ចៅក្រមសាលាឧទ្ធរណ៍ បានកាត់ទោសឱ្យ «សកម្មជនមាតាធម្មជាតិ» អនុវត្តទោសក្នុងពន្ធនាគារ១ឆ្នាំ២ខែ ខណៈទោសដែលនៅសល់នឹងត្រូវព្យួរសាកល្បងរយៈពេល៣ឆ្នាំ។
បើតាមប្រភពពីសាច់ញាតិរបស់សកម្មជនមាតាធម្មជាតិ ឱ្យដឹងថា បើគិតពីថ្ងៃចាប់ខ្លួនមកទល់នឹងថ្ងៃនេះ ពួកគេនឹងត្រូវដោះលែងឱ្យមានសេរីភាពវិញនៅថ្ងៃនេះ។
សកម្មជនមាតាធម្មជាតិទាំង៣នាក់ រួមមាន លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី។ លោក ថុន រដ្ឋា ត្រូវបានសាលាដំបូងរាជធានីភ្នំពេញ កាត់ទោសឱ្យជាប់ពន្ធនាគាររយៈពេល២០ខែ និងពិន័យជាប្រាក់៤លានរៀល ខណៈកញ្ញា ឡុង គន្ធា និងកញ្ញា ភួន កែវរស្មី ត្រូវបានតុលាការកាត់ទោសឱ្យជាប់ពន្ធនាគាររយៈពេល១៨ខែ និងពិន័យជាប្រាក់២លានរៀល ក្នុងបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍»។
ប៉ុន្តែទោះបីជាសាលាឧទ្ធរណ៍ បានកាត់តម្រឹមទោស១ឆ្នាំ២ខែក្នុងសំណុំរឿងនេះក្តី ក៏សកម្មជនមាតាធម្មជាតិទាំង៣នាក់នៅជាប់បណ្ដឹងមួយទៀត គឺបទ «រួមគំនិតក្បត់» ជាមួយសកម្មជនបរិស្ថាន៤នាក់ផ្សេងទៀត គឺលោក យីម លាងហ៊ី, កញ្ញា ស៊ុន រដ្ឋា, យុវជន លី ចាន់ដារ៉ាវុធ និងលោក អាឡិចហ្សង់ដ្រូ ហ្គន់ហ្សាឡេស-ដាវិតសុន (Alejandro Gonzalez-Davidson)៕