លោកនាយករដ្ឋមន្ត្រី ហ៊ុន សែន ព្រមានវាយខ្នោះអ្នកដែលរិះគន់ថា ការកែរដ្ឋធម្មនុញ្ញពី «២ភាគ៣» ទៅ «៥០+១» ជាការរំលោភកិច្ចព្រមព្រៀងសន្តិភាពទីក្រុងប៉ារីស ដោយលោកថា ការលើកឡើងបែបនេះជាការប្រមាថស្ថាប័នជាតិ។
ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារក្រសួងរៀបចំដែនដីថ្មី នាថ្ងៃចន្ទនេះ លោកនាយករដ្ឋមន្ត្រី ហ៊ុន សែន ថ្លែងថា វាជារឿងគួរឱ្យអស់សំណើចដែលអ្នកអត្ថាធិប្បាយជាច្រើនលើកឡើងថា ការកែរដ្ឋធម្មនុញ្ញពី ២ភាគ៣ ទៅ ៥០+១ ខុសកិច្ចព្រមព្រៀងសន្តិភាពទីក្រុងប៉ារីស ហើយចង់យកកិច្ចព្រមព្រៀងនេះទៅដោះស្រាយបញ្ហានៅភូមា។
លោកបានរម្លឹកថា នៅពេលនោះ បើរដ្ឋកម្ពុជាមិនព្រមអនុម័តរដ្ឋធម្មនុញ្ញទេ កម្លាំងអ៊ុនតាក់នឹងជាប់គាំងនៅកម្ពុជារហូតដល់បច្ចុប្បន្ន ហើយថា អ្នកដែលចង់សើរើកិច្ចព្រមព្រៀងនេះគឺជាអ្នកចង់ឱ្យបរទេសមកត្រួតត្រាកម្ពុជា ដែលការនេះ លោកថា ជាការប្រឈមនឹងផ្លូវច្បាប់។
លោកថា៖ «ផ្ដាំផ្ញើទៅផង ល្មមៗបានហើយ! ហើយតិចថា ហ៊ុន សែន មិនហ៊ាន! និយាយគ្នាឱ្យច្បាស់! ហ៊ុន សែន ហ៊ានវាយខ្នោះអ្នកនយោបាយម៉ោង១២យប់ រឿងអីមិនមានវាយខ្នោះត្រឹមប៉ុណ្ណេះ! ឱ្យមកបកស្រាយជាមួយតុលាការ ហេតុអីបានជាចោទសភា[ថា]ខុស កែរដ្ឋធម្មនុញ្ញពី ២ភាគ៣ មក ៥0+១»។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា ការអត្ថាធិប្បាយបែបនេះក៏ជាការប្រមាថស្ថាប័នកំពូលរបស់ជាតិផងដែរ។
លោកថា៖ «ព្រោះវាជាការប្រមាថហួស ប្រមាថស្ថាប័នជាតិមួយដែលធ្វើការកែរដ្ឋធម្មនុញ្ញពី ២ភាគ៣ មក ៥0+១ ខុសរដ្ឋធម្មនុញ្ញ […] បន្តិចទៀតបានប៉ុណ្ណឹងយកទៅដាក់ហើយ វិទ្យុដំបូងចេញពីអា VOD ចេញពីនៅភ្នំពេញ បន្ទាប់ទៅអានៅក្រៅប្រទេសសម្ភាសហើយ ពេញហ្នឹង! សម្ភាសចុះ វាបានផល វានិយាយដែរ ចាត់ទុកថាឱ្យមុខរបរនិយាយចុះ! ប៉ុន្តែយើងក៏បាននិយាយពន្យល់ពលរដ្ឋមួយប្រទេសដែរ»។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន មិនអាចទាក់ទងបានដើម្បីបញ្ជាក់ថាតើសារព្រមានរបស់រដ្ឋាភិបាលនេះសំដៅទៅក្រុមណាមួយពិតប្រាកដនោះទេ ខណៈអ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោកមិនបានដឹង។
អតីតតំណាងរាស្ត្រគណបក្សសង្គ្រោះជាតិ ដែលចេញមកបង្កើតគណបក្សកំណែទម្រង់កម្ពុជា លោក អ៊ូ ច័ន្ទរ័ត្ន យល់ថា «ប្រព័ន្ធ២ភាគ៣» បានការពារប្រយោជន៍ជាតិ ច្រើនជាង «ប្រព័ន្ធ៥០បូក១» ក្នុងការទប់ស្កាត់កុំឱ្យកម្ពុជារអិលធ្លាក់ទៅក្រោមអំណាចផ្ដាច់ការដូចពីអតីតកាល។
លោកថា៖ «ប្រទេសយើងឆ្លងកាត់ យើងដឹងហើយ ទាំងរបបកុម្មុយនីស្ត ទាំងរបបផ្ដាច់ការ របបស្អីៗកន្លងមកហ្នឹង! ដូច្នេះអាចរន្តត្រលប់ទៅវិញហ្នឹង វាអាចមានច្រើន! អ៊ីចឹងបានអា២ភាគ៣ហ្នឹង វាចង់កុំឱ្យត្រលប់ទៅរកអាហ្នឹងវិញ»។
មួយវិញទៀត លោកថា អ៊ុកតាក់ នៅពេលនោះ មិនបានបញ្ចប់សង្គ្រាមស៊ីវិលនៅកម្ពុជាទាំងស្រុងមែន ប៉ុន្តែលោកថា ជាចំណុចចេញដំណើរមួយដែលធ្វើឱ្យកម្ពុជាមានថ្ងៃនេះ។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត បារម្ភថា សារគំរាមរបស់មេដឹកនាំនេះនឹងធ្វើឱ្យសេរីភាពបញ្ចេញមតិដែលត្រូវបានធានាដោយច្បាប់បានធ្លាក់ចុះបន្ថែមទៀត ដោយថា ក្នុងសង្គមប្រជាធិបតេយ្យ មេដឹកនាំប្រទេសគួរប្រើយន្តការឆ្លើយតបតាមរយៈការពន្យល់ជាជាងប្រើវិធានចាប់ចង។
លោកថា៖ «អ្នកវិភាគក៏ដោយ អ្នកបញ្ចេញមតិក៏ដោយ កាលណាគាត់ទទួលបានការព្រមាន អាហ្នឹងគឺគាត់តែងតែបារម្ភ ហើយរឹតត្បិតសេរីភាពក្នុងការវិភាគ បញ្ចេញមតិដោយខ្លួនឯង […] ខ្ញុំគិតថា ការពន្យល់និងការបកស្រាយ វាជារឿងសំខាន់ ដើម្បីឱ្យយុវជនឬអ្នកទាំងអស់គ្នាហ្នឹងគាត់បានយល់»។
យ៉ាងណា លោកនាយករដ្ឋមន្ត្រី ហ៊ុន សែន រម្លឹកដែរថា អ៊ុនតាក់ បានបរាជ័យក្នុងការដកអាវុធ និងនាំខ្មែរក្រហមឱ្យចូលបោះឆ្នោត។
មួយវិញទៀត លោកថា អ៊ុនតាក់ ធ្វើវិសោធនកម្មច្បាប់បោះឆ្នោតនាពេលនោះមិនបានប្រាប់ឧត្ដមក្រុមប្រឹក្សាជាតិនៃកម្ពុជា ដែលហៅថា (SNC) នោះទេ ធ្វើឱ្យលទ្ធផលបោះឆ្នោតលើកដំបូងនៅកម្ពុជាមានភាពមិនប្រក្រតី ខណៈលទ្ធផលបោះឆ្នោតពេលនោះ គណបក្សប្រជាជនកម្ពុជា ដែលដឹកនាំដោយរូបលោក ចាញ់គណបក្សហ្វ៊ុនស៊ិនប៉ិច របស់សម្ដេចក្រុមព្រះ៕
