អង្គការសង្គមស៊ីវិលជាតិនិងអន្តរជាតិចំនួន១០១ ស្នើទៅរដ្ឋាភិបាលថៃ ដោះលែងពលករចំណាកស្រុកមកពីកម្ពុជា ៧នាក់ ដែលអាជ្ញាធរថៃបានចាប់ខ្លួន ខណៈពួកគេដាក់ញត្តិទៅក្រសួងការងារថៃ ទាមទារឱ្យមានភាពប្រសើរឡើងនូវកិច្ចគាំពារសុខុមាលភាព និងសិទ្ធិពលករអន្តោប្រវេសន៍ដែលធ្វើការនៅក្នុងប្រទេសនេះអំឡុងវិបត្តិកូវីដ-១៩។
ក្រុមអង្គការសង្គមស៊ីវិលជាតិនិងអន្តរជាតិទាំងនោះមានដូចជា អង្គការសង់ត្រាល់ លីកាដូ បណ្តាញពលករតំបន់មេគង្គ មូលនិធិធនធានអាស៊ី មូលនិធិសម្រាប់សិទ្ធិជំនួយប្រចាំប្រទេសថៃ និងមជ្ឈមណ្ឌលជំនួយការសម្រាប់កម្មករប្រចាំប្រទេសហ្វីលីពីន ជាដើម។
ក្នុងសេចក្តីថ្លែងការណ៍រួមមួយ ចុះថ្ងៃទី១ ខែវិច្ឆិកា ឆ្នាំ២០២១ ស្ថាប័នទាំងនោះបានអំពាវនាវដល់រដ្ឋាភិបាលក្រុងបាងកក ដោះលែងពលករអន្តោប្រវេសន៍កម្ពុជាទាំង៧នាក់នោះជាបន្ទាន់ និងចាត់ទុកថា ការចាប់ខ្លួនពួកគេថា «ជាការរំលោភបំពានសិទ្ធិមនុស្ស បន្ទាប់ពីការសម្រេចរបស់រដ្ឋាភិបាលក្រុងបាងកកផ្តល់ការលើកលែងចំពោះពលករអន្តោប្រវេសន៍ដែលគ្មានឯកសារគ្រប់គ្រាន់»។
ក្រុមអង្គការសង្គមស៊ីវិលទាំងនោះបានអំពាវនាវទៀតថា៖ «ក្រសួងមហាផ្ទៃ និង/ឬក្រសួងការងារថៃ ត្រូវគោរពសេចក្តីសម្រេចរបស់រដ្ឋាភិបាល និងសភាថៃ នៅថ្ងៃទី២៨ ខែកញ្ញា ឆ្នាំ២០២១ ឱ្យបញ្ឈប់ការពន្យារពេល និងចាប់ផ្តើមអនុវត្តជាបន្ទាន់ចំពោះការផ្តល់ភាពស្របច្បាប់ដល់ពលករអន្តោប្រវេសន៍ ហើយអនុម័តជំហាននីតិបញ្ញត្តិ រដ្ឋបាល និងជំហានផ្សេងទៀតតាមការចាំបាច់ ដើម្បីធានាការអនុវត្តប្រកបដោយប្រសិទ្ធភាពចំពោះសិទ្ធិនិងសេរីភាពរបស់ពលករអន្តោប្រវេសន៍»។
បើតាមប្រភពដដែល ពលករខ្មែរទាំង៧នាក់ដែលជាប្រតិភូតំណាងក្រុមអង្គការការពារសិទ្ធិពលករអន្តោប្រវេសន៍ក្នុងប្រទេសថៃនោះ ត្រូវបានចាប់ខ្លួនកាលពីថ្ងៃទី២៩ ខែតុលា នៅពេលពួកគេយកញត្តិទៅដាក់នៅក្រសួងការងារថៃ ដើម្បីស្នើឱ្យស្ថាប័នរដ្ឋាភិបាលមួយនេះធានាផ្តល់លក្ខខណ្ឌសុខុមាលភាព និងសិទ្ធិមនុស្សដែលល្អប្រសើរសម្រាប់ពលករបរទេសអំឡុងវិបត្តិកូវីដ-១៩។
ក្នុងលិខិតនោះបន្ថែមថា ក្នុងចំណោមពួកគេទាំង៧នាក់ មានស្រ្តីម្នាក់មានកូនតូច២នាក់នៅផ្ទះកំពុងរង់ចាំម្តាយត្រលប់មកផ្ទះវិញនៅពេលល្ងាច។
យោងតាមសេចក្តីថ្លែងការណ៍នោះ ពួកគេទាមទារ៣ចំណុច រួមមាន ស្នើឱ្យមានការណាត់ជួបរវាងគណៈកម្មាធិការការងារទទួលបន្ទុកគ្រប់គ្រងកម្មករបរទេសមកពីប្រទេសមីយ៉ាន់ម៉ា ឡាវ និងកម្ពុជា និងតំណាងពលករ សង្គមស៊ីវិល និងរដ្ឋ, កាត់បន្ថយថ្លៃឈ្នួល និងការចំណាយផ្សេងៗសម្រាប់ការដាក់ពាក្យស្នើសុំការអនុញ្ញាតបន្តធ្វើការក្នុងប្រទេស និងផ្តល់ការធានារ៉ាប់រងសុខភាពនិងអត្ថប្រយោជន៍ផ្សេងៗដល់ពលករ ឱ្យស្របតាមលក្ខខណ្ឌដែលក្រសួងសុខាភិបាលថៃ ឬបេឡារបរសន្តិសុខសង្គមបានដាក់ចេញ។
វីអូឌី មិនទាន់អាចទាក់ទងសុំការឆ្លើយតបពីស្ថានទូតថៃប្រចាំនៅប្រទេសកម្ពុជា បានភ្លាមៗនោះទេ នៅថ្ងៃទី៥ ខែវិច្ឆិកា ឆ្នាំ២០២១នេះ។
អ្នកនាំពាក្យក្រសួងការបរទេសកម្ពុជា លោក កុយ គួង បញ្ជាក់ប្រាប់ វីអូឌី តាមសារ Telegram នៅថ្ងៃនេះថា ពិតជាមានការចាប់ខ្លួនពលករខ្មែរ៧នាក់ កាលពីថ្ងៃទី២៩ ខែតុលា សប្ដាហ៍មុន ពិតមែន ដោយពួកគេបានប្រមូលផ្ដុំគ្នាដាក់ញត្តិនៅមុខក្រសួងការងារថៃ។
លោកបន្ថែមថា៖ «ការឃាត់ខ្លួនមានសរុបទាំងអស់៨នាក់ ក្នុងនោះមានពលករម្នាក់ដែលមានឯកសារត្រឹមត្រូវ ក៏ត្រូវបានដោះលែងវិញ! រីឯ៧នាក់ទៀតដែលពុំមានឯកសារត្រឹមត្រូវ កំពុងស្ថិតនៅស្នាក់ការនគរបាល ដើម្បីរង់ចាំបញ្ជូនមកកាន់ប្រទេសកម្ពុជាវិញ។ ស្ថានទូតកម្ពុជា កំពុងតាមដានយ៉ាងយកចិត្តទុកដាក់បំផុតចំពោះករណីនេះ»៕
សេចក្ដីកែតម្រូវ៖ «ក្នុងសេចក្តីថ្លែងការណ៍រួមមួយ ចុះថ្ងៃទី៤ ខែវិច្ឆិកា ឆ្នាំ២០២១ […]» ទៅជា «ក្នុងសេចក្តីថ្លែងការណ៍រួមមួយ ចុះថ្ងៃទី១ ខែវិច្ឆិកា ឆ្នាំ២០២១»
