សាលាដំបូងខេត្តកោះកុង កោះហៅតំណាងពលរដ្ឋចំនួន៩នាក់ដែលកំពុងមានជម្លោះដីធ្លីជាមួយក្រុមហ៊ុន ហេង ហ៊ុយ អភិវឌ្ឍន៍ (Heng Huy Development Co., Ltd) ស្ថិតក្នុងស្រុកស្រែអំបិល ចូលសវនាការនៅចុងខែនេះ ទៅតាមបណ្ដឹងរបស់ម្ចាស់ក្រុមហ៊ុន។
កាលពីឆ្នាំ២០១៩ ប្រធានក្រុមហ៊ុន ហេង ហ៊ុយ អភិវឌ្ឍន៍ និងជាមន្ត្រីនគរបាលខេត្តកោះកុង លោក ហេង ហ៊ុយ បានប្ដឹងតំណាងពលរដ្ឋ១០នាក់ ដោយចោទប្រកាន់ពីបទ «បរិហារកេរិ៍្តជាសាធារណៈ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ក្រោយពលរដ្ឋទាំងនោះនាំគ្នាតវ៉ា និងចោទលោក ហេង ហ៊ុយ ថាបានរំលោភយកដីធ្លីរបស់ពួកគេ។
ក្នុងដីកាចុះថ្ងៃទី២៦ ខែតុលា ឆ្នាំ២០២១ ដែល វីអូឌី ទើបទទួលបាននៅថ្ងៃសុក្រនេះ តំណាងអយ្យការអមសាលាដំបូងខេត្តកោះកុង លោក វ៉ៃ ភីរម្យ បានកោះហៅតំណាងពលរដ្ឋ៩នាក់ រួមមាន អ្នកស្រី អិប តឹង, អ្នកស្រី ដេត ហួរ, អ្នកស្រី កើត នៅ, អ្នកស្រី អ៊ិន ធូ, លោក គង់ មែន និងតំណាងពលរដ្ឋផ្សេងទៀត ឱ្យចូលសវនាការនៅថ្ងៃទី២៤ ខែវិច្ឆិកា ឆ្នាំ២០២១ ដើម្បីឆ្លើយបំភ្លឺក្រោមបទចោទ «បរិហារកេរ្តិ៍ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
អ្នកស្រី ដេត ហួរ ដែលអះអាងថាជាតំណាងពលរដ្ឋ១៩៧គ្រួសារ ប្រាប់ វីអូឌី នៅថ្ងៃសុក្រនេះថា តុលាការបានកោះហៅពួកគាត់ឱ្យចូលបំភ្លឺចំនួន៣ដងហើយ។ អ្នកស្រីចាត់ទុកការកោះហៅរបស់តុលាការឱ្យពួកគាត់ចូលសវនាការនេះ ថាជារឿងអយុត្តិធម៌មួយ ដោយថា ពួកគាត់ត្រូវបានលោក ហេង ហ៊ុយ រំលោភដីធ្លីអស់ហើយ បែរជាត្រូវភាគីជម្លោះប្ដឹងទៅតុលាការ ហើយតុលាការបានចាត់ការកោះហៅពួកគាត់ចូលសវនាការតាមបណ្ដឹងនោះទៀត។
តំណាងពលរដ្ឋរូបនេះបន្តថា ពួកគាត់នឹងចូលទៅឆ្លើយបំភ្លឺតាមការកោះហៅរបស់តុលាការ ដោយមិនបារម្ភពីការចាប់ខ្លួននោះទេ ប្រសិនបើតុលាការកាត់ក្ដីដោយឈរលើគោលការណ៍ច្បាប់និងឯករាជ្យ។
អ្នកស្រីបន្ថែមថា៖ «ពួកយើងមានការបារម្ភដូចគ្នា បារម្ភត្រង់ថា ខ្លាចតុលាការគាត់កាត់ក្ដីដោយអត់ឯករាជ្យ។ ប្រសិនបើតុលាការគាត់កាត់ក្ដីដោយឯករាជ្យ ខ្ញុំគិតថា វាមិនជាបញ្ហារហូតដល់ថ្នាក់ចាប់ខ្លួននោះទេ ពីព្រោះពួកខ្ញុំជាអ្នកបាត់បង់ដីពិតប្រាកដ។ យើងមិនបានធ្វើអីខុស ហើយបែរជាតុលាការចោទប្រកាន់មកលើពួកយើងយ៉ាងអយុត្តិធម៌យ៉ាងដូច្នេះ ខណៈពួកយើងជាជនរងគ្រោះបាត់បង់ដីជាក់ស្ដែង។ សម្ដេច [ហ៊ុន សែន] គាត់មានប្រសាសន៍ថា អ្នកមានជម្លោះដីធ្លីមិនត្រូវជាប់នៅប្រព័ន្ធតុលាការនោះទេ»។
បើតាមអ្នកស្រី ដេត ហួរ កន្លងមក គឺមានតំណាងពលរដ្ឋ១០នាក់ដែលជាប់បណ្ដឹងនៅតុលាការ ក្រោមបណ្ដឹងរបស់លោក ហេង ហ៊ុយ ប៉ុន្តែលើកនេះ តុលាការកោះហៅតែតំណាង៩នាក់ប៉ុណ្ណោះឱ្យចូលសវនាការ។
មន្ត្រីសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជា ប្រចាំខេត្តកោះកុង និងកំពង់ស្ពឺ លោក ញ៉ិល ភាព ដែលតាមដានករណីនេះ យល់ថា ការចោទប្រកាន់តាមផ្លូវតុលាការទៅលើតំណាងពលរដ្ឋទាំង៩នាក់ក្នុងវិវាទដីធ្លីនេះ ជារឿងមិនសមស្របនិងមិនត្រឹមត្រូវទៅតាមស្ថានភាពជាក់ស្ដែងឡើយ។ លោកចាត់ទុកការចោទប្រកាន់នេះថា ជាការបំបិទសិទ្ធសេរីភាពនៃការបញ្ចេញមតិរបស់ពលរដ្ឋ ដែលកំពុងបាត់បង់ដីធ្លី និងកំពុងរងការរំលោភបំពានសិទ្ធិ។
មន្ត្រីសមាគមរូបនេះមើលឃើញថា កន្លងមក អាជ្ញាធរនិងរដ្ឋាភិបាលតែងប្រើប្រាស់បទចោទនេះទៅយាយីនិងធ្វើទុក្ខបុកម្នេញលើសកម្មជនដីធ្លី សកម្មជនបរិស្ថាន និងសកម្មជនសិទ្ធិមនុស្ស ជាដើម ដោយគ្រាន់តែពួកគេប្រើប្រាស់សិទ្ធិសម្ដែងមតិស្របទៅតាមច្បាប់រដ្ឋធម្មនុញ្ញ ដើម្បីទាមទារឱ្យមានការដោះស្រាយបញ្ហារបស់ពួកគេនោះ។
លោកបន្ថែមថា៖ «បញ្ហានេះបង្ហាញថា ប្រទេសយើងគ្មាននីតិរដ្ឋ គ្មានការគោរពសិទ្ធិមនុស្ស គ្មានប្រជាធិបតេយ្យពិតប្រាកដ ដោយសារអ្នកដែលប្រើប្រាស់សិទ្ធិខ្លួនឯងស្របទៅតាមច្បាប់ ដើម្បីការពារផលប្រយោជន៍ស្របច្បាប់របស់គាត់ហ្នឹង ត្រូវបានគេយាយី ត្រូវបានគេចោទប្រកាន់ ត្រូវបានចាប់ដាក់ពន្ធនាគារជាហូរហែមកហើយ»។
លោក ញ៉ិល ភាព បានអំពាវនាវដល់ប្រមុខរដ្ឋាភិបាលពិចារណាដោះស្រាយផលប៉ះពាល់ដីធ្លីជូនពលរដ្ឋ១៩៧គ្រួសារ និងបានស្នើដល់តុលាការខេត្តកោះកុងកាត់ក្ដីដោយឈើគោលការណ៍ឯករាជ្យ ដើម្បីផ្ដល់យុត្តិធម៌ដល់ពលរដ្ឋដែលជួបបញ្ហាវិវាទដីធ្លី។
ពាក់ព័ន្ធជម្លោះដីធ្លីនេះ ប្រធានក្រុមហ៊ុន ហេង ហ៊ុយ អភិវឌ្ឍន៍ គឺលោក ហេង ហ៊ុយ ធ្លាប់មានប្រសាសន៍ថា ដីដែលក្រុមហ៊ុនរបស់លោកកំពុងកាន់កាប់នោះ ជាដីមានបណ្ណកម្មសិទ្ធិត្រឹមត្រូវស្របទៅតាមច្បាប់ ដែលលោកបានប្រមូលទិញពីពលរដ្ឋជាច្រើនឆ្នាំមកហើយ។ លោកថា ករណីពលរដ្ឋនាំគ្នាតវ៉ានិងប្ដឹងលោកថារំលោភយកដីធ្លីនោះ គឺធ្វើឡើងតាមការញុះញង់របស់មេខ្យល់តែប៉ុណ្ណោះ ដោយលោកមិនបានទៅរំលោភយកដីធ្លីពលរដ្ឋដូចការចោទប្រកាន់ឡើយ។
ចាប់តាំងពីពាក់កណ្ដាលឆ្នាំ២០១៩មក ពលរដ្ឋ១៩៧គ្រួសារ មកពីឃុំជីខលើ និងជីខក្រោម បានឡើងមកតវ៉ានៅរាជធានីភ្នំពេញជាបន្តបន្ទាប់ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លីរបស់ពួកគាត់ ដោយចោទថា ក្រុមហ៊ុន ហេង ហ៊ុយ រំលោភយកតាំងពីឆ្នាំ២០០៧។ ប៉ុន្តែត្រូវបានក្រសួងរៀបចំដែនដី បដិសេធដោះស្រាយឱ្យពលរដ្ឋទាំងនោះចំនួន៣ដងហើយ និងស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ចំពោះអ្នកដែលក្រសួងថា បានញុះញង់ឱ្យពលរដ្ឋ១៩៧គ្រួសារនោះឡើងមកតវ៉ាទៀតផង។
រដ្ឋបាលខេត្តកោះកុង បានចុះផ្សាយកាលពីចុងឆ្នាំ២០២០ ថាករណីវិវាទដីធ្លីរវាងពលរដ្ឋ និងក្រុមហ៊ុន ហេង ហ៊ុយ ត្រូវបានដោះស្រាយចប់ជាស្ថាពរតាំងពីឆ្នាំ២០០៩ តាមរយៈសាលដីកាស្ថាពររបស់តុលាការកំពូល និងអនុក្រឹត្យលេខ៣៦ របស់រាជរដ្ឋាភិបាល កាលពីឆ្នាំ២០០៩ ផងដែរ។
រដ្ឋបាលខេត្តកោះកុង អះអាងថា លោក ហេង ហ៊ុយ ទទួលបានកម្មសិទ្ធិដីធ្លីនោះនៅឆ្នាំ២០១១ ខណៈពលរដ្ឋ១៩៧គ្រួសារទើបតែប្រមូលផ្ដុំតវ៉ាជាថ្មីទៀតនៅឆ្នាំ២០១៩ ក្រោយតុលាការ និងក្រសួងរៀបចំដែនដី បានបិទបញ្ចប់បណ្ដឹងតវ៉ារួចទៅហើយ៕
