជាតិ ដែលត្រូវបានគេអះអាងថាជារបស់លោក ថាច់ សេដ្ឋា៕
